LAYINKI SAAMUEELI 20 - Qullaawa Maxaafa

SAABA LOOSINO BUNSHE

¹ Hakko Galgalaho mittu Saaba yinannihu yawaawulu manchi no. Annisi Bikiriiti; ilamasi Biiniyaami ga'reeti. Saaba, «Daawiti ledo noonkeri dino. Isseyi beetti ledo mayi xaadi noonke? Israeelete manni baalunku mini'nera higge!» yaanni buudu xurumba ufuufi.

² Israeelete manni baalunku Daawiti agure Bikiri beetti Saaba hoode ha'ri. Yihudu manni kayinni Yordaanoosinni kayise Yerusaalame iilla geeshsha mootensa hoode ha'ri.

³ Daawitino Yerusaalame minisira dayi. Mootete mine agarara wore ha'rinore tonnenta irkote meentosi agaraanchisi anga wori; hasiisannonsare uyinanninsa gede hajaji. Ikkollana insa ledo dixaadino. Insano reya geeshsha mininni fulannokkiha gunnimmatenni hee'ri.

⁴ Hakkunni gedensaanni moote Amaasara, «Kunni 3 barri giddo Yihudu manni baalu gamba yee anewa daanno gede assi; atino gattootina amo» yiisi.

⁵ Amaasano Yihudu manna baala woshshara ha'ri. Ikkollana moote yiino barrinni dihigino.

⁶ Daawiti Abisa, «Kune Bikiri beetti Saaba Abeseloominni roore gawajjankeraati. Qiinshoonni katamma e"e amade angankenni luxuphannokki gede olanto'ya anga adhite marte faana gani» yiisi.

⁷ Kunnira Abisa Iyoaabi olanto, mootete muli agaraasinenna wole egennantino olanto gamba assi're, Yerusaalametenni fule Saaba faana gani.

⁸ Gebaooni noohuwa lowo kinchiwa iillitu yannara, Amaasa insa ledo xaadara dayi. Iyoaabino olu imaana uddi're, bise kou giddo wore qodhe olaho qixxaawe no. Alba hige ha'ranni hee'reenna bisesi kou giddonni fulte ubbu.

⁹ Iyoaabi Amaasa, «Rodoo'ya keere nootto?» yee, sunqannoha lawe qiniiticho anganni ereedasi amadi.

¹⁰ Amaasa kayinni Iyoaabi anga bise adhe noota afinokki daafira diqorophino. Kunnira, Iyoaabi godowasi qase hellee duni; mitte qasanni reyino daafira layinkimeeshsho diledino. Hakkunni gedensaanni Iyoaabinna rodiisi Abisa Saaba faana gantu.

¹¹ Iyoaabi olanto giddonni mittu Amaasa reeshshi mule uurre, «Iyoaabi mannino Daawitihuno Iyoaabi hoode ha'ro» yaanni lallawi.

¹² Amaasa reeshshi mundeetenni dana bae doogote mereero diriire no. Hakku manchino olanto baala uurrite la'anna afe, doogote aaninni goshooshe hoole loosu giddora eesse aanaho uddano diwi.

¹³ Reeshshu doogote aaninni ho'lihu gedensaanni, olanto baala Saaba faana gantara Iyoaabi hoode hadhu.

¹⁴ Saaba kayinni Israeelete ga're baala sae ha're Abeeli-Beeti-Maaka yinanni katama iilli. Bikiri ayidde ikkino manni baalu gamba yee Saaba hoode katama ei.

¹⁵ Iyoaabi olanto Saaba hakko noota affe, marte katama doyissite amaddu. Gobbaanni qolte huxxaho aanchite bushsha duunte dirima seekkituhu gedensaanni huxxa gante dhoosa hanaffu.

¹⁶ Hakko katamira heedhannoti mitte egennaame mancho huxxu aana uurrite qoonqose naggi assite, «Hanni mitte higgine macciishshe! Kuleemmasiri noona Iyoaabino woshshe"e» yitu.

¹⁷ Iyoaabino kae isewa mari. Iseno, «Iyoaabi yinannihu ateetini?» yite xa'mitusi. Isino, «Ee aneeti» yee dawarise. Iseno, «Mooticha'ya hanni ani soqqamaanchokki kuleemmahere macciishshie» yitusi. Isino, «Maahoyye macciishsheemmona kuliexa» yiise.

¹⁸ Iseno, «Bi're albi yannara, ‹Xa'mo'nera dawaro afi'rate Abeeli Katama hadhe› yinanni. Mannuno yinoonni gede assanno.

¹⁹ Kuni kataminke wo'munku katamira aliidiho; Israeelete giddo keeraanchimmanna halaalu wo'mino katami konneeti. Ati konne katama diigate mayira heditto? Kaaliiqiricho hunate mayira hasi'ritto?» yitusi.

²⁰ Iyoaabino, «Ani katama'ne didiigeemmo! Horonta dihuneemmo!

²¹ Ninke hedo konne katama diigate ikkikkinni, Ilaalaame Efireemi gobbahu Bikiri beetti Saaba, Moote Daawiti aana busha malino daafira iso hanseetina, ki'ne isolla sayissine uyitiniero, katama'ne agure ha'reemmo» yee dawarise. Manchono Iyoaabira, «Umosi murre kinchu huxxi aanaanni qolle tungeemmohena agari» yitusi.

²² Tenne hedono haadhe mannunniwa martu. Mannuno yitinota macciishshe Saaba umo mure huxxu aanaanni qole Iyoaabira tugi. Iyoaabino mannu katama agure higanno gede buudu xurumba ufuufi. Mannu baalunku katamunni agure hige, qae qaesi ha'ri. Iyoaabino mootenniwa Yerusaalame higi.

DAAWITI LEDO GASHSHAANO

²³ Iyoaabi Israeelete olanto baalate hajajaancho ikkita, Yoodahe beetti Beenaya kayinni Daawitira gamba yitino agaraasinera roorricha ikki.

²⁴ Adooniraamino wolqatenni loosiinsannirira hajajaancho ikki. Ahiluudi beetti Iyosaafiixino dhagge borreessannoho.

²⁵ Suusano gashshootu mini borreessaanchooti. Saadooqinna Abiyaataarino qeesootaho.

²⁶ Hattonni Iyaiiri Katami mancho ikkinohu Iiri qole Daawiti qeesooti giddonni mittoho.