LEEWAAWOOTA 24 - Qullaawa Maxaafa

CAABBIYYETE ASSINANNI QOROPHO

¹ Kaaliiqi Musera,

² «Xaadu Dukkani giddo caabbiyye xo'annokki gede ejersa huuncine ximbiimboonnita xalala zayite abbitannohe gede Israeeloota hajaji.

³ Aaroonino Xaadu Dukkani giddo Taaboota goltino dukkora gobbaanni ane albaanni noo caabbiyye hashsha wo'ma xo'ukkinni xabbanno gede assona. Kunino ooso'ne oosora hegere seeraati.

⁴ Isino filu culkinni seekkinoonni uduunnichi caabbicho worrannihu aana noo caabbiyye, xo'ukkinni ane albaanni xabbanno gede assona.

KAALIIQIRA SHIQINSHANNIHA SAGALETE FUSHSHAATE

⁵ «Liiqo bullee 24 kiilo haadhe 12 tima gani.

⁶ Tenne timma lamewa badde 6 mitto widoonni 6 wole widoonni ane albaanni noohura filu culkinni seekkinoonni xarapheezzi aana wori.

⁷ Dancha hixaana tenne timma aana wori; timma wo'manti aneta ikkitinota egensiisate hixaana giiri.

⁸ Aarooni Fooliishshote Barra iibbado tima shiqishona. Kunino qeesootahonna Israeelete manni baalaho hegere seera ikke hee'rona.

⁹ Tini timma wo'manka woyite, Aarooninna oososi qeechaati; insano massite Qullaawa Darga ittona. Kaimuno, tini timma shilqinshe shiqinshanni kakkalonni roore qullaawa ikkitinohuraati» yii.

MAGANO XONA ABBITANNO QORICHA

^10-11 Annunni Gibitsicha, amatenni Israeelicha ikkinohu mittu manchi no. Amasi Sheloomiiti, Diibiri yinannihu Daani ga're manchi ilinote. Kuni manchi mitto barra wolu Israeelichi ledo giwami; giwamanni hee're Magano xoneenna mannu haa're Musewa abbino.

¹² Kaaliiqi assinannire kulansa geeshsha sammi yite agartu.

¹³ Kaaliiqi Musera,

¹⁴ «Xoninoeha haadhe qachaho gobbaanni fushshi; xonannae macciishshi manni baalu angansa umisi aana worona; hakkiinni, Israeelete manni baalu kinnatenni gane shoona.

¹⁵ Israeelootaho, ‹Ayino Maganosi xoniro loosinoha mixxanno.

¹⁶ Ane xonannohu baalu reyo; mannu baalunku gamba yee kinnatenni gane shoona; manni gobba manchi woy gobbate beetti ane xoniro, hattonni assine shinona.

¹⁷ « ‹Mittu manchi manna gane shiiro, isono shinona.

¹⁸ Wolu saada gane shiino manchi, annaho hakkuyi gari saada riqiwona. Kuni seeri lubbote darga lubbo riqiwate uyinoonniho.

¹⁹ Ayino wole mancho gawajjiro, isono hatto assine gawajjinona.

²⁰ Wolu manchi miqicho hiiqqiro, isi miqichono hiiqqinona; ille huniro, illesi hunnona; hinko hiiqqiro, hinkosi hiiqqinona; wole gawajji gede assine isono gawajjinona.

²¹ Wolu saada shiinohu hee'riro, lubbotenni noo saada riqiwona; manna gane shiiro kayinni, iso umosi shinona.

²² Ki'ne ledo hee'rannohura manni gobba manniranna ki'ne Israeelootaho mittu gari seeri heero'ne. Ani Kaaliiqi Magano'neeti› yiino yite kulinsa» yiisi.

²³ Museno, konne coye mannaho kule kaihu gedensaanni, mannu Kaaliiqa xoninoha qachaho gobbaanni fushshe kinnatenni gane shii. Israeelootuno Kaaliiqi Musera hajajino gede assitu.