LAYINKI DUDUWO 5 - Qullaawa Maxaafa

¹ Selemooni Qullaawu Mini looso baala gudihu gedensaanni, annisi Daawiti Kaaliiqira badinoha birrunniha, culkunnihanna wole uduunne baala Qullaawu Mini uduunne worranniwa masse wori.

GONDOORU TAABOOTA QULLAAWU MINIRA EESSINI

² Hakkunni gedensaanni, Selemooni Kaaliiqiha Gondooru Taaboota Daawiti Katami Tsiyooninni abbitanno gede, Israeelete geerra, ga'retenna boosaallu albisoota baala Yerusaalame woshshi.

³ Israeelete manni baalunku Daasu Ayyaana ayirrinsannihura lamalki aganira moote Selemooniwa gamba yii.

⁴ Israeelete albisooti baalu gamba yituhu gedensaanni Leewaawootu Taaboota haadhe,

⁵ Qullaawu Minira dukke abbitu. Qolteno qeesootunna Leewaawootu, Xaadu Dukkananna giddo noo uduunne baalano haadhe abbitu.

⁶ Selemooninna ledosi noo manni baalu Taabootaho albaanni gamba yite, kiirre fullannikki ge'reewonna lalo gorrite kakkaltu.

⁷ Qeesootuno Gondooru Taaboota Qullaawu Minira eessite, Qullaawu Holgira kirubeeli qoolira woroonni noo darga wortu.

⁸ Qoollansa iimaanni qolte diriirsite nooti kirubeeli misilla Taabootanna iso dunkanni dawaayye guggushshite no.

⁹ Dawaayyu seeddaanna ikkino daafira, Qullaawu Holgira albaanni uurrinohu baalu la"ara dandaanno. Gobbaanni noohura kayinni dileellanno. Hakku dawaayyi techo geeshsha hakko no.

¹⁰ Israeelete manni Gibitsetenni fuli waro, Kaaliiqi insa ledo gondooro ei yannara Muse Siina Ilaalira worinore 2 bocame kinna agurranna Taabootu giddo woliri noori dino.

KAALIIQI AYIRRINYE

¹¹ Hatte yannara, qeesootuno Qullaawu Darginni fultu. Addi addi gaamo ikkitino qeesooti baalunku Kaaliiqi albaanni uurra dandiitanno gede umonsa keereensidhe no.

¹² Faarsaano ikkitino Leewaawooti baalu Asaafi, Hemaani, Yidutuni, labballi oosonsanna ayiddinsa baalu biifado imaana uddi're no. Insano tsenaatsilenna bagana amadde kakkalote dargira soojjaatoonni uurrite no. 120 qeesooti xurumba amadde ledonsa uurrite no.

^13-14 Insano xurumba ufuuffanni, faarsaano baala, tsenaatsiletenni, baganunninna wolu muuziiqu uduunninni, «Shaqqado ikkino daafira, baxillisino hegereha ikkino daafira, Kaaliiqa galattesi!» yitanni mitte qoonqonni Kaaliiqa galattu. Konne mereero hedeweelcho xawannohu, Kaaliiqi ayirrinye leellishanno gomichi Qullaawa Mine wo'mino daafira qeesootu uurrite soqqama nafa didandiitino.