LEEWAAWOOTA 21 - Qullaawa Maxaafa

QEESOOTAHO UYINOONNI BIDDISHSHA

¹ Kaaliiqi Musera, «Qeesootaho Aarooni oosora, ‹Aye qeesichino reyino fiixisira yee umosi lageessoonke;

² kayinnilla, gamba yiino fiixira amasira, annisira, labbaa beettisira woy meya beettosira woy rodiisira,

³ hattono mine assidhukkinni minesi nootera meya rodoosira umosi lageessa dandaanno.

⁴ Balloomunni xaadino fiixira yee umosi lageessoonke.

⁵ « ‹Fiixa shii'rinota egensiisate, aye qeesichino umosi meexxoonke; ereedasino mudhoonke; bisosino bici'roonke.

⁶ Anera qullaawa ikkona; su'ma'yano shollishoonke; sagalete fushshaate shiqishannoe daafira qullaawa ikkona.

⁷ Ane Maganisira qullaawa ikkino daafira qeesichu macca hunnoonnita, foortannotanna gursumeette adhoonke.

⁸ Magani'neta fushshaatu sagale shiqishannohona, qullaawa assitine kiirresi; qullaawoota asseemmo'nehu ani Kaaliiqi qullaawahona qullaawa assitine kiirresi.

⁹ Qeesichu beetto foorretenni galte hossannota ikkituro, annase shollishshanno daafira giirrona.

¹⁰ « ‹Roduuwisiwiinni bande zayite dunnoonnisihunna qeesimmate uddano uddi'ranno gede buurroonnihu qeesootu roorrichi shii'rinota leellishate dananchosi meexxoonke; woy uddanosi dadhoonke.

¹¹ Reeshshunniwa shiqoonke; annisi daafiranna amasi daafira umosi lageessoonke.

¹² Qullaawa Maganisi zayite aanasi noo daafira, Maganisiha Qullaawa Mine agure wi'la ha'roonke; hatto assiro, Qullaawa Mine'ya lageessanno. Ani Kaaliiqaati.

¹³ Isino seemo beetto adhona.

¹⁴ Ayiddaanna shiidhinota, gursumeette woy foorretenni galte hossannota adhoonkena ga'resi giddonni seemo beetto adhona.

¹⁵ Hoolloonnita adhe ga'resi giddo oososi lageessoonke. Iso qullaawa asseemmohu ani Kaaliiqaati› yite kulinsa» yii.

¹⁶ Kaaliiqi Musera qole,

¹⁷ «Aaroonira, ‹Dagganno ilamara sirchikki giddo muso afi'rino manchi, Maganisiha sagalete fushshaate shiqishoonke.

¹⁸ Illiweelu woy naafichu alba woy manninatu suude seyinokkihu woy manninatu giddo xe'ne afi'rinohu shiqishoonke.

¹⁹ Hattono anga woy lekka naafinohu,

²⁰ ukkichu woy magani-shiimu, illete woy bisoho ayi dhibba gogunniha afi'rinohu woy mureessu shiqishoonke.

²¹ Qeesichu Aarooni sirchinni, muso afi'rinohu mittu manchino Kaaliiqira shilqote kakkalo shiqishoonke; muso afi'rino daafira, Maganisiha sagalete fushshaate shiqishara dayonke.

²² Kayinnilla, qullaawanna lowo geeshsha qullaawa Maganisi sagale ita dandaanno.

²³ Muso afi'rino daafira, Qullaawa Mine'ya lageessannokki gede Qullaawu Holgi mule noo dukkowa shiqqi yoonke; woy kakkallanni dargira shiqqi yoonke. Qeesoota qullaawoota asseemmonsahu ani Kaaliiqaati› yite kulisi» yii.

²⁴ Museno konne seera Aaroonira, oososiranna Israeele baalate kulinsa.