LAYINKI MOOTOOLLA 19 - Qullaawa Maxaafa

MOOTE HIZIQIYAASI HIMANAANCHU ISAYAASINNI MA'LI

¹ Moote Hiziqiyaasi konne coye macciishshe, dadillunni uddanosi dare, xiddu uddano uddi're Qullaawu Minira ha'ri.

² Mootete mini gashshaancho Eeliyaaqeemi, borreessaancho Shebinanna qeesootu giddonni umo umo ikkitinore Amootsi beettiwa Isayaasiwa soyi. Insano xiddu uddano uddidhe dagge Isayaasira,

³ «Hiziqiyaasi, ‹Ninkera tini qarrunna shettote yannaati; shollinyuno amadanni noonke; ilate yanna iilliteenna niixxe fushshi'ra hooggino mancho gede ikkine hee'noommo.

⁴ Asoori moote Heeshshote Magano xonara mitto gaadaanna soyino. Maganikki Kaaliiqi konne coye macciishshe xoninoha qorichishannoha ikkanno. Kunnira hanni manninke giddonni gatte lubbotenni heedhannori daafira huuccinke› yiino yite» kultusi.

⁵ Isayaasino tenne sokka macciishshe mootete,

⁶ «Kaaliiqi, ‹Asoori moote soyino manni xoninoe xono daafira waajjitooti.

⁷ Gobbasira dudumbanni duduwinni masanno gede asseemmosi. Galagale gobbasi ha're gurcho reyo reyanno› yiino yitine kullesi» yii.

ASOOROOTU WOLE SEYANYOOTU SOKKA SOKKU

⁸ Asoori gaadaanni moote Lakiishinni agure ha're Libina Katamira olamanni noota macciishshe isino hakkiichira ha'ri.

⁹ Qoleno Itiyophiyu moote Tirihaaqi albisanna dagginoti Gibitsete olanto qassansara gugguuffanni noota Asoori gosa macciishshitu. Asoori mooteno konne coye afe,

¹⁰ Yihudu moote Hiziqiyaasira, «Hexxatto Magani, ‹Yerusaalame Asoori moote angara die'anno› yaanni dogoonkehe.

¹¹ Asoori mootoolla huntara hasidhanno gobba hiitto assitannoro afootto; atino hakkiichinni gatattoha lawannoheni?

¹² Akaakka'ya Goozaani, Kaaraaninna Retsefini katamma huntino. Telaasaari heedhannota Edeni gosano guddino. Kuni duuchu ikkanna magannansa giddonni mittuno gatisansara didandiino.

¹³ Hamaati, Arfaadi, Sefariwayimi Henainna Iiwa katamma mootoolla hanni mama nooyya?» yitanno sokka soyi.

HIZIQIYAASI HUUCCATTO

¹⁴ Moote Hiziqiyaasi sokka haa're nabbawihu gedensaanni, Qullaawu Minira haa're masse Kaaliiqi albaanni wore,

¹⁵ «Israeelete Magano Kaaliiqa, kirubeeli yinanni kalaqamira iimaanni ofolloottohu ateetilla; gobba baalate gashshootira gashshaanni ate callaati; gordonna baatto kalaqoottohu ateeti.

¹⁶ Kaaliiqa'ya, Senaakireemi ate Heeshshote Magano asse xonihe gara maccakki kawa qolte macciishshi; illekkinni kawa qolte lai.

¹⁷ Kaaliiqa, Asoori mootoolla lowo gashshoote gudde baattonsano mulla assite aguransa addaho.

¹⁸ Maganna ikkitinokkita angansanni haqqenna kinna bocce seekkidhino misilla giirte huntino.

¹⁹ Kaaliiqa Maganonke, ati Kaaliiqi callu ninkera Magano ikkoottota daga baala affanno gede xa Asoorootu anganni gatisinke» yaanni huucci'ri.

