LAYINKI SAAMUEELI 15 - Qullaawa Maxaafa

ABESELOOMI GIBBO HASI

¹ Hakkunni gedensaanni Abeseloomi faradi gaare, faradonna albasiinni doddannore 50 manna qixxeessi'ri.

² Soodo gute kae katamu huxxi waalchira doogote uurranno. Mootenniwa coyeho daanno manna baala woshshe, maminni dayinoro xa'manno. Xa'minisi manchino, hiikkiinni dayinoro kulannosi.

³ Abeseloomino, «Halaalu ateho; ikkollana moote worino manni coyekki garunni dila"annohe» yaanno.

⁴ Qoleno, «Coye afi'rinohu baalu anewa dayenna lae taashsheemmo gede ane hige ayi worannoe?» yaanno.

⁵ Mannu daye keere haa'rasira umo heeshshi yaanno woyite, isi gamba asse amade sunqannonsa.

⁶ Abeseloomi mootenniwa coye adhe Israeelete gobba baalatenni daannoha hatto assi. Kunni garinni Israeelete manna aduule qeeli.

⁷ Shoolu diri gedensaanni Abeseloomi mootete, «Kebirooni mare Kaaliiqira xa'noommo xano uyi'reemmona ballo fajjie.

⁸ Ani Sooriyaho Geshuuri hee're, ‹Kaaliiqa Yerusaalame higeemmo gede assittoero Kebirooni mare kakkalo shiqisheemmohe› yee xano xa'noommo» yiisi.

⁹ Mooteno, «Keerunni hadhe higixa» yiisi. Abeseloomino kae Kebirooni ha'ri.

¹⁰ Ikkollana, «Buudu xurumba ufuunfanni woyite, ‹Abeseloomi Kebirooni moohino› » yaanno manna maaxe Israeelete ga're baala soyi.

¹¹ Abeseloomi woshsheenna ledosi Yerusaalametenni 200 manni ha'ri. Kuni manni kayinni tenne gannoonni gano horonta diafino.

¹² Abeseloomi kakkalo shiqishi'ri yannara, Daawiti amaalaasine giddonni mitto Akixoofeeli yinanniha Giilo Kataminni woshshiishi'rino. Mootete gannoonni gano jawaattanna, Abeseloomi hoode ha'ranno manni kiirono lexxitanni hadhu.

DAAWITI YERUSAALAMETENNI FULE XOOQI

¹³ Mittu sokkaanchi daye Daawitira, Abeseloomi Israeelete manna aduule umisiwa qo'linota kulisi.

¹⁴ Daawitino Yerusaalamete ledosi noo gashshaano baala, «Ka'e ranke xoonqona. Hakkuyi ka'a kayinni Abeseloomi daye gudannonke; angasinni gatannohu dihee'ranno. Katamu giddo nooha baalano gudanno» yiinsa.

¹⁵ Ledosi gashshaano qolte, «Ati yaattonkere baala assineemmo» yitusi.

¹⁶ Moote minisi mannanna ledosi gashshaano hoodete adhe fuli. Tonne irkote meentosi kayinni mine agaranno gede hakko agure ha'ri.

¹⁷ Mootenna hoodesi fulino manni mare katamu qaccera noo mini mule uurri.

¹⁸ Mootete muli agaraasine alba higge sa'anno woyite, ledosi gashshaano kayinni mulesi uurritu. Gaatinni dagginori 600 olantono albasiinni sa'u.

¹⁹ Mooteno Gaati olanto roorricha Itayi, «Ati ninke ledo mayira dayitto? Ati wole gobbanni ba'e dayottoha ikkootto daafira, higge haaro moote ledo hee'ri.

²⁰ Dayottohuno muleetilla; mayira haa're raateesseemmohe? Ani wortuewa ha'reemmona, ati kayinni higi; mannakkino ledokki haadhe ha'ri. Kaaliiqi shaqqillisinninna ammanamasinni agarohe» yiisi.

²¹ Itayi kayinni, «Heeshshote Kaaliiqinna ate halaali afanna, reyono heeshshono ikkituro ati ha'rittowa ha'reemmo» yiisi.

²² Daawiti qole Itayira, «Maahoyyena kaixa» yiisi. Itayinna mannisi, hoodensa noori baalu ledo mitteenni hadhu.

²³ Daawiti ledo manni fule ha'rita, gatino manni qoonqonsa naggi asse wi'li. Moote Qedirooni Waa fulita, mannisino ledosi halallitte gobba hige ha'ri.

²⁴ Qeesichu Saadooqi ledo Leewaawootu Kaaliiqiha Gondooru Taaboota dukke daggu. Taabootano, mannu baalunku katamunni fula geeshsha uulla worte agurtu. Qeesichu Abiyaataarino hakkiicho no.

²⁵ Mooteno Saadooqi, «Kaaliiqi Taaboota katama qoli. Maganu baxinoeha ikkiro, galagalche kawiira qoloena. Kaaliiqi baxieha ikkiro, Taabootanna Taaboota worranni darga galagale ille'yanni laeemmo gede assannoe.

²⁶ ‹Giwoommohe› yiiero kayinni, baxisisita assoe» yii.

²⁷ Qoleno Saadooqira, «Kune ati, beettikki Akima"aatsinna Abiyaataari beetti Yoonaataani keerunni katama higge.

²⁸ Ani ki'newiinni duduwu iillae geeshsha halallitte baatto fullanni lawora agareemmo» yiisi.

²⁹ Saadooqinna Abiyaataari Maganu Taaboota haadhe Yerusaalame qolte, hakkiicho keeshshitu.

³⁰ Daawitino dadille umo guggu'le wi'lanni mulla lekkanni Ejedhete Ilaala gooddi'ri. Ledosi noo manni baaluno umo guggu'le wi'lanni hoodesi fuli.

³¹ Daawitira, gano ganate Akixoofeeli Abeseloomi ledo noota kulleennasi, «Eeggate Kaaliiqa'ya, Akixoofeeli mali mulla ikkanno gede assi» yee huucci'ri.

³² Daawiti Kaaliiqa magansi'nanniwa ilaalu umira iille, muli jaalasi ikkinohunni Arkaawichu Kuusinni xaadi. Isino dadille imaanasi dare, umisi aanano buko giggishshi're no.

³³ Daawitino, «Ledo'ya ha'rattoha ikkiro anera kaa'lattoeri dino.

³⁴ Galagalte katama higge Abeseloomira, ane annisira soqqamittonte gede isirano ammanamatenni soqqamattosita kulittosiro kaa'lattoe. Marte Akixoofeeli amaale gurcho ikkitinota kultanni malasi diigi.

³⁵ Qeesootu, Saadooqinna Abiyaataarino hakko heedhanno. Mootete mininni macciishshatto coye baala Qeesootaho Saadooqiranna Abiyaataarira kulinsa.

³⁶ Oosonsa Akima"aatsinna Yoonaataani hakkiicho ledonsa no. Macciishshitinire baala insa widoonni qoltine sokke"e» yii.

³⁷ Daawiti jaali Kuusino Abeseloomi Yerusaalame eanni hee'reenna mare iilli.