LAYINKI MOOTOOLLA 20 - Qullaawa Maxaafa

MOOTE HIZIQIYAASI DHIWAME HURI

¹ Hatte yannara moote Hiziqiyaasi lowo geeshsha dhiwame reyote gamba yee hee'reenna Isayaasi isiwa mare, «Kaaliiqi ‹Dhibbikkinni dihuratto; reyattoraatina minekki biddi assi'ri!› yiinohe» yee kulisi.

^2-3 Hiziqiyaasi alba xarrate widira hige hururame wi'lanni, «Kaaliiqa'ya, atera ammaname wo'mu wodaninni soqqamoommohetanna ati baxattore assoommota qaagie» yaanni huucci'ri.

⁴ Isayaasi Hiziqiyaasiwiinni fule mootete nafara sae ha'rara hee'reenna Kaaliiqi,

⁵ «Manna'ya gashshinohura Hiziqiyaasira marte, ‹Albihu awurikki Daawiti Magani ani Kaaliiqi huuccattokki macciishshoommo; hindiiddokkino laoommo; hurseennahe 3 barri gedensaanni Qullaawu Minira ha'ratto.

⁶ Dirikki aana 15 diro ledoommohe. Atenna konne Yerusaalamete Katama Asoori moote anganni gatiseemmo. Ayirrinyi'yanna soqqamaanchi'ya Daawitira oommo hexxo daafira yee katama agareemmo› yite kulisi» yii.

⁷ Hakkunni gedensaanni Isayaasi, moote Hiziqiyaasi soqqamaano, «Qeeqqitinota balasete laalo haadhine abbe» yiinsa. Insano abbite madate ganteenna Hiziqiyaasi huri.

⁸ Moote kayinni, «Hure 3 barri gedensaanni Qullaawu Minira ha'ra dandeemmota mayinni afeemmo?» yee xa'mi.

⁹ Isayaasi qole, «Kaaliiqi uyinohe hexxo wonshannoha ikkasira malaate isinni aannohe. Mitturichi caali 10 dirima badheenni higannotanso 10 dirima albaanni sa"annota baxatto?» yee xa'misi.

¹⁰ Hiziqiyaasi daware, «Caalu 10 dirima albaanni sa"a diqarrissannona, 10 dirima badheenni higanno gede assie» yii.

¹¹ Hakkunni gedensaanni Isayaasi Kaaliiqa huucci. Kaaliiqino moote Akaazi seekkisiisino dirimi aana noo caali 10 dirima badheenni higanno gede assi.

BAABILOONINNI DAGGINO SOKKAANO

¹² Hatte yannara Baabilooni moote Balaadaani beetti Merodaaki-Balaadaani Hiziqiyaasi dhiwame hurinota macciishshe, afanshu ledo borrote sokka soyisi.

¹³ Hiziqiyaasino sonkoonni manna danchu albinni haa'rinsa. Mootete mine noo jajja baala birra, culka, qimamma, shitto, olu bagadonna maanxoonni uduunne baala leellishinsa. Mootete minenna gashshootisi giddo noo jiro mitteno gattukkinni leellishino.

¹⁴ Hatte yannara Isayaasi moote Hiziqiyaasiwa daye, «Kuni manni maminni dayinoho? Maa kulihe?» yee xa'misi. Hiziqiyaasino, «Insa xeertote Baabilooni yinanni gobbanni daggino» yee dawarisi.

¹⁵ Isayaasino, «Mootimmate mine maricho la'u?» yee xa'misi. Isino daware, «Baalankare la'ino; uduunnu mine noori giddonnino leellishoommonsakkiri dino» yii.

¹⁶ Isayaasino Hiziqiyaasira, «Kaaliiqi:

¹⁷ Atetinna techo geeshsha akaakkakki duuntinoti mootimmate mine noo jiro baala mitturino gatikkinni mucuqqi yite Baabilooni hadhanno yanna dagganno.

¹⁸ Ilootto ooso giddonni gamu qafadante hadhe Baabilooni mootete mine mureeyye ikkite soqqantanno yiino» yee kulisi.

¹⁹ Hiziqiyaasino, «Ani noommo geeshsha keerella ikkannona» yee hedino daafira, «Kaaliiqi soyennahe dagge kuloottoe coyi danchaho» yii.

MOOTE HIZIQIYAASI REYI

²⁰ Hiziqiyaasi assinohu wolu coyi baalu bareendesi, wayi eelanno kofamenna wayi katamu giddora eanno gede seekkino doogori Yihudu mootoolla dhagge amadino maxaafira borreessineenna no.

²¹ Hiziqiyaasino annuwasinte gede reyi. Beettisi Minaase isi darga moohi.