LAYINKI SAAMUEELI 10 - Qullaawa Maxaafa

DAAWITI AMOONOOTANNA SOORIYOOTA QEELI

¹ Shiima yanna gedensaanni Amooni moote Naoosi reenna, beettisi Hanooni isi darga moohi.

² Moote Daawiti, «Annisi Naoosi assinoente gede anino beettisi Hanoonira danchumma asse qoleemmosi» yii. Kunnira, Daawiti annisi reyora dadillinota egensiisate Hanooniwa manna soyi. Daawiti soqqamaanono marte Amooni iillitu yannara,

³ Amooni albisooti mootensa Hanoonira, «Daawiti annikki reyora dadille jawaachishanno manna soyinoha lawannohe? Kuni manni katama dooyye ha'reenna, daye gudankera soyinoha ikkinota diafootto?» yitusi.

⁴ Hanoonino Daawiti soqqamaano amade ereedansa gama darate meede, uddanonsano hallu geeshsha haranse mure ha'risinsa.

⁵ Daawiti konne coye macciishshe kuni manni lowo geeshsha saalfatino daafira wole manna soye, «Ereedi'ne lopha geeshsha Iyyaarko agarre; hakkunni gedensaanni higginannina» yiinsa.

⁶ Amooni gosa angansanni Daawiti diina assidhinota affe, Beeti-rehoobinninna Tsoobanni 20,000 lafo olanto, Sooriyunninna Xoobinni 12,000 manna woxunni hidhitu. Moote Maakano 1,000 olanto haa're daye kaa'lannonsa gede assi'ri.

⁷ Daawitino konne coye macciishshe, olanto baalate ledo Iyoaabi olaho soyi.

⁸ Amoonootu fulte kataminsa waalcho e'nannihura albaanni dirantu. Wolootu Sooriyooti, Tsobanninna Maakanni daggino bagadaano ledo mittu xawira darga amaddu.

⁹ Iyoaabino albaanninna duumbaanni diinu doyisse noota afe Israeelete olanto giddonni bareedda doore, Sooriyootu ledo olantanno gede assi.

¹⁰ Gattino olantono rodiisi Abisha hajajanna Amooni gosa ledo olantanno gede assi.

¹¹ Iyoaabi Abishara, «Sooriyootu wolqissuero ati dagge kaa'lattoe. Amoonootu atera wolqissuhero kayinni ani daye kaa'leemmohe.

¹² Kunnira, xa jawaati! Manninkenna Maganinke katammara jawaante olammo. Baalunku coyi Kaaliiqi yiino gede ikko» yii.

¹³ Iyoaabinna olantosi bala tuggara shiqqi yite daggu yannara, Sooriyootu albinni xooqqu.

¹⁴ Amoonootu Sooriyootu xooqquta affe, insano qolte Abisha albinni xooqqe katama e'u. Iyoaabino Amoonoota qasa agure Yerusaalame higi.

¹⁵ Sooriyootu olanto Israeele qeeltinonsata affe mittowa gamba yitu.

¹⁶ Tsooba moote Hadaadiezeerino Efiraaxisi Wayira soojjaatoonni noo Sooriyootira sokka soyi. Insano Hadaadiezeeri olanto hajajaanchi Shobaaki albansaanni ha'ranna Elaami Katama daggu.

¹⁷ Daawiti konne coye macciishshe Israeelete olanto baalanta mittowa gamba assi'ri. Yordaanoosi fule Sooriyootu noowa Elaami dayi. Sooriyootuno Daawiti aana ola fantu.

¹⁸ Sooriyootu kayinni, Israeelete olanto albinni xooqqu. Daawitinna olantosi Sooriyootu giddonni 700 faradi gaare gantannorenna 40,000 faradaasine shitu. Olantote hajajaancho Shoobaakino qasse madiissitino daafira hakkiicho olu xawira uwe reyi.

¹⁹ Hadaadiezeerira giwire baattanno mootoolla baala Israeele qeeltinonsata affe araara xa'midhu. Israeelete giwireno baattunsa. Kunnira Sooriyootu Amoonoota kaa'la waajjitu.