LAYINKI MOOTOOLLA 17 - Qullaawa Maxaafa

GEDENSIIDIHA ISRAEELETE MOOTE HOOSEI

¹ Akaazi Yihudaho moohihunni tonaa layinki diro, Eela beetti Hoosei Israeelete moohi; Samaariya teesso assi're Israeele 9 diro gashshino.

² Isino Kaaliiqi giwanno coye assino. Ikkollana isi cubbi albiti Israeelete mootoolla loossinohu geeshsha di"ikkino.

³ Asoori moote Seliminaasoori daye qasisi yannara qeelame anga ee, diru dirunkunni isira gabbaranni hee'rino.

⁴ Ikkollana shiimu diri gedensaanni, moote Hoosei Soi yinannihuwa Gibitsete mootewa manna soqqe kaa'lannosi gede xa'mi'ri. Asoori mootera diru dirunkunni aannoha mittu diri giwire kayinni uyikkinni saino. Seliminaasoori konne coye afe Hoosei amade usuri.

SAMAARIYU UWA

⁵ Hakkunni gedensaanni Seliminaasoori Israeele qase Samaariya 3 diro doyisse amadi.

⁶ Seliminaasoori, Hoosei moohihunni honsikki diro Samaariya qeele angara qo'li. Israeelete mannano qafade Asoorira haa're ha'ri. Insa giddonni gama Halaahi Katamira, gama Goozaani awuraajjira Haboori Wayi mule, woloota qole Medooni katammara heedhanno gede assi.

⁷ Samaariyu uwinohu Israeelete manni Gibitsete gobbanni Feriooni anganni fushshinonsaha Maganonsa Kaaliiqa agurte wole maganna magansi'ratenni cubbo loosse dadillissinosi daafiraati.

⁸ Baatto amaddu yannara Kaaliiqi albinsanni shorre hunino dagata busha woga argidhino. Qolteno Israeelete mootoolla rosiissinoha busha coye adhitino.

⁹ Israeelete manni Maganinsa Kaaliiqi giwanno coye baala assino. Shiimu qachinni kayise lowo katami geeshsha gaarra baalate dagate maganna magansi'nanni darga seekki'ri.

¹⁰ Gaarra baalate aananna haqqete hunda Asheera mokkollo uurrisi'ri.

¹¹ Kaaliiqi albinsanni shorre hunino daga woga amadde insa kakkaltanno darga hixaana giirtu; kunni bushu loosinsanni Kaaliiqa hanqissino.

¹² Kaaliiqi magansidhannokki gede hoolinota kaphu maganna magansidhe seerasi diiggu.

¹³ Kaaliiqino Israeelenna Yihuda qorophisiisate soqqamaanosi himanaano soye, «Busha doogo'nenni higge; soqqamaasine'ya himanaanote widoonni qole akaakka'neranna ki'nera oommo hajajonna Seera agadhe» yee coyi'rino.

¹⁴ Insa kayinni hajajama gibbino. Maganinsara Kaaliiqira ammanantinokkiri akaakkansa gede haxo mokkookkitino.

¹⁵ Kulinonsa woga diwonshitino; annuwansa ledo eino gondoorono diagadhitino; seejjinonsa seejjo baala lashshi assite agurtino; haafu misilla magansidhanni insano tidhitinokkire ikkitino; Kaaliiqi qooxeessinsara noo daga woga amaddannokki gede kulinonsa hajajo diigge, insa hoode hadhino.

¹⁶ Maganinsa Kaaliiqi hajajo baala agurte magansidhannota 2 culkunni seekkinoonnita siittu misilla uurrisidhino. Qolteno Asheera mokkollicho seekkidhino; beeddahete kumbuultino; Ba"aalirano soqqantino.

¹⁷ Tenne dagate magannara oosonsa seennenna labballo shilqote kakkalo assite shiqishshino. Kiilaanonna qaalloole mala xa'midhino. Kaaliiqi giwanno coyira umonsa sayisse uyite iso hanqissino.

¹⁸ Kaaliiqi Israeelete lowo geeshsha hanqe, Yihuda agure insa co'o asse huni.

¹⁹ Yihudu mannino qole Maganinsa Kaaliiqi uyinonsa hajajo diagadhino; insano Israeelete mannita busha woga amaddino.

²⁰ Kunnira, Kaaliiqi Israeelete manna baala facci asse agurino. Albisinni co'o asse hunannohura mararannokki diinira sayise aatenni qorichishinonsa.

