LAYINKI SAAMUEELI 13 - Qullaawa Maxaafa

AMINOONINNA TAAMAARI

¹ Daawiti beetti Abeseloomira mitte mine assidhinokkiti biifado rodoo noosi. Su'mise Taamaariiti. Anninsa beetti Aminooni Taamaari lae halchi.

² Ise seemo ikkitino daafira labballu ledo xaada diuyinannise. Aminoonino isenni xaadate lowo geeshsha halche hooge dhiwami.

³ Aminoonira Daawiti rodii Saami beetti Iyonaadaabi jaalasiiti. Isi lowo geeshsha hayyichaho.

⁴ Aminoonira, «Mootete beetto, barru barrunkunni togo ikkite mayira jaawitto? Dikkulattoe?» yiisi. Aminoonino, «Rodii'ya Abeseloomi rodoo Taamaari lae halchoommo» yii.

⁵ Iyonaadaabino, «Dhiwamoommo yite daallasikkira goxi. Annikki la"ahera daanno woyite, ‹Rodoo'ya Taamaari dagge sagale uyitannoe gede, sagaleno ani la"anna worte cuucishshannoe gede assie› yite huucci'ri» yiisi.

⁶ Aminoonino yiinosinte gede, dhiwamoommo yee goxi. Moote la"asira dayita, «Rodoo'ya Taamaari dagge ani la"anna shiima tima gante angasenni itissannoe gede assie» yee huucci'ri.

⁷ Daawitino, «Rodiikki Aminooni minira marte la"aato uyisi» yee Taamaariwa sokkaancho soyi.

⁸ Taamaarino ka'e rodiise Aminooni minira martu. Martanno woyite isi goxe no. Bullee haadhe liisse, isi la"anna la"aato wortusi.

⁹ Mixashshotenni fushshite itanno gede shiqqi assitusi. Isi kayinni ita giwe, «Manna baala mininni fushshe"e» yii. Mannu baalunkuno mininni fuli.

¹⁰ Hakkunni gedensaanni Aminooni Taamaari, «Angakkinni chuucishattaena la"aato haadhe shiqqi assie» yiise. Taamaarino gantino tima haadhe rodiise Aminooniwa shiqqi assitu.

¹¹ Sagale haadhe shiqishshuta amade, «Rodoo'ya ballo, amo ane ledo goxi» yiise.

¹² Ise qolte, «Rodoo'ya, dee'ni! Togoo coyi Israeelete giddo dihasiisannona shollishshootie. Konne makki'nanni coye assate giddeessitootie.

¹³ Kuni coyi ikkiro mannu albira hiitto ikke fuleemma? Ate su'mino Israeelete mereero bowinoha ikkanno. Hatteentenni konne coye mootete kuli; isi ane atera diho'lannohena» yitusi.

¹⁴ Isi kayinni yitinota dihaa'rinose. Wolqa roorinose daafira giddeesse macca hunise.

¹⁵ Hakkunni gedensaanni Aminooni tiyyi're giwise. Alba baxinosehunni roore giwe, «Mininni fulie!» yiise.

¹⁶ Iseno, «Mininni fushshite shorrattoeha ikkiro bunshekki te'enninni roore ikkitanno» yitusi. Isi kayinni yitinota dimacciishshinose.

¹⁷ Soqqamannosi beetto woshshe, «Tenne mancho albi'yanni fushshite mine cufie» yii.

¹⁸ Soqqamaanchisino ise gobbara fushshe mine cufi. Hatte yannara Taamaari wo'ma seeda uddano uddidhe no. Hattoo imaana, mine assi'rinokkihu mootete seenni uddi'ranno.

¹⁹ Taamaari umise aana buluulo giggishshidhe, imaanase daddarte, anga umoho wodhite raartanni hadhu.

