LEEWAAWOOTA 19 - Qullaawa Maxaafa

ADDI ADDI SEERA

¹ Kaaliiqi Musera,

² «Israeelete manni baalunkura, ‹Ani Kaaliiqi Magani'ne Qullaawahona, ki'neno Qullaawoota ikke.

³ Mittu mittunku anna'nenna ama'ne ayirrisse; Fooliishshote Barra agadhe. Ani Kaaliiqi Magano'neeti.

⁴ «‹Kaphu magannawa alba higginoonte; woy daashshinoonni siwiillanni umi'nera maganna seekkidhinoonte. Ani Kaaliiqi Magano'neeti.

⁵ «‹Mittimmate kakkalo anera shiqishshinanni yannara, adheemmo gede kuloommo'ne seeri garinni shiqishshe.

⁶ Kakkalo shiqishshini barra woy layinki barra intona; sayikki barri geeshsha iillanno maala baalanka giirre hunnona.

⁷ Sayikki barra intiro battete; anino diadheemmo.

⁸ Sayikki barri geeshsha iillino maala itannohu baalu, anera uyinoonniha batteessinona xa'mamanno. Hakko manchino manni'ya ledo dikiiramanno.

⁹ «‹Baatto'nenni gide gamba assidhinanni yannara, jajji'nera qaccuwate nooha mudhitinoonte; qarmeno xinqidhinoonte.

¹⁰ Woyinete xaro xinqidhinoonte; giggilinohano xinqidhinoonte; buxanetenna wole gobba mannira agurrensa. Ani Kaaliiqi Magano'neeti.

¹¹ « ‹Moortinoonte; kaphitinoonte; mimmito'ne dogginoonte.

¹² « ‹Ane su'minni beebbatenni xaartinoonte; tennenni ane Magani'ne su'ma shollishshinoonte. Ani Kaaliiqaati.

¹³ « ‹Manna hanaaqqinoonte; gantine adhitinoonte; loosino'ne manchi hunkii ki'newa hashsha galoonke.

¹⁴ Macciweelo xontinoonte; illiweeloho albaanni sarraaqannore wortinoonte; Magano'ne waajje. Ani Kaaliiqaati.

¹⁵ « ‹Halaale dawissinoonte; buxichoho godowa hossinoonte; dureessa waajjitinoonte; manna taashshitine la'e.

¹⁶ Mannu su'ma hunate mannu mereero doyitinoonte. Affinoonnire kayinni maaxxinikkinni coyidhe. Ani Kaaliiqaati.

¹⁷ « ‹Rodii'nera koma amaddinoonte; barshesi beeqqitinannikki gede olliicho'ne bunshesira xawoho seejjesi.

¹⁸ Ayeno rabbissinoonte; woy koma amaddinoonte; manna umi'ne gede assitine baxxe. Ani Kaaliiqaati.

¹⁹ « ‹Woga'ya agadhe; fiixa xaaddinokki saada mimmitoho badhe sa'anno gede assitinoonte; mitto darga 2 dani gide wixidhinoonte; lamurinni gannoonni imaana uddidhinoonte.

²⁰ « ‹Mittu manchi woleho huuccinoonni borojjicho ledo siimu xaadooshshe assiro, hatti borojjichono wondoonnita woy wolaphitinota ikka hoogguro, mancho qorichinshona. Kayinnilla, beetto wolaphitinokkita ikkitino daafira lamenka dishinanni.

²¹ Manchu sao hoolate kakkalora ikkannoha mitto ge'rechu goco Kaaliiqira Xaadu Dukkani nafarira haa're abbona.

²² Qeesichuno sao hoolate kakkalo gocinni, manchu loosino saora Kaaliiqi albaanni saosi agursiisona; saosino agurantannosi.

²³ « ‹Kana"aani gobba iillitine aye haqqeno kaasidhiniro, baatto battaabbino daafira, 3 diri gedensaanni keeraa'mita geeshsha ise fushshitino laalcho ittinoonte.

²⁴ Shoolki diro laalo baala Kaaliiqira qullaawa galatu kakkalo ikkitanno.

²⁵ Ontikki diro kayinni, laalcho ittinanni; hatto assitiniro jajji'ne bati'ranno. Ani Kaaliiqi Magano'neeti.

²⁶ « ‹Mundee giddo noo maala mittono ittinoonte; kiiltinoonte; bitidhinoonte;

²⁷ umo qooxo mudhitinoonte; ereeda'neno haransidhinoonte.

²⁸ Reyino mannira biso bicidhinoonte; huduuxxitinoonte. Ani Kaaliiqaati.

²⁹ « ‹Meya beetto'ne hayyaatu mine baashaabbe shollitanno gede assitinoonte; hatto assitiniro ki'neno wole magannawa higginanni; baattoteno batte wo'mitanno.

³⁰ Fooliishshote Barra'ya agarre; Qullaawa Darga'yano ayirrisse. Ani Kaaliiqaati.

³¹ « ‹Battaabbinannina, ekera coyishshiishannoha woshshidhinoonte; qaallichunniwa hadhinoonte. Ani Kaaliiqi Magano'neeti.

³² « ‹Jawaho ka'ine darga uuyye; geerra ayirrisse; Magano'ne waajje. Ani Kaaliiqaati.

³³ « ‹Giddo'ne hee'rannoha wole gobba manna tulteessitinoonte.

³⁴ Giddo'ne hee'rannoha wole gobba manna fiixi'ne gede assitine la'e; umi'ne gede assitine baxxensa; ki'neno Gibitsete wole gobba manna ikkitine heedhinita qaagge. Ani Kaaliiqi Magano'neeti.

³⁵ « ‹Safaraasinchunni woy keenaasinchunni woy bikkaasinchunni manna hanaaqqinoonte.

³⁶ Halaalaanchu bikkaasinchi, halaalaanchu safaraasinchinna halaalaanchu keenaasinchi heero'ne. Gibitsete gobbanni fushshoommo'nehu ani Kaaliiqi Magano'neeti.

³⁷ Woga'yanna seera'ya baala agarre; wonshe. Ani Kaaliiqaati› yiino yite kulinsa» yii.