LEEWAAWOOTA 14 - Qullaawa Maxaafa

TARAAWANNO DHIBBI GOGUNNIHUNNI KEERAAWINOHU WONSHANNO SEERA

¹ Kaaliiqi Musera,

² «Mittu manchi taraawanno dhibbi gogunnihunni keeraawihu gedensaanni, wonsha hasiissannosi woga aante noote: Keeraa'masi egensiinsanni barra qeesichunniwa haa'ne abbineenna,

³ qeesichu qachaho gobbaanni xaade, manchu dhibbunni hurinoha ikkiro,

⁴ seeru garinni keeraabbinota 2 cea, daguchu sina, duumo fatilchonna garambichu darcho haa'ne abbinanni gede hajajona.

⁵ Hakkunni gedensaanni, qeesichu lamente cea giddonni mitticho haa're, xalalu buete wayi giddo noo uduunnichi bushshunnihu aana gorrinanni gede hajajona.

⁶ Qeesichu layinki ceichono haa're, daguchu sini, duumu fatilchinna garambichu darchi ledo mitteenni gorrini ceicho mundee giddo cuuona;

⁷ mundeeno taraawanno dhibbinni keeraa'manni noo manchi aana 7 hige wixona; hakkunni gedensaanni, keeraa'minota egensiise, gorrinikkinni gattino ceicho xawo qole buuwisona.

⁸ «Keeraa'mino manchi imaanasi hayishshi'rona; dananchosi baala raawe meexxona; bisosino hayishshi're, seeru garinni keeraa'minoha ikkanno. Hakkunni gedensaanni, qachu giddora ea dandaanno; ikkollana kayinni, 7 barri geeshsha hee'ranno dukkana eikkinni gobbaanni keeshshona.

⁹ Lamalki barra umo lede meexxe, ereeda, gaaranna bisisi aana noo danancho baalanka meexxona. Imaanasinna bisosino hayishshi're, keeraa'minoha ikkanno.

¹⁰ «Settikki barra, muso afidhinokkire 2 ge'rechu goccanna 1 diri ge'recho shiqishona; hattonni gidu fushshaatira, zayitetenni liinsoonnita 3 kiilo liiqo bulleenna 1 buttu'le zayite shiqishona.

¹¹ Qeesichuno manchonna abbino fushshaate haa're, Xaadu Dukkani nafarchira ane albira shiqishona.

¹² Hakkunni gedensaanni, qeesichu mitto goco haa're, buttu'lete zayite ledo sao hoolate fushshaate asse shiqishona. Konne fushshaate anera addiha asse shiqishoena.

¹³ Gocono, cubbu kakkaloranna shilqote kakkalora gorrinanniwa qullaawa darga masse gorrona; sao hoolate kakkalo cubbu kakkalo gede qeesichunnite. Tinino lowo geeshsha qullaawate.

¹⁴ Qeesichuno sao hoolate kakkalo aaninni shiima mundee haa're, keeraa'manni noo manchita qiniiticho macca qacce, qiniiticho angaha lowiidi qubbichonna lekkasiha lowiidi qubbicho kisiisona.

¹⁵ Qoleno shiima zayite haa're, guracho anga umisite hoowira worona.

¹⁶ Qiniitichu qubbichisinni mundee kisanni, ane albaanni 7 hige wixona.

¹⁷ Angasi hoowira noo zayitenni shiima haa're, seeru garinni keeraa'minota egenisiisate, sao hoolate kakkalo mundee assinte gede, manchunnita qiniiticho macca, qiniiticho angahanna qiniiticho lekkaha lowiidi qubbicho kisiisona.

¹⁸ Hoowisira gattino zayite, keeraa'manni noo manchi umi aana dunona. Kunni garinni qeesichu keeraa'mate seera ane albaanni wonshona.

¹⁹ «Hakkunni gedensaanni, qeesichu cubbu kakkalo shiqishona; manchuno lagotenni keeraa'manno gede assosina. Hakkiinni aanche shilqote kakkalo shiqishona.

²⁰ Shilqote kakkalonna gidu fushshaate mitteenni kakkallanni darga masse shilqishona. Hakkiinni, keeraa'mate seera wonsheenna manchuno keeraawanno.

²¹ «Manchu konne duucha shiqisha dandaannokkiha buxicho ikkiro, sao hoolate 1 ge'rechu goco, zayitetenni liinsoonnita 1 kiilo liiqo bullee gidu fushshaatira, 1 buttu'le zayite shiqishona.

²² Wolqasi assitu garinni 2 lemboolcho, woy 2 bukukkaama, 1 cubbo agursiisate, 1 shilqote kakkalora shiqishona.

²³ Settikki barra, mancho keereensinanni seera wonshinanniwa, kore baala Dukkanu nafarchira ane albira qeesichu haa're abbona.

²⁴ Qeesichuno sao hoolate kakkalora ge'rechu goconna buttu'lete zayite haa're, anera addi fushshaate asse shiqishona.

