LAYINKI SAAMUEELI 14 - Qullaawa Maxaafa

IYOAABI ABESELOOMI HIGANNO GARA MALI

¹ Tseruya beetti Iyoaabi moote Daawiti Abeseloomi afara quqquxaminota buuxi.

² Iyoaabino Teqoa Kataminni mitte egennaame mancho soye abbisiise, «Xiddu imaana uddidhe wi'li; buurono buudhitooti; reyinohura lowo yanna manchitinote gede ikki.

³ Mootenniwano marte ani yeemmohere kulisi» yiise. Marte yitannoreno kulise.

⁴ Manchono mootenniwa marte umo heeshshi yite keere haadhe, «Moote'ya ballo kaa'lie» yitu.

⁵ Mooteno, «Qarrikki maati?» yee xa'mise. Iseno dawarte, «Ani buxicho gunnitteeti; ayiddaanni'ya reyino.

⁶ Anera 2 labballi ooso nooe; lamunku xawoho giwanteenna badannohu hoogeenna mittu mitto gane shiino.

⁷ Kune fiixu baalu aana'ya kae, ‹Rodiisi rabbara shineemmona hakkonne rodoosi shiinoha fushshi› yiinoe. Ragi'rannoehu nookkiha mulla gatissaeraati; gatinoha caabbicho'ya xoyissitaraati; ayiddaanni'ya su'mi hawamannokki gede assannohu hoogaeraati» yitusi.

⁸ Daawitino daware, «Ani biddi asseemmona, ati minikkira ha'ri» yiise.

⁹ Mancho qolte, «Moote mooticha'ya, cubbu aneranna anni'ya maatera higona, atinna maatekki keere heedhe» yitusi.

¹⁰ Mooteno daware, «Ayino qarrisannohehu hee'riro anewa daanno gede assi; layinkita kisannohehu dihee'ranno» yiise.

¹¹ Iseno, «Beetti'ya mundeera rabbisannohu gatinoha shee hunannoekki gede Maganokki Kaaliiqa huuccie» yitu. Isino daware, «Kaaliiqi afanna beettikki ikkannori dino; aanisinni teennicho kayisannohu nafa dihee'ranno» yiise.

¹² Manchono, «Ani ate mootichi'yara mootete mitto coye coyi'reemmana macciishshie» yitu. Isino, «Coyi'ri» yiise.

¹³ Ise, «Maganu manni aana togoo coye mayira assitto? Ati moote konne coye coyi'roottona, bae nooha beettokki higanno gede assa hoogakkinni xa coyi'ritto coyi ate amade noohe.

¹⁴ Ninke baalunku reyineemmoreeti; xinqine haa'nara dandiinannikkihu baattote aana du'namino wayi gedeereeti. Maganu lubbo ba'annota dibaxanno; qafadame bainohu higanno gede assanno.

¹⁵ Xaano mannu waajjishinoe daafira, konne coye ate mootichi'ya mootete ku'lammara dayomma. Anino guma gede kuloommahere macciishshite wonshatto yee hasaawanni noomma.

¹⁶ ‹Anenna beetto'ya Maganu mannisira uyino baatto aaninni hunara hasi'rannohu anganni gatisie.

¹⁷ Anino, «Danchanna busha bade kulate ati moote mootichi'ya Maganu sokkaasinchi gedeehona, coyi'rattori jawaachishannoe» yee hedeeti. Maganikki Kaaliiqi ate ledo hee'ro› » yitu.

¹⁸ Mooteno qole, «Xa'meemmohere maaxxootie» yiise. Iseno, «Moote mooticha'ya hedoottore xa'mie» yitu.

¹⁹ Mooteno, «Kunni coyi giddo Iyoaabi nooni?» yee xa'mise. Manchono qolte, «Moote mooticha'ya, addanko yootto coyi illete. Halaalenko konne coye coyi'reemma gede ledokki gashshaanchi Iyoaabi hajajinoe.

²⁰ Isi togo assinohu, konne coye baala seekkara hedeeti. Ikkollana, ati baattote aana noo coye baalanka afate Maganu sokkaasinchi gedee egennaamooti» yitu.

²¹ Shiima yanna gedensaanni, moote Iyoaabi, «Kune ati hedootto coye assate hedoommona, marte hakkonne beetto Abeseloomi haadhe abbi» yiisi.

²² Iyoaabino baattote aana heeshshi yee, moote galaxxe, «Coye'ya haaroottoe daafira, ane soqqamaanchokki baxoottoeta afoommo» yii.

²³ Iyoaabi hakkunni gedensaanni kae Geshuuri ha'ri. Abeseloomino haa're Yerusaalame abbi.

²⁴ Moote kayinni, Abeseloomi mootete minira eannokki gede hajaji. Qoleno moote «Minisira ha'ro ikkinnina ane albira dayonke» yii. Yinoonnisi gede Abeseloomi minisira ha'ri; mootete albirano didayino.

ABESELOOMI DAAWITI LEDO ARAARAMI

²⁵ Israeelete manni baalunku giddo Abeseloomi xummete egennaminoho. Manninatisi aana mittoreno kullannire diafi'rinoho.

²⁶ Umisi dananchi lowo geeshsha bati'ra ikkino daafira seede ayirre qarrisannasi, dirunni mitte hige mudhanno. Dananchisi murre keennanni woyite 2 kiilo ikkanno.

²⁷ Abeseloomira 3 labballi oosonna 1 meya beetto ilantusi. Meya beettosi su'mi Taamaariiti; iseno addinta xumate.

²⁸ Abeseloomi Yerusaalamete 2 diro wo'ma mootetenni xaadikkinni hee'ri.

²⁹ Hakkunni gedensaanni Iyoaabi moote coyishshiishannosi gede hasi're, sokkaancho soqqi. Iyoaabi kayinni daa giwisi. Xaano lede Iyoaabiwa manna soqqi. Iyoaabi xaano daa giwi.

³⁰ Abeseloomino soqqamaanosi, «La'e, ane gatira aane noohu Iyoaabi gateeti; aanaho hayixu no; martine giira qasse» yiinsa. Insano marte gideho giira qassu.

³¹ Iyoaabino kae Abeseloomiwa daye, «Soqqamaanokki loosi'roommo gide mayira giirtu» yee xa'mi.

³² Abeseloomi daware, « ‹Geshuurinni mayiralla dayummo? Hakko hee'roommoro diwoyyannoe?› yiino yite mootete kulattoe gede soqqe woshshi'reenna daa giwoottoe. Xaano mootenniwa mareemmo gede assie; ani sao assoommoro shooena» yiisi.

³³ Iyoaabino konne coye mare mootete kuli. Mooteno Abeseloomi woshshisi; isino mootenniwa mare albasiinni baattote aana gombisame keere haa'ri. Mooteno daae yee sunqisi.