LAYINKI SAAMUEELI 16 - Qullaawa Maxaafa

DAAWITINNA SIIBA

¹ Daawiti ilaalu uminni shiima geeshsha fafe hee'reenna, Memfeboste soqqamaanchi Siibi 200 timma, 100 mooshshinoonniha woyinete qeeqqa, 100 balasete laalonna 1 okole woyinete xajje hogomboonnire 2 harre ga'ne isiwa dayi.

² Mooteno Siiba, «Kuri ma assi'rattoreeti?» yee xa'misi. Siibano, «Harre mootete mini manni gulufara, timmanna laalo ooso ittara, woyinete xajjeno halallitte gobbara goo'rihunna daafurihu agara haa're abboommo» yii.

³ Mooteno, «Mootichikki Saaooli beetti beetti hiikko no?» yee xa'misi. Siibano mootete, «Israeelete manni techo ahaahi'ya gashshoote qole aannoe yee Yerusaalamete ofolle no» yii.

⁴ Moote Siibara, «Kunni ka'a Memfeboste jajji baalu ateho» yiisi. Siibano umo heeshshi yee, «Mooticha'ya moote, albillitteno togolla baxie» yii.

DAAWITINNA SHIMI"I

⁵ Moote Daawiti Bahuriimi yinanni katama dayi. Mittu Saaoolira fiixa ikkannohu Geeri beetti Shimi"i daye Daawiti rumi.

⁶ Daawiti muli agaraasinesi dukkisse heedheennasinni isiranna ledosi gashshaanora kinna olloli.

⁷ Shimi"i rumanni, «Koo ati tidhoottokkihunna mundeete manchi, kai kawiinni! Kai kawiinni!

⁸ Saaooli darga amadde noottona, Kaaliiqi isinna maatesi mundee baalate ate rabbisaraati. Kaaliiqi gashshootekki beettikki Abeseloomira sayise uyino. Kune ati mundeete mancho ikkootto daafira, qarru amadinohe» yii.

⁹ Tseruya beetti Abisi mootete, «Kuni reyino woshichi mooticha'ya moote mayira rumanno? Mare umosi mureemmo» yii.

¹⁰ Mooteno, «Ki'ne Tseruya ooso, ki'nera ane ledo mayi noo'ne? Kaaliiqi, ‹Daawiti rumi› yee worinosiha ikkiro, ‹Togo mayira assatto?› yaannosihu ayeti?» yiinsa.

¹¹ Daawiti Abisaranna ledosi gashshaano baalate, «Kune ane iloommo beettinni shaaera hasanni nooe. Kunni Biiniyaamichunniti mayira dhagge ikkitu'ne? Rumannoe gede Kaaliiqi hajajinosina rumoena agurre.

¹² Miteekke Kaaliiqi shetto'ya lae rumosi maasso assannoeha ikkanno» yiinsa.

¹³ Hakkunni gedensaanni Daawitinna ledosi manni doogonsa amadde hadhu. Shimi"ino ilaalu baga amade rumanni, kinna ollolanninna bukono aanaho fincanni qoteho ha'ri.

¹⁴ Mootenna ledosi noo manni baalu Yordaanoosi Wayiwa iillite daafurtino daafira hakkiicho fooliishshidhu.

AKIXOOFEELI AMAALE

¹⁵ Abeseloominna ledosi noohu Israeelete manni baalu Yerusaalame daggu woyite, Akixoofeelino ledonsa no.

¹⁶ Hatte yannara Daawitira ammanamino jaali Kuusi Abeseloomiwa mare, «Moote hegerera moohi! Moote hegerera moohi» yiisi.

¹⁷ Abeseloomi daware Kuusira, «Jaalikki Daawitira ammanamakki kageeshshiraatilla? Isi ledo mayira ha'ra giwitto?» yiisi.

¹⁸ Kuusino Abeseloomira, «Ani hiitto konne coye asseemmo? Ani Kaaliiqinna Israeelete manni baalu doorinohu widooti; xaano ani ate ledolla hee'reemmo.

¹⁹ Mootete beettira soqqama agure ayira soqqameemmo? Annikkira soqqamummonte gede aterano soqqameemmohe» yiisi.

²⁰ Hakkunni gedensaanni Abeseloomi Akixoofeeli, «Xa hanni ma assineemmoro mala uyinke» yiisi.

²¹ Akixoofeelino Abeseloomira, «Mine agarasira wodhe ha'rinoriwa annikki meentiwa ei. Israeelete manni baalunku annikkira bowoottota macciishsheenna, ledokki noori baalu wolqa lexxitanno» yiisi.

²² Kunnira, Abeseloomira minu aana minnoonni mini aana dukkana qassusi. Abeseloomino Israeelete manni baalu afanna annisi meenti ledo xaadi.

²³ Hatte yannara Akixoofeeli amaale, Maganu qaali gede assine hendanni. Alba Daawitino Akixoofeeli amaale adhanno. Abeseloomino isi amaale adhi.