LEEWAAWOOTA 25 - Qullaawa Maxaafa

LAMALKI DIRI

¹ Kaaliiqi Musera Siina Ilaalira,

² «Israeelootaho, ‹Eemmo'ne gobba iillitinanni yannara lamalki diro, baatto loosa agurtine fooliishshiishshine ane ayirrisse.

³ Lee diro gate'ne loosidhe; woyinete kaashsho'neno quuxidhe; laalono gamba assidhe.

⁴ Lamalki diri kayinni, Mootichaho fooliishshote diro ikkeenna, baattoteno fooliishshote diro ikkanno; kunni dirinni, gate'ne loosidhinoonte; woyinete kaashshono quuxidhinoonte.

⁵ Mulla fulino laalchono rossinoonni garinni gamba assidhinoonte; woyinete laalono xinqidhinoonte. Hakko diro baatto horonta fooliishshidhona.

⁶ Hakko diro loosi'ra hoogginiro nafa, baatto fooliishshidhe heedhe uyitanno'ne laalchi ki'nera, borojji'neranna kiranyi'nera, hattono ledo'ne hee'rannohura manni gobba mannira sagale ikkanno'ne.

⁷ Hattonni, baatto'ne fushshitannohu baalu, saada'neranna gobba'ne moyichira sagale ikkanno. Baatto fushshitannoha baala ita dandiitinanni.

WOLAPHONNIHANNA ADHINOONNIHA QOLLANNI DIRO

⁸ «‹Lamala higgi'ne lamala diro kiirre; lamalunku fooliishshote diri mitteenni 49 diro ikkanno.

⁹ Hakkunni gedensaanni, lamalki aganira tonnikki barra, buudu xurumba ufuunfona; cubbo agursiinsanni barrano, baatto'ne baalate buudu xurumba ufuuffe.

¹⁰ Ontayikki diro qullaawa asse; baattote aana noo manni baalunkura wolapho lallabbe; wolaphote ayyaana ikko'ne; hirantino baatto annaho woy fiixisira higgona; borojjimmate hiraminohuno ayiddisiwa higona.

¹¹ Ontayikki diri wolaphote ayyaana ikko'ne; kunni dirinni wixidhinoonte; wixidhinikkinni laalinohano mixxitinoonte; quunxoonnikki woyine aaninnino rossinoonni garinni laalo xinqidhinoonte.

¹² Wolaphote ayyaana ikkino'ne daafira, qullaawa ikko'ne; winxikkinni xawoho fulinoha kayinni itte.

¹³ «‹Hirantino baatto baala kunni ayyaaninni annaho higgona.

¹⁴ Fiixi'ne giddonni mittu baatto hidhiro woy hiriro, ku'u ko'onne dogoonke.

¹⁵ Waaga wolaphote ayyaanira gedensaanni noo diri batinyi garinni hendona.

¹⁶ Daanno ayyaani geeshsha hee'ranno diri deerrinni hirranniha ikkino daafira, diru kiiro lexxituro waaga ledde; diru kiiro ajjuro kayinni waaga xeisse.

¹⁷ Ku'u ko'onne dogoonke; ane Magano'ne waajje. Ani Kaaliiqi Magano'neeti.

¹⁸ «‹Woga'ya agadhe; seera'ya seekkitine wonshe; baattote aanano keerunni heedhinannina.

¹⁹ Baatto gumase uyitanno'ne; duubbine ittinanni; hakkiichono keerunni heedhinanni.

²⁰ Ki'neno, «Loosi'ra hoongummoronna gide gamba assi'ra hoongummoro lamalki diro maa inteemmo?» yitinanniha ikkanno.

²¹ Leelki diro atoote soyemmo'ne; baattono 3 dirira ikkanno gide uyitanno'ne.

²² Settikki diro wixidhinanni yannara, balaxxine gamba assidhinoonniha ittinanni; honsikki diri gide gamba assidhina geeshsha konne gide ittinanni.

HIRANTINO BAATTO QO'LA

²³ «‹Baatto anetena hirroonke; ki'ne wosinaho; baattono anga'nella worroonnite.

²⁴ Hirroonni baatto, baattote anni umisi galagalche qo'lanno gede asse.

²⁵ Fiixi'ne giddonni mittu buxe baattosi hiriro, gamba yaannosi fiixi shiqe baattosi wode qolosina.

²⁶ Wode qolannosiha fiixa afi'rinokkihu, umisi woxxe qo'lanno jajja afi'ranno woyite,

²⁷ baattosi hirihunni kayise daanno ayyaani geeshsha noo diro kiire, gatanno woxe hidhi manchira qole baattosi adhona.

²⁸ Woxe qola dandaa hoogiro kayinni, hirino baatto wolaphote ayyaani geeshsha hidhihunnita ikkite keeshshitanno; wolaphote ayyaanira annaho higganno; manchuno baatto umisita assi'ranno.

