LAYINKI SAAMUEELI 21 - Qullaawa Maxaafa

SAAOOLI ILAMA IKKITINORE SHINI

¹ Daawiti gashshe noo yannara, 3 diro wo'ma gobbate aana jawaata hude ubbu. Daawitino tenne hajara Magano mala xa'mi'ri. Maganuno, «Saaoolinna minisi manni Gebaooni manna shiinohura sao minesi no» yii.

² Mooteno Gebaooni manna woshshi. (Insa Amooraawootuwiinni baxxite gattinoreeti ikkinnina Israeelete manni ga're di"ikkitino. Israeelete manni kaa'lansara xaarino; Saaooli kayinni Israeeletenna Yihudu mannira giwisi're gudansara kaino.)

³ Daawitino, «Kaaliiqi doodhino manna maassidhinanni gede maricho asso'ne? Kunni albaanni assinoonni'ne beebbara maricho asso'ne?» yee xa'minsa.

⁴ Insano, «Ninkera Saaoolinna maatesi ledo noonke gibbo birrunna culkunni gundannita di"ikkitino. Israeelete ga're giddonni ninke mittono shinammora dihasi'noommo» yitusi. Daawitino, «Maahoyye, ma"assammo'nera hasidhinanniyya?» yiinsa.

⁵ Insano mootete, «Saaooli ninke giddonni mittu nafa tenne Israeelete gobbara mittowano hee'rannokki gede hunankera hedino.

⁶ Kunnira, Saaooli ilama ikkitinore 7 labballo uyinke. Ninkeno insa massine Kaaliiqi doorino mootera Saaooli gobbara Gibia Kaaliiqi albaanni sunteemmo» yitusi. Mooteno, «Maahoyye eemmo'ne» yii.

⁷ Ikkollana moote Saaooli beetti Yoonaataani ledo Kaaliiqi albaanni eino gondoori daafira, Yoonaataani beetto Memfeboste sayise diuyino.

⁸ Aya beetto Ritsifa Saaoolira iltinore lamenka labballi ooso Armooninna Memfeboste haa're, Saaooli beetto Meraabi Meholani ilama ikkinohura Barzilayi beettira Adirieelira iltinore 5 labballi ooso lede haa'ri.

⁹ Daawiti insa sayise Gebaooni mannira uyi. Gebaooni mannino insa haa're masse Kaaliiqi albaanni ilaalu aana suti; lamalunku mitteenni reyitu. Insa shinoonnihu gide gamba assinanni aganira hayixe murranni yannaraati.

¹⁰ Hakkunni gedensaanni Saaooliti irkote galte Aya beetto Ritsifa xiddu imaana kinchu aana kadhite oosote reeshshi noowa marte ofoltu; arrinni kayisse hawadi geeshsha hakkiicho keeshshitu. Reeshsha barra cea, hashsha moyichu itannokki gede seekkite agartu.

¹¹ Daawiti Saaooliti irkote galte Ritsifa assitinore macciishshe,

¹² Yabiisi manni hee'rannowa Geleaadi gobba mare Saaoolinna beettisi Yoonaataani miqqa haa'ri. (Tenne miqqa alba Yabiisi manni Filisxeemootu Saaooli Gilboa shite suttinowiinni Beeteshaani Gudumaalinni maaxante haadhino.)

¹³ Daawitino Saaoolitanna beettisi Yoonaataani miqqa haa'rihu gedensaanni lamalanka sutame noo manni reeshsha mittowa gamba assi.

¹⁴ Hakkunni gedensaanni Saaoolitanna beettisi Yoonaataani miqqa haa'ne ha'ne moote hajajino garinni Biiniyaami gobbara Seelai yinanniwa Saaooli anni Qiisi waammara madaarri. Kuni baalu ikkihu gedensaanni, mannu gobbansa daafira huucci'rino huuccatto Maganu macciishshi.

FILISXEEMETE AGOODAAMMI LEDO OLA

¹⁵ Filisxeemetenna Israeelete mereero kainohu wolu olino no. Kunnira, Daawitinna ledosi manni hadhe Filisxeemoota qassu. Kunni oli giddo Daawiti daafuru amadisi.

¹⁶ Rayimi ga'rehu Yushibibenoobi yinannihu mittu haxiriggu manchi 3 kiilonna darate keentanno camonni seekkinoonnita haaro urde amaxxe daye Daawiti shaara hedi.

¹⁷ Ikkollona Tseruya beetti Abisi Daawiti kaa'lara daye noo daafira, hakkonne haxirigga Filisxeemicha shii. Hakkunni gedensaanni ledosi noo manni Daawiti, «Ati Israeelete manni hexxannohehona, ninke ate hoongammora hasi'neemmokki daafira layinkimeeshsho ninke ledo olaho fultooti» yiisi.

¹⁸ Hakkunni gedensaanni Goobi yinanni darga Filisxeemete ledo wole ola olantu. Hatte yannara, Hushi qachihu Sibekayi Saafi yinanniha haxirigga mancho shii.

¹⁹ Qoleno Goobi yinanniwa Filisxeemete ledo wolu oli kai. Hatte yannara, Beetelihemete ilaminohu Yaiiri beetti Elihanaani, Gaati ilama ikkinoha wenenchu geeshshi daabbira worroonni urde amaxxinoha wole Gooliyaadi yinanni Filisxeemicha shii.

²⁰ Hakkunni gedensaanni Gaati xaano wolu oli kai. Hakkiicho ola baxannohu mittu agoodaamu manchi no. Kunni manchira angasiranna lekkasira lee lee mitteenni lemiina shoole qubbe noosi. Ilaminohuno Refayimi ga're giddooti.

²¹ Kuni manchi Israeelete manna mishe arrassino. Ikkollana iso Daawiti rodii Saami beetti Yoonaataani shiino.

²² Kuni shoolunku manni Gaati haxiriggootaati. Insa baalanka Daawitinna olantosi shitino.