LAYINKI SAAMUEELI 6 - Qullaawa Maxaafa

GONDOORU TAABOOTA ABINAADAABI MININNI HAA'NE YERUSAALAME ABBINI

¹ Daawiti galagale Israeelete giddonni doorantinore 30,000 olanto geeshsha gamba assi.

² Konne mannano ayirrinyu barcimisi kirubeeli iimaanni noohunniha Olantote Mootichi Kaaliiqiha Maganu su'ma woshshinanniha Maganu Taaboota abbitanno gede Yihudu gobba Ba"aala yinanniwa haa're ha'ri.

³ Maganunniha Gondooru Taaboota haaro faradi gaarera hogobbe gaaru aana noohu Abinaadaabi mininni haadhe abbitu. Abinaadaabi ooso Oozanna Ahiyo haaro faradi gaare gante haadhe hadhu.

⁴ Gondooru Taaboota Abinaadaabi mininni abbitu yannara, Ahiyo albaanni hige ha'ranni no.

⁵ Daawitinna Israeelete manni baalu bagana, maasinqo, dibbe, tsenaatsilenna bilbila gananni Kaaliiqi albaanni wo'ma wolqanni faarsanninna kubbanni ha'ri.

⁶ Naakooni ayiddummewa iillitu yannara kayinni, gaare goshooshshanni noo bootta gaggabbino daafira Ooza Gondooru Taaboota hiixate angatenni amadi.

⁷ Hatto assasinni Magano seyatino daafira, Maganu Kaaliiqi lowo geeshsha hanqe qoomisi. Oozano hakko Taabooti mule reyi.

⁸ Kaaliiqi Ooza qoomino daafira Daawiti hanqi. Kunnira hakkonne darga techo geeshsha, «Faareesi Ooza» yinanni.

⁹ Hakko barra Daawiti Kaaliiqa waajje, «Tini nooha ikkiro Gondooru Taaboota hiissammora haa're ha'reemmoyya?» yii.

¹⁰ Kunnira Kaaliiqi Taaboota Yerusaalame haa're ha'ra agure, Gaati Katamira noohuwa Abidaara minira massi.

¹¹ Kaaliiqi Taabooti Abidaara mine 3 agana keeshshino. Kaaliiqino Abidaaranna maatesi maassi'ri.

¹² Gondooru Taabooti daafira Kaaliiqi Abidaara maatenna afi'rinore baala maassi'rinota moote Daawiti macciishshi. Daawitino mare Maganu Taaboota Abidaara mininni lowo hagiirrinni haa're Yerusaalame abbi.

¹³ Gondooru Taaboota duhino manni 6 qaafo qaafihu gedensaanni, Daawiti taxxi asse mitto bootonna mitto hardino siito Kaaliiqira kakkali.

¹⁴ Daawiti shaalado shalonni gannoonnita qeesimmate uddano halloho xaaxi're, wo'ma wolqasinni Kaaliiqi albaanni qeexaa'li.

¹⁵ Daawitinna Israeelete manni baalu qeexaa'lanni buudu xurumba ufuufanni Kaaliiqi Taaboota haa're abbi.

¹⁶ Kaaliiqi Taabooti Daawiti Katama ei yannara, Saaooli beetto Melkooli masikootete giddoonni qolte la'anni no. La'anno woyite moote Daawiti Kaaliiqi albaanni kubbanni qeexaa'lanni noota affe wodanisenni mishshusi.

¹⁷ Kaaliiqi Taabootano massine Daawiti qasino dukkani qullaawu giddo qixxeessinoonni darga worri. Daawitino Kaaliiqira shilqonnitanna mittimmate kakkalo shiqishi.

¹⁸ Daawiti shilqonnitanna mittimmate kakkalo shiqishihu gedensaanni, mannasi Olantote Mootichi Kaaliiqi su'minni maassi'ri.

¹⁹ Mannu baalunkura meya labbaahura mitto mitto tima, mitte mitte maalu gumanna, mitte mitte woyinete hunduruurro beehinsa. Hakkunni gedensaanni mannu baalunku mini minisira ha'ri.

²⁰ Daawitino minisi manni keere afara minisira ha'ri. Saaooli beetto Melkoolino Daawiti haadhara fulte, «Ati techolla diayirritto! Soqqamaanokki borojji albaanni wodana shotu manchi gede teedakki mulqidhe kubbitto?» yitusi.

²¹ Daawitino Melkoolira, «Ani qeexaa'loommohu mannisira Israeelete albisa assaera annikkinna minisi manni darga doorinoe Kaaliiqi ayirrinyiraati. Xaano ikkiro isi ayirrinyira kubba diagureemmo.

²² Kawiinni roorse anenee shollisheemmo. Atera sholloommoha lawiherono, ‹Shotu manchi gede ikkootto› yiittae seenni albaanni ayirrado ikkeemmo» yiise.

²³ Kunninni kainohunni Saaooli beetto Melkooli ila afidhukkinni reyitino.