LAYINKI MOOTOOLLA 5 - Qullaawa Maxaafa

NI"IMAANI TARAAWANNOHUNNI GOGU DHIBBINNI HURI

¹ Ni"imaani Sooriyu olantora hajajaanchoho. Kaaliiqi Sooriyaho qeelle isi widoonni qole uyino daafira, mootetenna mannu albaanni lowo geeshsha ayirradoho; qoleno bareeda manchooti. Ikkollana taraawannoha gogu dhibba afi'rino.

² Mitto waro Sooriyootu Israeeloota qassara fultu barra mitte shiima beetto qafadde haadhe hadhino; iseno Ni"imaani galtera soqqantanni heedhino.

³ Tini beetto mitto barra mootittesera, «Mootichi'ya Samaariyaho noo himanaanchiwalla maroommero kunni dhibbinni huranno» yitu.

⁴ Ni"imaanino konne coye macciishshihu gedensaanni mootenniwa mare beetto yitinore kulisi.

⁵ Mooteno, «Hakkawoyiteetiro amo rakke eemmoheta borrote sokka haadhe Israeelete mootewa ha'ri» yiisi. Ni"imaanino 30,000 kinchu birra, 70 kiilo culkanna 10 wo'ma uddano anga haa're ha'ri.

⁶ Israeelete mootewa haa're ha'rinoti borrote sokkano, «Soqqamaancho'ya Ni"imaani taraawannohunni gogu dhibbinni hursattosira hasi'roommo» yitannote.

⁷ Israeelete mooteno borrote sokka nabbabanni hee'renni mase uddanosi dare, «Sooriyu moote konne mancho hurseemmo gede hiitto asse hedanno? Ani gatisatenna shaate Magano ikkeennaatini konne mancho hursammora soyinoehu? Togo assinohu ane hasiisara yeeti!» yii.

⁸ Maganu manchi Elsai ikkino coye baala macciishshe Israeelete mootera, «Uddanokki mayira daritto? Mancho anewa soyi; anino Israeelete himanaanchu noota leellisheemmosina!» yii.

⁹ Kunnira Ni"imaani faradi gaaresira ofolle Elsai minira e'nanni waalchira mare uurri.

¹⁰ Elsaino soqqamaanchosi soye, «Marte Yordaanoosi Wayira 7 higge lixxe fulte hayishshi'ri; dhibbikkinni hurte keeraa'mattona» yiisi.

¹¹ Ni"imaani kayinni hanqe, «Anera, isi daye Maganisiha Kaaliiqi su'ma woshshe, dhibbi'yara anga doyisse hursannoeha lawinoe.

¹² Hatto ikkiro Demaasiqote wayibba Abaananna Farfaari Israeelete wayibba diroortanno? Hayishshi'ra calla ikkituro hatte wayibbanni hayishshi're keeraa'ma didandeemmo?» yee gungumanni galagale gobbasi ha'rara kai.

¹³ Ni"imaani soqqamaano kayinni, «Mootichanke! Himanaanchu hakkiinni roore kaajjado coye assi yoommehero diassatto? Kulinohe garinni hayishshidhe dhibbunni hura loworeetini?» yitusi.

¹⁴ Ni"imaanino Maganu manchi kulinosi garinni Yordaanoosi Wayi laga dirre 7 hige lixe fulanni hayishshi'ri; dhibbisinnino huri; manninatisino qaaqquullunnihu gedeeha ikki.

¹⁵ Hakkunni gedensaanni Ni"imaani hoodesi noo manni ledo galagale Elsaiwa daye albasiinni uurre, «Gobba baalate Israeelete Magani callu Magano ikkinota xa buuxoommo. Kunnira, ballo ane soqqamaanchikkiwiinni afansha adhi» yiisi.

¹⁶ Elsaino, «Soqqameemmosihu Heeshshote Kaaliiqi afanna, mittoreno diadheemmo» yii. Ni"imaani afansha adhanno gede eegame huucci'rino; Elsai kayinni adha giwi.

¹⁷ Ni"imaani qole, «Afansha'ya adha giwittoro, Kaaliiqa agurranna wole magannara shilqonnitanna wole kakkalo shiqisheemmokki daafira, lame gaangora bushsha hogophe ha'reemmona uyie.

¹⁸ Gobba'ya moote dukkise ha're Remooni yinanniha Sooriyu magano magansi'nanni galma eummoronna kumbuulummoro nafa Kaaliiqi sao'ya aguroe» yii.

¹⁹ Elsaino, «Keerunni ha'ri!» yiisi. Ni"imaani shiimawa fafe ha'rihu gedensaanni,

²⁰ Elsai soqqamaanchi Giyaazi, «Mootichi'ya hakku Sooriyichu abbino afansha adhannohu gatino; Heeshshote Kaaliiqi halaaleeti, rahe hordofe iille angasinni mittoricho adha hasiissannoe» yee hedi.

²¹ Kunnira Giyaazi Ni"imaani hordofi. Ni"imaanino isiwa hige dodanni nooha afe, faradi gaaresi aaninni dirre, «Maaho, keerunku dayitto?» yee xa'misi.

²² Giyaazino, «Keerehollana, mootichi'ya, ‹Himanaanote gaamo giddonni lamu manni hedeweelcho kae gaaraame Efireemi gobbanni anewa dayinona, eeggatena 3,000 kinchu birranna 2 wo'ma uddano soyinsa› yee soyennae dayommo» yiisi.

²³ Ni"imaanino, «Hakkawoyiteetiro ballo 6,000 kinchu birra haadhe ha'ri» yii; yiino coyeno soorrikkinni birra 2 ogorira wore 2 wo'ma uddano ledo 2 soqqamaanosira duhisiise Giyaazira albaanni higge haadhe hadhanno gede assi.

²⁴ Elsai noowa iillituta, Giyaazi soqqaamaanote anganni lamenka ogoro haa're minira eessi. Ni"imaani soqqamaano ha'rise,

²⁵ galagale minira ei. Elsaino, «Giyaazi, xaa geeshsha hiikko noottohu dayitto?» yee xa'misi. Giyaazino, «Mooticha'ya, ha'roommowi dino» yee dawari.

²⁶ Elsai kayinni, «Hakku manchi ate ledo xaadara faradi gaarete aaninni dirri woyite ayyaanunni ate ledo noommota diafootto? Woxenna uddano, zayitete ejersanna woyine kaasi'nanni darga, ge'reewonna lalo, labbaahanna meya soqqamaano adhinanni yanna ikkitinoni?

²⁷ Kunni daafira kune Ni"imaanihu taraawanno dhibbi gogunnihu atera sa"anno; hegere geeshsha kuni dhibbi atenna sirchikki aaninni dika"anno!» yii. Giyaazi Elsai albinni fule ha'ri; hakku dhibbi amadeennasi bisisi kaadete gedee waajjo ikki.