²⁵ Qeesichu sao hoolate kakkalora shiqino goco haa're gorrona; shiima mundee haa're, keeraa'manni noo manchita qiniiticho macca, qiniiticho angahanna qiniiticho lekkaha lowiidi qubbicho kisiisona.

²⁶ Zayitete aaninnino shiima haa're, guracho anga umisite hoowira dunona.

²⁷ Guracho angasi hoowira noo zayite qubbichunni kisanni, 7 hige ane albaanni wixona.

²⁸ Hakko mundee worri hoowi angasihura gattino zayite haa're, keeraa'manni noo manchita qiniiticho macca qacce, qiniiticho angasihanna qiniiticho lekkasiha lowiidi qubbicho kisiisona.

²⁹ Hoowisira gattino zayite, keeraa'manni noo manchi umira dunona; kunni garinni qeesichu keeraa'mate seera ane albaanni wonshona.

³⁰ Hakkunni gedensaanni, qeesichu manchu wolqasi deerrinni shiqishi'rinoha lemboolcho woy bukukkaama kakkalona.

³¹ Insa giddonni mitto cubbu kakkalora, layinkiha shilqote kakkalora gidu fushshaati ledo shiqishona. Kunni garinni qeesichu manchoho keeraa'mate seera ane albaanni wonshona.

³² Kuni taraawanno dhibbi gogunnihu noosi manchi, keeraa'mate seera wonshate shiqishi'rannori koreeti» yiisi.

MINE TARAAWANNO DHIBBINNI KEEREENSINANNI GARA

³³ Kaaliiqi Museranna Aaroonira,

³⁴ «Ani ragisiiseemmo'neta Kana"aani gobba e'inanni yannara, ani woroommoha taraawanno dhibba mitto mine affiniro,

³⁵ kuni dhibbi minisi giddo leellino manchi, ‹Mine'ya taraawanno dhibbi nooha lawinoe› yee mare qeesichaho kulona.

³⁶ Qeesichuno mine noo uduunni baalu lagaawannokki gede, kuni dhibbi noo minira eara albaanni, uduunne baala gobbara fushshinanni gede assona. Hakkunni gedensaanni e"e laona.

³⁷ Dhibbu hiittoohoro laeenna, haanjanna duumo ikke xarra itanni noota afiha ikkiro,

³⁸ qeesichu mine 7 barra cufona;

³⁹ lamalki barra galagale mare, dhibbu hala'linota afiro,

⁴⁰ dhibbu kisino kinna baala fushshine, katamu gobbaanni langoonni basera massine hunnanni gede assona.

⁴¹ Giddoonni xarra amadinore baala soonfe hoolle, katamu gobbaanni langoonni basera massine hunnona.

⁴² Kinna fushshine hoolloonni darga wole kinna worre, xarrate aaninni hoolloonniri darga wolere gannona.

⁴³ Amadantino kinna hoolle haaro worrihu gedensaanni, xaano kunni dhibbi malaati leelliha ikkironna,

⁴⁴ qeesichu mare mine laeenna, taraawanno dhibbi minu giddo hala'linoha ikkiro, gawajjanno dhibba ikkino daafira, minu lagaawinoho.

⁴⁵ Kunni daafira mine diinge kinna, xarra, dawaayyenna aanaho dimboonnire baala massine katamu gobbaanni ishine tunganniwa hunnona.

⁴⁶ «Hakkonne mine cunfe hee'neenna mare eannohu hawarra geeshsha lagaawinoho.

⁴⁷ Hakko mine goxinohu woy sagale itinohu imaanasi hayishshi'rona.

⁴⁸ «Haaroonsinihu gedensaanni qeesichu e"e laeenna, minu giddo kuni dhibbi galagale kainokkiha ikkiro, minu keeraa'minota egensiisona.

⁴⁹ Mine keereensate 2 ceicho, daguchote sina, duumo fatilchonna garambichu darcho shiqinshona.

⁵⁰ Mitte ceicho xalala buete waa worroonni uduunnichi bushshunnihu aana gorrona.

⁵¹ Daguchote sina, garambichu darchonna duumo fatilcho lubbotenni noo ceicho ledo haa're, gorrino ceicho mundeenna xalalu wayi giddo cuue, minu aana 7 hige wixona.

⁵² Mineno gorrino ceicho mundeenni, xalalu wayinni, lubbotenni noo ceichonni, daguchote sininninna garambichu darchinni keeraa'manno gede assona.

⁵³ Lubbotenni noo ceicho xawo qole buuwisona. Kunni garinni hakku lagaawino mini keeraawanno seera wonshanno; minuno keeraa'minoha ikkanno.

⁵⁴ «Taraawanno dhibbi baalu daafira wonshinanni seeri konneeti.

⁵⁵ Konne seera uyinoonnihu, imaanunna minu aana fulannohu taraawanno dhibbi,

⁵⁶ qoleno darshe, hafuru woy baararrete daafiraati.

⁵⁷ Kuni keeraa'minohanna keeraa'minokkiha bandanni seeraati» yii.