LAYINKI SAAMUEELI 19 - Qullaawa Maxaafa

IYOAABI DAAWITI ABBOOSHSHI'RI

¹ Iyoaabino moote Abeseloomira wi'linotanna dadillinota macciishshi.

² Hattono, moote beettisi reyino daafira wi'lanni noota olanto baalanti macciishshiteenna hakko barrihu qeellete hagiirri dadilleho soorrami.

³ Olantono ola xooqe dayino manni gede ikkite huuro maaxidhe sununni ikkite katama e'u.

⁴ Mooteno albasi diphe, qoonqosi naggi asse, «Beetto'ya! Beetto'ya Abeseloomi! Abeseloomi beetto'ya!» yaanni wi'li.

⁵ Iyoaabino mootenniwa e"e, «Techo ate, oosokkinna seennekki, galtekki ikkinorenna irkote meentokki reyotenni gatisino manna saalfachishootto.

⁶ Ati gibbannohere baxatto; baxxannohere giwatto. Olu hajajaanoranna olantokki baalate mitii'mattokkiha ikkoottota leellishootto. Abeseloomi gateenna ninke baalunku goonfoommoro giwattokkita afoommo.

⁷ Xa ka'e olantokki jawaachishi. Giwittoro kayinni Kaaliiqi afanna, ga'a soodo ledokki mittuno dihee'ranno. Hatte yannara xaa geeshsha iillinohe qarrinni roore bushshannohe» yiisi.

⁸ Mooteno noowiinni kae katamu huxxi waalchi mule mare ofolli. Mannisi baalunku katamu waalcho dayinota macciishshe isiwa shiqqi yii. Hatte yannara Israeelete manni baalunku xooqe mini minisira ha're no.

DAAWITI YERUSAALAME HA'RARA KAI

⁹ Gobbate aana noo manni baalu mimmitoho, «Moote Daawiti Filisxeemootunna wolu diininke anganni gatisinonke. Xa kayinni Daawiti Abeseloomi xooqe gobba agure fule no.

¹⁰ Moohisi'noommohu Abeseloomi olu giddo reyino; xa moote Daawiti marre mayira diabbinanni?» yii.

¹¹ Moote Daawiti Qeesoota Saadooqinna Abiyaataari soye, Yihudu geerrira, « ‹Israeelete manni coyi'rinore afoommona, moote mootimmate minira qolate mayira gede'nitinanni?

¹² Ki'ne isira difiixasiiti? Mundeesinna maalasi di"ikkitinoonni? Iso qae qolate mayira gede'nitinanniyya?› yiiyye» yiinsa.

¹³ Qole Amaasarano, « ‹Ati anera maala'yaati. Kunni ka'ira Iyoaabi darga olanto'ya hajajaancho assoommohe. Konne coye wonsha hoogummohero Maganu afoe!› yiino yitine kulle» yii.

¹⁴ Daawiti coyi'rino coyi Yihudu manni baalunku wodana mitto asse isi widira qoli. Insano mootenniwa manna sokke, olantosi baalante ledo galagale daanno gede assitu.

¹⁵ Mooteno galagale hige Yordaanoosi Wayi geeshsha dayi. Yihudu mannino dukkise Yordaanoosi Waa fushshara balaxe Galgalaho xaadi.

¹⁶ Hakko mereeronni Bahuriimi gobbahu Geera beetti Biiniyaamichu Shimi"i Yihudu manni ledo Daawiti haa'rara rahe dirri.

¹⁷ Isi ledo 1,000 Biiniyaamooti no. Saaooli mini soqqamaanchi Siibano 15 oososinna 200 soqqamaanosi ledo no.

¹⁸ Insano mootenna hoodesi noo manna dukkisse fushshatenna moote hasi'rannore baala assate Yordaanoosi Waa widoonni fultu. Moote Daawiti Yordaanoosi Waa fulara kae hee'reenna Geeri beetti Shimi"i albasiinni diriire uwi.

DAAWITI SHIMI"I ASSINO SAO AGURISI

¹⁹ Mooteteno, «Mooticha'ya ballo, soro'ya kiirtootie. Ati moote mootichi'ya Yerusaalametenni fulitto barra ani soqqamaanchikki assoommo so'ro agurie; wodanikkirano wodhitooti.

²⁰ Ani soqqamaanchikki sao assoommota afe, kune techo aliyye ga're Israeelennita baala balaxe dayommo. Ate moote mooticha'yano haa'rammora dayommo» yii.

²¹ Tseruya iltinohu Abisa kayinni, «Shimi"i Kaaliiqi buurinoha xonino daafira reya hasiissannosi» yee coyi'ri.

