LAYINKI XIMOOTEWOOSI 4 - Qullaawa Maxaafa

¹ Maganunna nooriranna reyitinorira yoo yaara gashshootisinni daannohu Mootichu Yesuusi Kiristoosi albaanni, tenne eeggo eemmohe.

² Qaale kuli; injiiherono injaa hoogiherono wo'manka woyite jawaatte loosi. Xawisse kultanni, hayi yitanninna seejjitanni, cincatenninna rosiisatenni jawaati.

³ Mannu, heeshsho aanno coye kulleenna macciishsha giwanno yanna dagganno. Insa halchitanno coye rosiissannonsare gamba assidhanno.

⁴ Kunnira, halaale agurte, maatto macciishsha baxxanno.

⁵ Ati kayinni baalunku coyinni atenee seekkite agadhi. Cincite qarra adhi; Dancha Duduwo kula loosokki assi'ri; soqqanshokki baala wonshi.

⁶ Ani kayinni kakkalamammora mule noommo; tenne gobba agure ha'reemmo yannano iillitino.

⁷ Ola danchu garinni olamoommo; qolchansho'yara goofimarchu geeshsha dodoommo; ammana'yano agadhoommo.

⁸ Xaate kunni ka'a, keeraanchimmate ba'latto agarte nooe; tenne ba'latto halaalaancho yoo yaanno Mootichi hakko barra aannoe. Aannohuno ane callaho ikkikkinni, isi daa baxxannorira baalahooti.

PHAAWULOOSI DHAANSA

⁹ Rakke anewa amo!

¹⁰ Deemaasi tenne gobba baxe, ane agure Teselonqe ha'rino. Qirqiisi Galatiya, Tiitono Dilimaaxiya ha'rino.

¹¹ Ane ledo Luqaasi callu no. Maarqoosi soqqanshote kaa'lannoe daafira hasse haadhe abbie.

¹² Tikiqoosi kayinni Efesooni soommo.

¹³ Daatto woyite, Xiroaada Karphusiwa wore dayommota aanaanni ga'ninanni uddanonna maxaaffa wolunkunni roore xaaxamino gogi maxaafa haadhe abbie.

¹⁴ Camote siwiila tumannohu Isikindiri lowo geeshsha miicinoe; Mootichu loosisita aannosi.

¹⁵ Isi ninke coyi'neemmo coye lowo geeshsha giwanno daafira seekkite agadhi.

¹⁶ Bushiinshoonnie coyira dawaro qolate shiqummo yannara, baalunku agurte hadhinoe ikkinnina ane ledo uurre kaa'linoehu dino. Konneno Maganu saote kiiroonkensa.

¹⁷ Ikkollana ani sokka wonshe kuleenna daga baala macciishshitanno gede Mootichu ledo'ya hee're jawaachishinoe. Doobbiichu afiinnino gatoommo.

¹⁸ Mootichu bushu coyi baaluwiinni gatisannoe. Gordoho noo gashshootisiwano iillishannoe. Isira hegerenni hegere geeshsha ayirrinyu ikkosi! Hamii'ni.

JEEFOTE KEERE

¹⁹ Phirisqillaranna Aqiilara, Henesforimi mini mannirano keere iillishie.

²⁰ Erisxoosi Qorontoosi gatino. Xirofimoosi kayinni dhiwameenna Miliixi agure dayommo.

²¹ Hawadu dayikkinni anewa amo. Ewubuloosi, Phudeesi, Liinoosi, Qilawudiyanna ammanaano baala keere dhaantinohe.

²² Mootichu, ayyaanikki ledo hee'ro. Maganu elto ledo'ne heedho.