LAYINKI SAAMUEELI 18 - Qullaawa Maxaafa

ABESELOOMI SHINI

¹ Daawitino ledosi noo manna gamba asse xibbenna kume gaame, hajajjannore wori.

² Daawiti manna sasewa beehe, gaamo gaamote Iyoaabi, rodoosi Abisanna Gaati gobbaha Itayi wori. Moote Daawiti mannisira, «Anino ledo'ne ha'reemmo» yiinsa.

³ Mannisi kayinni, «Ati ledonke diha'ratto; ninke xoonqummoro woy gamisu reyinummoro diinu miteno diyaanno. Ninke tonne kume ati mittu rooratto. Kunnira, ati konniicho katamaho gatte hasiisannore soyittonkero woyyate» yitu.

⁴ Mooteno, «Ki'ne seyanno yitinire baala asseemmo» yiinsa. Isino huxxu waalchi mule uurre la"anna mannu baalu xibbe xibbenna kume kume ikke fuli.

⁵ Mooteno Iyoaabi, Abisanna Itayi, «Hakkonne beetto Abeseloomi anera yitine mararresi» yee hajajinsa. Daawiti Abeseloomi daafira konne coye coyi'ri yannara olanto baala macciishshitanni no.

⁶ Daawiti olanto katamunni fulte Israeelete manni ledo Efireemi dubbi giddo olantu.

⁷ Daawiti olantono Israeelete manna gawajjitu. Hakko barra olu bati'reenna 20,000 manni reyi.

⁸ Olu katamu gobbaanni hala'lanni ha'rino daafira, bagadu shiinonkunni roore dubbu giddo reyino manni kiiro batidhino.

⁹ Hakko mereero Abeseloomi hedeweelcho Daawiti olantonni xaadi. Gaango gulufe woroonni hige sa"anni hee'reenna mitte jawa qilxo caafi umisi danancho amadi. Gaango fulte hadheenna isi iima rarrae gati.

¹⁰ Daawiti olanto giddonni mittu sutame nooha afe, «Kune Abeseloomi mitte lowo haqqicho aana rarrae nooha afoommo» yee Iyoaabira kuli.

¹¹ Iyoaabi qole, «Afitto woyite darganko uullate mayira gana giwitto? Hatto assoottoha ikkoommero tonne kinchu birranna sinnaara eemmohehu baino!» yiisi.

¹² Manchu kayinni daware, «Mitto kume birra nafa uyiteennae mootete beetto disheemmo. Ninke baalunku anfanna moote atera, Abisaranna Itayira, ‹Anera yitine beetto Abeseloomi gawajjitinoontena agurre› yee hajajanna macciishshoommo. Kunnira, kume birra uyiteennae nafa mootete beetto disheemmo.

¹³ Ani mootete hajajo diige Abeseloomi shoommoha ikkoommero, moote wole coye macciishshannonte gede konne coyeno afikkinni digatanno; atino ane digatisattoe» yiisi.

¹⁴ Iyoaabino, «Xa ani ate ledo keeshsha dihasiissannoe» yee 3 urde adhe mare Abeseloomi reyikkinni haqqichote aana rarrae nooha gagaso qase herdeemi.

¹⁵ Tonnunku Iyoaabi bagado dukkannori Abeseloomi gaangeessite qooqqesi fushshitu.

¹⁶ Iyoaabino ola uurrisate xurumba ufuufanno gede manna hajaji. Olantono Israeelete manna shorra agurte higgu.

¹⁷ Abeseloomi reeshsha dubbu giddo nootera qile balera tugge, aanaho lowiddaanna kinna duuntu. Israeelete manni baalu mini minisira xooqi.

¹⁸ Hakkunnira albaanni Abeseloomi, lubbotenni hee're, «Su'ma'ya woshshiishanno beetti dinoe» yee mootete lagichira umisira sooddicha uurrisi'rino. Hakkonne sooddicha techo geeshsha, «Abeseloomi sooddichaati» yinanni.

DAAWITI ABESELOOMI REYINOTA MACCIISHSHI

¹⁹ Saadooqi beetti Akimaasi Iyoaabira, «Kaaliiqi diinisi anganni gatisinosiha dancha duduwo dodanni mare mootete kuleemmo» yii.

²⁰ Iyoaabino, «Wole barra ikkinnina techo mitto duduwono mootete dimassatto; konne duduwo wole barra kula dandaattona, mootete beetti reyino daafira techo dikulatto» yiisi.

²¹ Hakkunni gedensaanni Iyoaabi Itiyophiyichu soqqamaanchisira, «Marte afoottore mootete kuli» yii. Isino heeshshi yee Iyoaabira ayirrinye ee dodanni ha'ri.

²² Akimaasino, «Baxitano ikkiro soqqamaanchu hoode dodanni mare duduwo kuleemmona fajjie» yiisi. Iyoaabino, «Beetto'ya, kulatto duduwi dancha di"ikkinona ma uyinahera dodatto» yii.

²³ Akimaasi qole, «Baxitano ikkiro ha'reemmona agurie» yii. Iyoaabino, «Maahoyyena dodi» yiisi. Akimaasino Yordaanoosi Lagicha amade dode, Itiyophiyicha balaxe sae ha'ri.

²⁴ Hatte yannara, Daawiti katamaho giddoyidinna gobbayidi waalchi mereero ofolle no. Agaraanchuno huxxu aana seekkinoonni shaera uurre la"anni hee're, mittu manchi callisi dodanni daanna afi.

²⁵ Agaraanchuno woshshe mootete kuli. Mooteno, «Callisi nooha ikkiro dancha duduwo haa're daanni nooha ikkanno» yii. Dodanni noohuno iilla rahi.

²⁶ Agaraanchu xaano wolu manchi dodanni daanni nooha afe, xullo agare nooha woshshe, «Kune xaano wolu manchi dodanni daanni no» yii. Mooteno, «Kunino dancha duduwo haa're daanni nooha ikkanno» yii.

²⁷ Agaraanchuno, «Albiidihu Akimaasi gede ikke dodanno» yii. Mooteno, «Isi dancha manchootina, dancha duduwo abbanno» yii.

²⁸ Akimaasino umosi heeshshi asse moote keere haa'rihu gedensaanni, «Moote, ate aana ka'inore qeelatto gede assinohehu Maganikki Kaaliiqi galatamo» yii.

²⁹ Mooteno, «Beettu Abeseloomi gatino?» yee xa'mi. Akimaasino, «Gaadaanni Iyoaabi soyie yannara cancanni noo manna afoommona, kayinnilla ikkinori maatiro diafoommo» yee dawari.

³⁰ Mooteno, «Hanni ka'a shiqqi yite uurri» yii. Isino ka'a shiqqi yee uurri.

³¹ Konne mereero Itiyophiyichu kae dayi. Isino, «Kaaliiqi aanakki ka'inore baala rabbisinota ate moote mootichi'yara kulammohera dayommo» yii.

³² Mooteno Itiyophiyicha, «Beettu Abeseloomi keereho?» yee xa'mi. Isino daware, «Mootichi'ya moote, isira iillinori diinikkiranna ate aana ka'inoheri baalaho iillo» yee dawari.

³³ Mooteno lowo geeshsha dadille, huxxu waalchira iimaanni noo minira e"e wi'li. Hakkiira eanni hee'renni, «Beetto'ya, beetto'ya Abeseloomi, ati reyattontenni mayi ani reyo! Abeseloomi beetto'ya! Beetto'ya!» yaanni wi'li.