²² Daawiti qole, «Ki'ne Tseruya ooso, ane coyi giddora mayira e'inanni? Anera qarra abbitinaera hasidhinoonninso? Kune xa Israeelete moote aneeti. Techo Israeelete giddonni ayino reya dihasiissanno» yii.

²³ Mooteno Shimi"i, «Mittoreno di"ikkatto» yee xaarisi.

DAAWITI MEMFEBOSTERA ARAARAMISI

²⁴ Saaooli beetti beetti Memfebosteno moote haa'rara shiqi. Moote fule ha'rihunni kayise galagale keerunni higi barri geeshsha lekka dihayishshi'rino; ereedano diharansi'rino; imaanano dihayishshi'rino.

²⁵ Yerusaalametenni kae mootenniwa iillita moote, «Memfeboste, ane ledo ha'ra mayira giwitto?» yee xa'misi.

²⁶ Isino qole, «Moote mooticha'ya, afittonte gede ani naafichaho. Ate ledo ha'rammora yee soqqamaancho'ya, ‹Gaango koorie› yoommohu giwe ha'rinoe.

²⁷ Ate moote'ya albaanni beebbatenni su'ma'ya hunino. Ati moote mootichi'ya Maganu sokkaanchi gedee egennaamo ikkootto daafira atera lawinohere assi.

²⁸ Anni'ya mini manni baalu reya hasiissannoho. Ati kayinni ane ledokki sagale iteemmoha assoottoe. Kawiinni sae xa'mi'reemmori dino» yii.

²⁹ Mooteno, «Ani afoommona lowore coyidhooti. Atinna Siiba loosi'nannita Saaooli baatto beeqqitinanni gede assoommo» yiisi.

³⁰ Memfebosteno mootete, «Anera ati keerunni higa calla ikkitinoena, baatto Siiba gudise adhona» yii.

DAAWITI BARZILAYI QAESI HA'RANNO GEDE ASSISI

³¹ Galeaadichu Barzilayi Roogiliiminni daye moote dukkise Yordaanoosi Waa fuli.

³² Barzilayi 80 diri geerchooti. Lowo geeshsha dureessa ikkino daafira, moote Daawiti Mahinayimi noo waro sagale shiqishanni towatinosi.

³³ Mooteno Barzilayi, «Ane ledo Yerusaalame hadheenna towateemmohena kai» yiisi.

³⁴ Barzilayi kayinni, «Kunni diri'yanni ate mootete ledo Yerusaalame ma assammora ha'reemmo?

³⁵ Ani kune 80 diri geerchooti. Anera xa diniqannoeri dino. Iteemmorinna ageemmori nafa nyammi diyaannoe. Macca'ya sirbitannori huuro nafa badde diaffanno. Hakkiira ha'rummoro ateralla duha ikkeemmo.

³⁶ Ani Yordaanoosi fule ledokki shiima doogo calla ha'reemmo. Anera kageeshshi geeshsha qarrantooti.

³⁷ Hakkunni gedensaanni galagale qae'ya hige, mannu aalo ikkummorono anni'yanna ama'ya waammawa madaarroena agurie. Beetti'ya Kimihaami ledokki ha'reenna halchoottore isira assisi» yii.

³⁸ Mooteno, «Kimihaami ledo'ya ha'ranno; ati halchoottore baala isira asseemmosi. Hasi'rattore baala aterano wonsheemmohe» yiisi.

³⁹ Hakkunni gedensaanni Daawitinna ledosi noo manni baalu Yordaanoosi fuli. Mooteno Barzilayi sunqisihunna maassi'risihu gedensaanni qaesi ha'ranno gede agurisi.

YIHUDUNNA ISRAEELETE MANNI MOOTE DAAWITI DAAFIRA HEEWISAMI

⁴⁰ Moote Yihudu baalunnitinna aliyye Israeeleti daratu olanto dukkisseenna Yordaanoosi fulihu gedensaanni, Galgala mari. Kimihaamino isi ledo no.

⁴¹ Hakkawoyintenni Israeelete manni baalunku moote noowa kae daye, «Moote, roduuwinke Yihudu manni ate, maatekkinna ledokki noo manna Yordaanoosi fushshi woyite mayira maaxinke?» yitu.

⁴² Yihudu manni daware, «Hatto assinoommohu moote ninkera gamba yiinoha ikkino daafiraatillana mayira hanqitinanni? Isi ninkera sagale di"itisinonke; uyinonkerino dino» yii.

⁴³ Israeelete manni qole, «Isi ki'nera gamba yiinoha nafa ikkiro, 10 ga're ikkinoommo daafira gashshootisi roore ninke la"anno. Ki'ne ninke mayira mishshinanninke? Moote qolate balanxe coyi'noommori dininkeeti?» yii. Ikkollana, Israeelete manninni roore Yihudu manni Daawiti uminsaha assi'rate heewisami.