²⁹ «‹Aye manchino, huxxinoonni katami giddo hee'rannoha minesi hiriro, hiri dirinni kayise mittu diri geeshsha qo'lara dandaanno; qo'late dandaannohu mittu diri giddootilla.

³⁰ Mittu diri goofikkinni qo'la dandaa hoogiro kayinni, huxxinoonni katami giddo noo mini hidhihunnihanna oososiha ikke gatanno; wolaphote ayyaanirano diqollannisi.

³¹ Huxxinoonnikki katamira heedhanno minna kayinni, loosi'nanni baatto gede kiirreenna, qo'la dandiinanni; wolaphote ayyaanirano qo'linanni.

³² Leewaawootu kayinni, uminsa katamma giddo heedhannota minnansa, aye yannarano qo'la dandiitanno.

³³ Leewaawootu katammansara noota minnansa hirte qo'la dandaa hoogguro, wolaphote ayyaanira higannonsa; Leewaawootu katammara heedhanno minna Israeelootu mereero Leewaawootaho jajjansaati.

³⁴ Katammansa gaangaawira nooti hayissote gobba kayinni hirantoonke; geedote jajjansaatina.

BUXANETE LIQIISSA

³⁵ «‹Fiixi'ne giddonni mittu buxe tidha hoogiro, giddo'ne hee'rannoha manni gobba manna woy wosincho kaa'litinanninte gede isono ledo'ne hee'ranno gede kaa'lesi.

³⁶ Fiixi'ne giddo'ne hee'ranno gede, mittoreno qallo adhitinoonte; ane Magano'ne waajje.

³⁷ Woxe'ne qallote liqiissitinoontesi; sagale'neno giddonni fushshidhinannirira hirtinoontesi.

³⁸ Kana"aani baatto aammo'neranna Magano'ne ikkammora, Gibitsetenni fushshummo'nehu ani Kaaliiqi Magano'neeti.

BOROJJE WOLASSA

³⁹ «‹Fiixi'ne giddonni mittu buxe isonoo hiri'nero, borojjicho assitine loosiisidhinoontesi.

⁴⁰ Giddo'ne noo kiranyi woy wosinchi gede assitine kiirresi; wolaphote diri geeshsha looso'nena;

⁴¹ hakkunni gedensaanni, isinna oososi wolaphiteenna minisiranna annisi iqqiwa higona.

⁴² Israeeloota Gibitsetenni fushshoommohu soqqamaasine'ya ikkitinohuraatina, borojjimmate hirantoonke.

⁴³ Wolqatenni gashshitinoontensana, ane Magano'ne waajje.

⁴⁴ Borojje hasidhiniro, qooxeessi'nera noo daga giddonni hidhe.

⁴⁵ Hattonni giddo'ne noori manni gobba manninna ilamansa giddonni borojje hidhitine jajja'ne assi'ra dandiitinanni.

⁴⁶ Insano jajju gede ooso'nera iqqensa; lubbotenni noo geeshsha borojjensa ikkitonsana; Israeeloota fiixa'ne kayinni wolqatenni gashshitinoontensa.

⁴⁷ «‹Giddo'ne hee'rannohu manni gobba manchi woy wosinchu dureessa ikkironna, fiixi'ne giddonni mittu buxe umosi borojjimmate manni gobba manchira woy isi sirchira hiriro,

⁴⁸ hiramihu gedensaanni wondasira dandiinanni. Kunnira ayiddisi giddonni mittu,

⁴⁹ wosiilisi woy wosiilisi beetti, woy maalu fiixasi ikkannohu ayino wodosina; jiro afi'riro, umisi umosi woxxara dandaanno.

⁵⁰ Isino umosi hiri dirinni kayise, wolaphote diri geeshsha hidhinosi manchi ledo keeshshe, dirosi kiidhona; wolassinannisi waagino hatte dirrara kiranyaho baantanni biikkiha ikkona.

⁵¹ Lowo diri gatinosiha ikkirono, gatinosi diri deerrinni roorse gama woxe qolona.

⁵² Wolaphote geeshsha shiimu diri gatinoha ikkiro, gatinosi diri deerrinni gama woxe qolona.

⁵³ Manchu wole gobba manchira borojjicho ikke hee'reenna, bushshannositanna seekkannosita afa hasiissanno'ne; borojjimmatenni gawajjamannokki gede, dirunni diru geeshsha kiranyu gede calla ikke hee'rona.

⁵⁴ Tenne doogo duuchante garinni wodama hoogiro, isinna oososi wolaphote diro wolaphitona.

⁵⁵ Ki'ne Israeele ane borojjeeti. Ki'ne Gibitsete gobbanni fushshi'roommo borojjeeti. Ani Kaaliiqi Magano'neeti› yiino yite kulinsa» yii.