LAYINKI SAAMUEELI 12 - Qullaawa Maxaafa

NAATAANI ABBINO SOKKANNA DAAWITI AAGINTAAWA

¹ Kaaliiqi, himanaancho Naataani Daawitiwa soyi. Naataanino Daawitiwa daye, «Mittu katamira mittu dureessunna mittu buxichu manchi no.

² Dureessaho lowo ge'reewinna lowo lali noosi.

³ Buxichoho kayinni hidhinoti mitte ge'rechote goodane calla noosi. Iseno oososi ledo itisanninna hayikkisanni hanqafe lossi'rinote. Tini goodaneno isira ilasi gedeeti.

⁴ Mitte soodo dureessu minira mittu wosinchu dayino. Manchuno wosinchisira umisi saada gorra marare, buxichu goodane haa're gorre itisino» yii.

⁵ Daawitino kunni dureessu manchi assootira lowo geeshsha hanqe Naataanira, «Heeshshote Magani halaaleeti, togo assino manchira reyo hasiissanno.

⁶ Togooha mararro nookki coye assino daafira, goodanete darga 4 anga qola hasiissannosi» yii.

⁷ Naataanino Daawitira, «Hakku manchinniwe ateeti. Israeelete Magani Kaaliiqi, ‹Israeelete mannira moote ikkatto gede buuroommohe. Saaooli angannino gatisoommohe.

⁸ Mootichikki Saaooli gashshootenna meentosi angakkira qoloommo. Israeelenna Yihudu mine baala oommohe. Hakku ajoommehero wole ledeemmohe.

⁹ Hajajo'ya mayira mishittoyya? Konne busha coyeno mayira assitto? Ooriyo olunniwa shiishiishootto. Amoonootu shitannosi gede assootto; galtesino adhootto.

¹⁰ Ooriyo galte adhatenni aneno mishoottoena, minikkinni jaddote reyo faffoonke.

¹¹ Kune minekki busha coye kayiseemmo. Meentokki albikkinni haa're woleho eemmo; barra xawoho meentikki ledo wolu goxanno gede asseemmo.

¹² Ati konne maaxxe loosootto. Ani kayinni konne coye barra Israeelete manni albaanni reqecci asseemmo› yiino» yee kulisi.

¹³ Daawitino Naataanira daware, «Kaaliiqi aana sao assoommo» yii. Naataanino Daawitira qole, «Kaaliiqi cubbokki agurannohena direyatto.

¹⁴ Ikkollana, tenne sao assatenni Kaaliiqa lowo geeshsha mishootto daafira, ilaminohu qaaqqikki reyanno» yiisi.

¹⁵ Hakkunni gedensaanni Naataani galagale qaesi ha'ri. Kaaliiqi, Daawitira Ooriyo galte iltino qaaqqira lowo dhibba tugi.

DAAWITI QAAQQI REYO

¹⁶ Daawitino qaaqqisi daafira Magano huucci'ri. Itanna agano agure, baalanka hashsha uulla kadhe goxi.

¹⁷ Ledosi gashshaanono uullanni ka"anno gede assate wo'naaltu. Isi kayinni uullanni ka"anna ledonsa sagale ita giwi.

¹⁸ Qaaqquno mitte lamala gedensaanni reyi. Daawiti ledo gashshaanono, «Qaaqqu lubbotenni hee'reenna yinoommore dimacciishshinonke. Xa kayinni qaaqqu reyinota kullummoro hiitto ikka ikka? Umosi gawajja ikka?» yite kula waajjitu.

¹⁹ Daawiti kayinni ledosi gashshaano hashaashantanna macciishshe, qaaqqu reyinota afi. Kunnira, «Qaaqqu reyini?» yee xa'minsa. Insano, «Ee reyino» yite dawartu.

²⁰ Daawitino uullanni kae bisosi hayishshi're, buudhe, uddanosino soorri're Kaaliiqi minira e"e umosi heeshshi asse kumbuuli. Minisirano daye, «Sagale abbe"e» yii; abbinoonnisi sagaleno iti.

²¹ Ledosi gashshaano, «Kuni coyi dileellinonke; qaaqqu lubbotenni hee'reenna ita aga agurte wi'lootto. Xa kayinni qaaqqu reya hee'reennanni ka'e sagale ititto» yitusi.

²² Isino daware, «Qaaqqu lubbotenni hee'reenna ita aga agure wi'loommohu, Kaaliiqi marare qaaqqo gatisae ikka yeeti.

²³ Xa kune qaaqqu reyino; ma assi'rammora qatumeemmoyya? Xa qaaqqo kayisammora dandeemmoni? Ani isiwa mareemmota ikkinnina isi anewa dihiganno» yii.

SELEMOONI ILAMI

²⁴ Daawiti galtesi Bersaabehi jawaachishi. Ise minira mare ledose gali. Iseno godobbe labbaa beetto iltu. Su'mano, «Selemooni» yee fushshisi. Qaaqqono Kaaliiqi baxisi.

²⁵ Kunnira, himanaancho Naataani soye su'masi, «Yidiidiya yeemmo» yii.

DAAWITI AMOONOOTUNNIHA DANNAWU KATAMA AMADI

²⁶ Hatte yannara Iyoaabino Amooniha dannawu katama Raaba amadara rahe no.

²⁷ Iyoaabino Daawitiwa manna soye, «Raaba Katama qase, wayi fulannowa amadoommo.

²⁸ Xa katama ani amadeenna, ane su'minni woshshamannokki gede, gattino olanto gamba assidhe, katama gaangeessite amadi» yii.

²⁹ Daawitino olanto gamba asse Raaba Katama mare gaarame qeele amadi.

³⁰ Daawiti Amoonootu magani Melooki yinannihu umi aaninni 35 kiilo ikkannohu dilqu kinchi noo ba'latto haa're umisi aana wodhi. Katamu giddonnino lowo jajja adhi.

³¹ Hakko hee'ranno mannano magaazetenni, qottotenninna meesanetenni loosannosi gede assi'ri. Xuube seekkitannosi gedeno assi. Amoonootu katamma baalate hee'ranno mannino konne looso loosanno gede assi. Hakkunni gedensaanni Daawitinna olantosi baala Yerusaalame higgu.