LEEWAAWOOTA 11 - Qullaawa Maxaafa

INTANNI SAADANNA INTANNIKKI SAADA

¹ Kaaliiqi Museranna Aaroonira,

² «Israeelete mannira, ‹Uullate aana noo saada baalate giddonni,

³ culunqa dadhantinotanna haancidhanno saada baala ita dandiitinanni.

^4-6 «‹Kayinnilla gaala, weceecenna hilleessa ittinoonte; haancidhannore ikkituro nafa, culunqansa dadhantinokki daafira, ki'nera battete.

⁷ Manchaameno culunqa dadhantinota ikkituro nafa, haancidhannokki daafira ita dihasiissanno'ne.

⁸ Tenne saada maala ittinoonte; ki'nera batte ikkino daafira, tenne saadaha reeshshansa nafa kissinoonte.

⁹ «‹Qoolanna aaniidi goga afidhinore wayi giddo heedhanno saada baala ita dandiitinanni;

¹⁰ ikkollana, wayi giddo heedhannori qoolanna aaniidi goga afidhinokki saada battetena ittinoonte.

¹¹ Hatti saada ki'nera batte ikkitino daafira, maalansa ittinoonte; reeshshansa nafa angatenni kissinoonte.

¹² Wayi giddo heedhannoti qoolunna aaniidi gogi noonsakki saada baala ki'nera battete.

^13-19 «‹Ceate giddonni kunni woroonni noori battetena ittinoonte. Tini ceano: Allamurcho, awulcho, risa, billawe risa, doowiro, allaatte, haraqeessa, balguda, waa-lixe, abbaa-kodda, bajja, baate, qulxu'me itanno doowircho, guuti-wobbootinna rarraattete.

²⁰ «‹Qoolanna lekka afi'rino duuxi baalu ki'nera battete.

²¹ Ikkollana kayinni, qoolanna lekka afi'rinore uulla kubbanni ha'rannore ita dandiitinanni.

²² Kurino: Magani-farashshoho, koro'miisahonna kanchafaru fiixa baalaho.

²³ Ikkollana, qoolanna lekka afi'rino duuxi baalu ki'nera battete.

^24-28 «‹Kunni woroonni noori reeshsha kisannohu baalu, hawarra geeshsha lagaawanno. Shoole lekka afi're hee'renni, hoowunni ha'rannori culunqa dadhaminokkirinna haanci'rannokkiri baalu, ki'nera battete. Reyiteenna kore duhannohu baalu, imaanasi hayishshi'rona; ikkirono hawarra geeshsha lagaawinoha ikkanno.

^29-30 «‹Baattote gamba yee ha'rannori: Futahu, yemahu, ajo, danda'le, qarco, hamasaama, ki'nera battetena ittinoonte.

³¹ Kuri reeshsha kisannohu baalu, hawarra geeshsha lagaawinoho.

³² Hakkuri reeshshi aye uduunnichi aanano uwiro, hakko uduunni haqqunniha ikko, imaana, goga, woy dooniyyano ikkiro wayinni hayishshine fushshineenna, hawarra geeshsha lagaawinoha ikko.

³³ Reeshshinsa bushshu uduunni aana uwiro, giddosi noorichi lagaawanno daafira, uduunnicho hiiqqitine hunne.

³⁴ Hakkunni uduunnichi giddo noo wayi sagalete aana du'namiro, hatti sagale lagaabbinote; hakko uduunnichi giddo noori anganniri baalu lagaawinoho.

³⁵ Kuri reeshshi aanaho uwino baccichi lagaawanno daafira, hiiqqitine hunne.

³⁶ Ikkollana, kuri giddo reyino buicho woy kofo dilagaabbanno; reeshshansa kisannori baalu kayinni lagaawanno.

³⁷ Reeshshinsa winxanni gumi aana uwiro, wixu gumi dilagaawanno.

³⁸ Ikkollana kayinni, reeshshansa wayi giddo worroonni gumi ledo anfiro, hakku gumi lagaawinoho.

³⁹ «‹Intanni saada reeshsha kisinohu nafa, hawarra geeshsha lagaawinoho.

⁴⁰ Aye manchino reyitino saada maala itironna duhiro, imaanasi hayishshi'rona; ikkirono hawarra geeshsha lagaawinoho.

^41-42 «‹Baattote gamba yee ha'rannohu lekka afi'rinohunna lekka afi'rinokkihu shiimmaaddu kalaqami baalu ki'nera battetena ittinoonte.

⁴³ Kore ittine umo'ne lageessitinoonte.

⁴⁴ Ani Kaaliiqi Magani'ne qullaawahona, ki'neno qullaawoota ikke; baattote gamba yee ha'rannore itatenni umo'ne lageessitinoonte.

⁴⁵ Magano'ne ikkammora Gibitsetenni fushshe abboommo'nehu ani Kaaliiqaati. Kunnira, ani qullaawa ikkoommonte gede, ki'neno qullaawoota ikke.

^46-47 «‹Kuni seeri jajjabba saada, cea, baattote gamba yee ha'rannorinna wayi giddo hee'ranno kalaqami baalu daafira uyinoonniho. Kunni daafira, intannihunna intannikkihu batte ikkinohunna batte ikkinokkihu maatiro baddine affe› yiino yitine kullensa» yii.