²¹ Kaaliiqi Israeele Yihuduwiinni badihu gedensaanni Israeele Naabaaxi beetto Iyorbiaami moohisidhino. Iyorbiaamino Kaaliiqa agurtanno gede asse lowo cubbi giddora eessinonsa.

²² Israeeleno Iyorbiaami loosino cubbo baala loossanni heedhinota ikkinnina agurte dihiggino.

²³ Kaaliiqi soqqamaanosi himanaanote widoonni qole kulinonsa garinni, albisinni co'o asse huninsa. Israeelete manni qafadame Asoori gobba ha'rinohu kunni garinniiti.

ASOOROOTU ISRAEELETE GOBBARA HEEDHANNO GEDE ASSINI

²⁴ Asoori moote: Baabilooni, Kuta, Iiwa, Hamaatinna Sefariwayimi katammara heedhanno gosa abbe qafadante hadhino Israeele darga worino. Insano tenne katamma ragidhe heedhu.

²⁵ Kuni manni umo hakkiicho hee'ra hanafi yannara Kaaliiqa dimagansi'rino. Kunnira Kaaliiqi doobbiwo soye gama manna cancananno gede assi.

²⁶ Asoori mooteno, «Samaariyu katammara hee'ranno gede assootto manni hatte gobba magani seera diegennino. Kunnira Kaaliiqi cancane shaanno doobbiwo soyinonsa» yinanni duduwo macciishshi.

²⁷ Asoori mooteno, «Samaariyunni qafande abbinoommo qeesooti giddonni mitto kawiira sokke; isino mare hatte gobba magani uyino hajajo rosiisanno gede assinanni» yee hajaji.

²⁸ Kunnira Samaariyunni qafande massinoonnihu mittu qeesichi galagale Beeteli ha're hakko hee're mannaho Kaaliiqa magansi'ranno gara rosiisi.

²⁹ Samaariyaho noo manni kayinni uminsa maganna seekki'ranni Israeelete manni seekkinowa qullaawa darga masse wodhi; mitte mittenti gaamo heedhanno katamira uminsa magano seekkidhu.

³⁰ Kunni garinni Baabilooni manni Sukootibenooti yinanni magani misile seekki'ri. Kutanni dayino manni Nerigaali yinanni magano, Hamaati manni Ashima yinanni magani misile seekki'ri.

³¹ Iiwa manni Nibihazinna Tartaaqi yinanni maganna misilla seekki'ri. Sefariwayimi manni qole Adirameleekinna Anameleeki yinannirira magannansara oosonsa shilqote kakkalo asse shiqishi.

³² Kuni manni Kaaliiqano magansi'rino. Qolteno mitte mittenti gaamo magannansa magansidhannowa soqqantannorenna kakkaltanno qeesoota mereerinsanni doodhitu.

³³ Kunni garinni Kaaliiqa magansidhu. Wole widoonni kayinni alba heedhanno gobba rosi garinni umi uminsa maganna magansidhu.

³⁴ Hakkonne albi rosonsa xaa geeshsha diagurtino; Kaaliiqa callasi dimagansidhanno. Israeeli yinoonnihura Yaiqoobi sirchira uyinoonni woga, wodho, seeranna hajajo diwonshitino.

³⁵ Kaaliiqi Israeelete ledo gondooro ei woyite, «Wole maganna magansidhinoonte; insara soqqantinanni kumbuultinoonte; kakkalono shiqishshinoontensa;

³⁶ jawa wolqa'yanninna wolqaataame cigile'yanni Gibitsete gobbanni fushshoommo'nehura ane Kaaliiqira calla hajajamme. Ane callaho kumbuulle; kakkalono ane callaho shiqishshe.

³⁷ Borreesse oommo'ne seeranna hajajo wo'manka woyite agadhe; wole maganna horonta magansidhinoonte;

³⁸ ki'ne ledo eoommo gondooro habbinoonte; wole magannano magansidhinoonte.

³⁹ Ane Magano'ne Kaaliiqa magansidhe; anino diini'ne anganni gatiseemmo'ne» yee hajajinonsa.

⁴⁰ Ikkollana insa konne coye macciishsha gibbe albi rosinsa garinni heedhu.

⁴¹ Baabilooninni dayino mannino Kaaliiqa magansi'ranni hee'renni, wole widoonni kayinni magannansa magansi'rino. Sirchinsano techo geeshsha kunni garinni magansi'ranni no.