LAYINKI YOHAANNISI 1 - Qullaawa Maxaafa

YOHAANNISI SOYINO KEERE

¹ Ani geerchu, doorantino ayirradoranna oososera, soommo sokka tenneeti; ani halaalunni baxeemmo'ne; ane calla ikkummokkinni halaale egentinori baalu baxxanno'ne.

² Kuni halaali giddonke noohonna albillitteno hegere geeshsha ledonke hee'rannoho.

³ Maganu Annunnitinna Beettisi Yesuusi Kiristoosi elto, maaronna keeru, halaalunninna baxillunni ninke ledo hee'ro.

HALAALENNA BAXILLE

⁴ Oosokki giddonni mitu mitu, Maganu Annu hajajinonke garinni halaalaancho heeshsho heedhanni noota afe lowo geeshsha hagiidhoommo.

⁵ Xaano ayirrado'ya! Borreesseemmohe hajajo haaro ikkitukkinni albanni ninkewa noo hajajooti; iseno, «Mimmitinke ledo baxammo» yitannote.

⁶ Halaalaancho baxilleeti yaa Maganu hajajo wonshate; tini hajajono alba macciishshitinoonninte gede, «Baxillunni heedhe» yitannote.

⁷ Yesuusi Kiristoosi manna ikke dayinota ammantannokkiri lowo so'risiisaano ka'e no; kuri so'risiisaanotenna Kiristoosa qoxxissannoreeti.

⁸ Ki'ne kayinni daafuri'neha wo'ma waaga afidhinanni gede ikkinnina, loosidhinoonnihu ba"anno'nekki gede qorophe.

⁹ Kiristoosi rosiisino garinni hee'rannokkihuranna isiwiinni xeerti'rannohura Maganu dinosi; Kiristoosi rosiisino garinni hee'rannohura Maganu Annunna Beettu noosi.

¹⁰ Konne roso haa'rikkinni ki'newa daannoha mini'nera koyisidhinoonte; keere nafa haadhinoonte.

¹¹ Hattooha keere haa'rannohu busha loososi gutamanno.

JEEFOTE KEERE

¹² Borreessammo'nera hasi'reemmohu lowo coyi nooe; ikkollana baalankare borreesse soyammo'nera dihasi'reemmo; roorenka hagiirrinke guuta ikkanno gede ki'newa dayenna xaande hasaambammora hexxo assi'roommo.

¹³ Doorantinori rodookki ooso keere dhaantinohe.