LAYINKI XIMOOTEWOOSI 3 - Qullaawa Maxaafa

GOOFIMARCHU YANNARA IKKANNO COYE

¹ Goofimarchu barra qarrissanno yanna daggannota afi.

² Mannu umosi baxannoha, woxe baxannoha, naaxxaleessa, boonaleessa, xonamaancho, iltinonsarira hajajamannokkiha, galata afi'rinokkiha, qullaawa heeshsho afi'rinokkiha,

³ baxillu nookkiha, araara giwannoha, hemaancho, umosi qee'linokkiha, mararro afi'rinokkiha, danchumma giwannoha,

⁴ yiinowa hosannokkiha, muddamaasincho, boo'natenni ufuufaminoha, Maganunni roorse qiniitesi baxannoha ikkanno.

⁵ Magano Magansi'rannoha lawanno; maganimmate wolqa kayinni diammaninoho. Hattoo manniwiinni xooqi.

⁶ Hattoo manni, minnatenni minna sa"anni, cubbu bati'rinorenna addi addi yorto hoode ha'rannoha laafa meento woshshaadanno.

⁷ Kunni meentira wo'manka woyite kullanni; insa kayinni halaale buuxa didandaanno.

⁸ Iyyaaneesinna Iyyaanibereesi Muse qoxxissunte gede, kuni manni wodana soorraminohanna ammana anganni ba'inoha ikkino daafira halaale giwanno.

⁹ Iyyaaneesinna Iyyaanibereesi gowwimma xawo fultunte gede, kunni manni gowwimmano mannaho leeltanno daafira diqinaannonsa.

GOOFIMARCHU SEEJJO

¹⁰ Ati kayinni roso'ya, hee'reemmo gara, hedo'ya, ammana'ya, cinca'ya, baxille'ya, noommowa kaajja'ya ha'runsootto.

¹¹ Xiiwama'yanna qarrama'ya afootto; Antsookiyaho, Iqooniyooninna Lisxiraani iillinoerenna cincoommo xiiwama afootto. Mootichu kayinni baalunkurinni gatisinoe.

¹² Kiristoosi Yesuusinni maganittete heeshsho hee'ra hasi'ranno baali xiiwamanno.

¹³ Bushunna awaawuraanchu manni kayinni wole so'risiissanninna insano sodhanni bunshete aana bunshe leddanno.

¹⁴ Ati kayinni ayi rosiisinohero afoottona, rosoottohunninna afootto halaalinni kaajjite hee'ri.

¹⁵ Anjekkinni kayisse Kiristoosa Yesuusa ammanatenni, gato afi'nanni roso uyitannota Qullaawa Borrono afootto.

¹⁶ Qullaawa Borro baala Maganunnihu Qullaawu Ayyaani kulanna borreessinoonnite. Tini borro halaale rosiisate, sodhinore seejjate, so'ro hoolatenna halaalaancho heeshshora ikkanno biddishsha aate kaa'litanno.

¹⁷ Qolteno, Maganu manchi guuta ikkanno gedenna dancha coye assate qixxaawinoha ikkanno gede kaa'litanno.