LEEWAAWOOTA 23 - Qullaawa Maxaafa

AMMA'NOTE AYYAANNA

¹ Kaaliiqi Musera,

² «Israeelete, ‹Qullaawa songooti yitine ayirrissinanniti doorantinoti ane ayyaanna aante noote:

³ Looso loosidhinannihu 6 barri noo'ne; lamalkihu kayinni Fooliishshote Barraati. Magansi'rate xaaddinanni barraatina hakko barra mittoreno loossinoonte. Kuni barri aneha ikkino daafira qullaawaho. Kunnira, heedhinanni darga baalaho kuni Fooliishshote Barri aneho.

MARARRONNIHANNA TIMU AYYAANA

⁴ « ‹Doorantinore Kaaliiqi ayyaanna assitine yanna yannantenni ayirrissinanniti qullaawa songo aante noote:

⁵ Umi agani eihunni tonaa shoolki barra hashsha, Kaaliiqihu Mararrote Ayyaani hanfamanno.

⁶ Hakko aganira tonaa ontikki barra, Kaaliiqihu Timu Ayyaani hanafamanno; 7 barra shiishinokki tima calla ittinanni.

⁷ Umi barra qullaawa songo assidhe; wolqate loosono loosidhinoonte.

⁸ Lamala barra shilqote kakkalo Kaaliiqira shiqishshe; lamalki barra qullaawa songo assidhe; hakko barrano looso loosidhinoonte› yite kulinsa» yii.

UMI LAALCHO UYINANNI AYYAANA

⁹ Kaaliiqi Musera,

¹⁰ «Israeelootaho, ‹Ani eemmo'ne baatto martine gide gamba assidhinanni yannara, gamba assidhinoonnihu giddonni umi nadala qeesichunniwa shiqishshe.

¹¹ Ani hagiidheemmo'ne gede, anera addi fushshaate assitine shiqishshe. Qeesichu nadala Fooliishshote Barrinni layinki soodo haa're shiqishona.

¹² Gidu nadala addi fushshaate assitine shiqishshinanni barra, muso afi'rinokkiha mittu diri ge'recho shilqote kakkalo assitine shiqishshe"e.

¹³ Anera giirre shiqinshannihu foole su'naanno gede, 2 kiilo liiqo bullee zayitetenni liinseenna, gidu fushshaatira shiqishshe; 1 litire woyinete xajje agattote fushshaatira shiqishshe.

¹⁴ Afansha'ne anera uyitinanni barri geeshsha buddeenano ikko, xoxxoo woy shoye ittinoonte. Kunino heedhinanni gobba baalate dagganno ilamara hegere seeraati.

GIDE GAMBA ASSINANNI AYYAANA

¹⁵ «‹Anera gidunnita umi nadala shiqishshinihunni Fooliishshote Barrinni kayissine 7 wo'ma lamala kiirre.

¹⁶ Lamalki Barri Fooliishshonnihu geeshsha 50 barra kiirre. Hakkunni gedensaanni haaru gidi fushshaate anera shiqishshe.

¹⁷ Lame kiilo liiqo bullee ledo shiisheenna gannoonniha tima, addi fushshaatira umi afansha ikkanno gede mini mini'nenni haadhine anera abbe.

¹⁸ Timu ledono 7 muso afi'rinokkiha mittu diri wilii'le ge'reewunniha, mitto middichanna 2 ge'reewu gocca shiqishshe. Kurino gidunna agattote fushshaati'ne ledo anera shilqote kakkalo ikkanno; foolinsano anera tashshi yaannoha ikkanno.

¹⁹ Hattonni, 1 meichu goco cubbu kakkalora, 2 mittu diri wilii'le mittimmate kakkalora shiqishshe.

²⁰ Qeesichuno lamenka ge'reewu wilii'le umi timi ledo, addi kakkalo asse anera shiqishona; tini anera qullaawa kakkalo ikkitino daafira qeesichu qeechaati.

²¹ Hakko barranni qullaawa songo fushshe; wolqate loosono loosidhinoonte. Kunino heedhinanni base baalate dagganno ilamara hegere seeraati.