ISAYAASI MOOTE HIZIQIYAASIRA SOYINO SOKKA

²⁰ Hakkunni gedensaanni Isayaasi moote Hiziqiyaasira, «Israeelete Magani Kaaliiqi, ‹Asoori moote Senaakireemi seyateennahe huucci'rootto huuccatto macciishshoommo.

²¹ Ani Kaaliiqi Senaakireemira, Yerusaalamete manni ate mishe arrassannohe; xooqatto yannarano ajiiffatannohe.

²² Boo'nitanninna boollaqidhanni seyatittohu ayeti? Xonittoehu ani Israeelete qullaawaatiwe!

²³ Soqqamaanokkira Mooticha xonte sokke: Faradi gaare'yanni jajjabba Libaanoosi Ilaalla amadoommo; seeddaanna daguwanna biifado hoomme karoommo; gaaru aana nooha ulma dubbo eoommo.

²⁴ Manni gobbara bu'a u'me waa agoommo; olanto'ya lekka Gibitsete wayibba mooshshitino yootto.

²⁵ « ‹Lowo dirira albaanni konne coye hedoommohu ane ikkoommota diafootto? Hedoommo coyi ikkanno gede assoommohuno aneeti. Qiinshoonni katamma diigge duuno assatto gede wolqa oommohehu aneeti.

²⁶ Manninsara wolqa ba'ino; hexxono ba'eennansa tultaabbino; soojjaati bubbe mooshshitino daraarchi xawunnihu, qarmete hayissonna minu aana mu'ranno ishinchi gedeere ikkitino.

²⁷ « ‹Ani kayinni atere gudise egennoommo; ma"assattoronna hiikka ha'rattoro laoommo. Anera hanqite kaoottotano afoommo.

²⁸ Anera hanqite wodanikkinni boo'noottota baala macciishshoommo. Kunnira, sanokkira qoroora gane afiikkira bixaala qase wirri asse dayitto widira qoleemmohe yoommota kulisi› yiino» yiisi.

²⁹ Hakkunni gedensaanni Isayaasi Hiziqiyaasira, «Kunni baalunkura malaate ikkanno coyi no: Konne dironna daannoha winxikkinni laalino gide ittinanni; sayikki diro kayinni umi'ne gide wixidhine laashshidhinanni; woyineno kaasidhine laalose ittinanni.

³⁰ Yihudunni gattino taraare kayinni rumushshu baatto raqqeenna, lophe laalanno haqqi gedeere ikkitanno.

³¹ Yerusaalametenna Tsiyooni Gaari aana gattinori heedhanno. Olantote Mootichi Kaaliiqi laalasinni konne coye wonshanno.

³² «Kaaliiqi Asoori moote daafira, ‹Isi horonta konne katama dieanno; mitticho doga nafa diolanno; wonqo amaxxitino gaaddono shiqqi diyitanno; bushsha duunte digaangeessitanno.

³³ Katamu giddora eikkinni dayino doogo hige galagale ha'ranno. Konne coyi'roommohu ani Kaaliiqaati.

³⁴ Ayirrinyi'yanna soqqamaanchi'ya Daawitira oommo hexxo daafira yee konne katama ani umi'ya gargare gatiseemmo› yiino» yee coyi'ri.

MOOTE SENAAKIREEMI REYI

³⁵ Hakko hashsha Kaaliiqi sokkaasinchi Asoorootu qacha mare 185,000 olanto shii. Soodo mannu goxinowiinni ka"anno woyite base baala reeshshaho.

³⁶ Hakkunni gedensaanni, Senaakireemi gedensira hige xooqe ha're Nennewe hee'ri.

³⁷ Mitto barra Niserooki yinanni magani kaphunnihu mine magansi'ranni hee'reenna, oososi giddonni 2 Adirameleekinna Sharetseri yinanniri bisetenni shitusi. Insano Araaraati Gobba xooqqe ba'u. Gatinohu beettisi Asiraadooni isi darga moohi.