²⁰ Rodiise Abeseloomi raartanni noota afe, «Rodiikki Aminooni shollishiheni? Rodoo'ya, xa sammi yii. Isi rodookkiitina konne coye ayerano kultooti; wodanikkirano wodhitooti» yiise. Taamaari rodiise Abeseloomi mine ofolte dadillitanni callase heedhu.

²¹ Moote Daawitino konne coye macciishshe lowo geeshsha hanqi. Ikkollana Aminooni bayira beettosi ikkasinni baxannosi daafira, dadillisasira dihasi'rino.

²² Rodoosi Taamaari shollishino daafira, Abeseloomi Aminooni ko'me coyishshiisha giwe hee'ri.

ABESELOOMI TAAMAARI RABBARA AMINOONI SHII

²³ Lamu diri gedensaanni Abeseloomi Efireemi Katami mule Ba"aali-Hatsoori yinanni darga ge'reewisi orda haxi'ri. Isino mootete ooso baala jilaho woshshi.

²⁴ Qoleno mootenniwa mare, «Moote, kune ani ge'reewi'ya orda haxi'rate jila ji'loommo. Atinna ledokki gashshaano jili'yara amme» yii.

²⁵ Mooteno Abeseloomi, «Beetto'ya, bati'neemmohena baalunku didangeemmo» yiisi. Abeseloomi kayinni lowo geeshsha huucci. Moote qole iso, «Keerunni ha'ri» yee ha'rikkinni gati.

²⁶ Abeseloomi, «Ati giwittoro rodii'ya Aminooni ledonke ha'ranno gede assi» yee huucci'ri. Mooteno, «Aminooni ate ledo mayira ha'ranno?» yii.

²⁷ Abeseloomi huucci're qarrisinosi daafira, moote Aminooninna oososi baalu ledosi hadhanno gede assi. Abeseloomino mootennihu gedee jila jilino.

²⁸ Soqqamaanosirano, «Aminooni woyinete xajje age dimbanno yanna la'e. Ani shiiyye yeemmo'ne yannara waajjitinikkinni shiiyye. Kunni coyira xa'mameemmohu aneetina bashshi assitinoonte» yee hajajinsa.

²⁹ Soqqamaanosino hajajinonsa garinni Aminooni shitu. Mootete ooso baalanti ka'e umi uminsa gaango aana ofolte xooqqu.

³⁰ Marte qae qaensa iillitukkinni doogote aana heedheenna Daawitira, «Abeseloomi mootete ooso baalanta shee gudino; mittuno digatino» yinanni duduwi iillisi.

³¹ Mooteno kae masillunni imaanasi dare uullate aana waxxi yii. Soqqamaanosino imaanansa darte mulesi uurritu.

³² Daawiti rodii Saami beetti Iyonaadaabi, «Mooticha'ya, oosokki baala shinoonnihu gede assite heddooti; shinoonnihu Aminooni callaho. Rodoosi Taamaari wolqatenni amade macca hunasira, Abeseloomi giddo maaxi're keeshshino daafira Aminoonilla shaanno.

³³ Xaano reyinohu Aminooni callahollana, ‹Oosokki baala reyitino› yinoonni duduwo ammantooti» yii.

³⁴ Hakko mereero Abeseloomino fule bai. Mittu agaraasinchi lowo manni Horonayimi yinanni katami gaari aanaanni noo doogo amade daanna afe mootete kuli.

³⁵ Iyonaadaabino mootete, «Kune yuummohente gede oosokki dagganni no» yiisi.

³⁶ Coyi're gudanni hee'reennanni, mootete ooso dagge e'u. Insano qoonqonsa naggi assite wi'litu. Moote, ledosi gashshaanonna soqqamaano baala lowo geeshsha wi'litu.

^37-38 Abeseloomi kayinni xooqe Geshuuri moote Amihuudi beetti Talmayiwa ha'ri. Hakkiicho 3 diro hee'ri. Daawiti beettisi Aminoonira lowo yanna wi'lino.

³⁹ Ikkeennano Aminoonire hawi bikkinni beettosi Abeseloomi sinsinnaawi.