²² «‹Baatto'nenni gide gamba assidhinanni yannara, qaccuwate noo gide murtinoonte; qarmeno xinqidhinoonte; buxanetenna manni gobba mannira agurrensa. Ani Kaaliiqi Magano'neeti› yiino yite kulinsa» yii.

HAARU DIRI AYYAANA

²³ Kaaliiqi Musera,

²⁴ «Israeeloota, ‹Lamalki aganira umi barri addiha fooliishshote barra ikko'ne; hakko barri buudu xurumbinni ayirrinsanni ayyaana qullaawa ikko'ne.

²⁵ Konne barra anera kakkalo giirtine shiqishshinannita ikkinnina wolqate looso loosidhinoonte› yiino yite kulinsa» yii.

CUBBO AGURSIINSANNI AYYAANA

²⁶ Kaaliiqi Muse,

²⁷ «Lamalki agani eihunni tonnikki barri cubbo agursiinsanni barraati; konne barra qullaawa xaado assidhe; mittoreno ittinoonte; anerano kakkalo shiqishshe.

²⁸ Ane Kaaliiqi Magani'ne albaanni ki'nera cubbo agursiinsanni barra ikkinohura, hakko barra mittoreno loosidhinoonte.

²⁹ Hakko barra sagale itannohu, manni'ya ledo dikiiramanno.

³⁰ Hakko barra aye loosono loosi'rannoha baala, fiixisi mereerinni ani umi'ya haa're huneemmo.

³¹ Hakko barra horonta mittoreno loosidhinoonte. Kuni coyi heedhinanni base baalate ooso'ne oosora hegere seeraati.

³² Kuni ki'nera Fooliishshote Barra ikkinohura, sagale ittinikkinni aganunni honsikki barra hashshinni kayissine layinki hashshi geeshsha fooliishshote barra'ne ayirrisse» yii.

DAASU AYYAANA

³³ Kaaliiqi Musera,

³⁴ «Israeeloota, ‹Lamalki agani eihunni tonaa ontikki barra, Kaaliiqihu Daasu Ayyaani hanafame, 7 barri geeshsha keeshshanno.

³⁵ Umi barri qullaawa xaadootina, wolqate looso loosidhinoonte.

³⁶ Lamalunku barrinni anera kakkalo shiqishshe; settikki barra qullaawa xaado assidhe; anera kakkalo shiqishshe; wolqate loosono loosidhinoonte.

³⁷ «‹Shilqote kakkalo, gidu fushshaate, kakkalonna agattote fushshaate yinoonni barrinni shiqishidhinanni qullaawa xaado assidhinanniti ane ayyaanna tenneeti.

³⁸ Tini ayyaanna rosamino Barri Fooliishshonnihu aana leddine ayirrissinannite; afanshuno xano'nenna baxxine uyitinanni afanshi aana leddine uyitinanniho.

³⁹ «‹Baatto'ne laalcho gamba assidhinihu gedensaanni, lamalki aganira tonaa ontikki barrinni kayissine, 7 barra ane ayyaana ayirrisse; umihanna settikkiha addi barra fooliishshonniha assidhe.

⁴⁰ Umi barra danchu haqqi laalo, saattu daronna shaqqadu haqqi sina haadhine, 7 barra Magani'ne Kaaliiqi albaanni hagiidhe.

⁴¹ Diru dirunkunni lamalki aganira ane ayyaana assidhine 7 barra ayirrisse. Kunino ooso'ne oosora hegere seeraati.

⁴² Lamala barra daasu giddo ofolle; Israeelete ilama ikkinohu baalu, daasu giddo keeshshona;

⁴³ kunninni ani Israeeloota Gibitsetenni fushshummo yannara daasu giddo heedhanno gede assoommonsata ooso'ne ooso affona. Ani Kaaliiqi Magano'neeti› yiino yite kulinsa» yii.

⁴⁴ Muse kunni garinni doorantinota Kaaliiqi ayyaanna Israeelootaho egensiisinsa.