LAYINKI MOOTOOLLA 16 - Qullaawa Maxaafa

YIHUDU MOOTE AKAAZI

¹ Remaaliya beetti Faaquhe Israeelete moohihunni tonaa lamalki diro, Iyoaataami beetti Akaazi Yihudaho moohi.

² Akaazi moohinohu 20 dirisinniiti. Yerusaalame teesso assi're 16 diro gashshino. Isi albi annisi Daawiti gede Kaaliiqi baxanno coye diassino.

³ Israeelete mootoolla assitino bunshe assino. Ilino beetto nafa kaphu magannara shilqote kakkalo asse shiqishino. Hatto assinohu, Israeele baatto amaddu waro Kaaliiqi albinsanni shorre hunino daga assitannoha tiyyi'nanni coye ha'runseeti.

⁴ Akaazi gaarrate aana, seekkinoonnitera dagate maganna magansi'nanni darguwaranna sinnaame haqqe baalate hunda kakkale, hixaanano giirino.

⁵ Sooriyu moote Retsiininna Israeelete moote Faaquhe Yerusaalame doyissite amaddu. Ikkeennano Akaazi qeeltara didandiitino.

⁶ Hatte yannara Sooriyu moote Retsiini Elaati Katama galagalche qo'le hakkiicho hee'rannoha Yihudu manna giddonni fushshi. Hakka waro Edoomootu Elaati Katama e'ino; insano techo geeshsha hakkiicho heedhanno.

⁷ Kunninni kainohunni Akaazi Asoori mootewa Telgeltefelsooriwa «Ani soqqamaanchokkiitinna beettokkiiti. Kunnira, dagge qassanni nooeri Sooriyunna Israeelete mootoolla anganni gatisie» yee manna soqqi.

⁸ Qoleno Qullaawa Minenna mootete mine noo birranna culka afansha asse soyisi.

⁹ Asoori mooteno, Akaazi yiinore macciishshe gaade mare, Demaasiqo qase qoli. Moote Retsiinino shee mannano qafade Qiiri yinanni katama haa're ha'ri.

¹⁰ Akaazino Telgeltelfelsoorinni xaadara Demaasiqo ha'ri. Maranno woyite hakkiicho kakkalote uduunnicho afe, hakko suudiha seekkannosi gede akeekinoricho qeesichu Ooriyowa soyi.

¹¹ Qeesichu Ooriyono Akaaziyaasi Demaasiqotenni higa geeshsha hakkonne lawannoha kakkalote uduunnicho seekki.

¹² Akaaziyaasi Demaasiqotenni hige seekkinoonniha kakkalote uduunnicho lae, kakkalara isi aanira sae,

¹³ shilqote kakkalora saadanna gide shiqishi; anganniri fushshaatenna mittimmate kakkalo mundee aanaho duni.

¹⁴ Camotenni seekkine Kaaliiqira bandoonnihu kakkalote uduunnichi, isi seekkisiisinohu kakkalote uduunnichinna Qullaawu Mini mereero no. Isono dargisinni hoole haaroho midaadoonni aliyye ragaanni qole wori.

¹⁵ Hakkunni gedensaanni Ooriyo, «Kunni haaru jawu ane uduunnichi kakkalonnihu guto shiqinshannita shilqote kakkalo, hawarro shiqinshanniha gidu fushshaate, mootetenna mannu daafira shiqinshannita shilqote kakkalonna gidu fushshaate, mannu daafira shiqinshanniha anganniri fushshaate dunnanniwa assi. Kakkallanni saada mundee baala isi aana duni. Camotenni seekkinoonnihu kakkalote uduunnichinni kayinni ani masaa'leemmo» yii.

¹⁶ Ooriyono Akaazi hajajinosi gede assi.

¹⁷ Akaazino Qullaawa Mine shoolunku waatira noo waalchuwanna doyitanno shae aana worroonni saanna haa're hooli. Camotenni seekkinoonnita 12 boottate misile aana noota Baaraho yinannita jawa quuqqado waa worranni gabate haa're hala'ladu kinchi aana wori.

¹⁸ Asoori moote hagiirsiisara yee, mootenniha ayirrado barcima worranni darga diigi. Hakkunnira albaanni mootoolla Qullaawu Minira e'anno waalcho cufi.

¹⁹ Moote Akaazi assinohu wolu coyi baalu Yihudu mootoolla dhagge amadino maxaafira borreessineenna no.

²⁰ Akaazino annuwasinte gede reenna, Daawiti Katamira mootoollate waammawa madaarrisi. Beettisi Hiziqiyaasi isi darga moohi.