LAYINKI DUDUWO 30 - Qullaawa Maxaafa

MARARROTE AYYAANA AYIRRISATE ASSINOONNI QIXXAAWO

^1-3 Keeraa'mitinori hendoonni geeshshi qeesooti nookkihuranna mannuno Yerusaalamete gamba yiinokki daafira, Mararrote Ayyaana albi gede umi aganira diayirrinsoonni. Kunnira moote Hiziqiyaasinna ledosi gashshaano Yerusaalamete manni Mararrote Ayyaana layinki aganira ayirrisanno gede assitu. Mooteno Israeelete, Yihudu, Efireeminna Minaase gosa Israeelete Magani Kaaliiqi ayirrinyira Mararrote Ayyaana ayirrisate Yerusaalame Qullaawu Minira dagganno gede sokka soyi.

⁴ Mootenna Israeelete songo baala tini hedo tashshi assitunsa.

⁵ Kunnira, Israeelete Magani Kaaliiqiha Mararrote Ayyaana ayirrisate aliyyeenni Daaninni kayise wodiidoonni Bersaabehi geeshsha noo manni baalu gamba yee Yerusaalame daanno gede lallawisiissu. Hakkunnira albaanni hakkeeshshi manni seeru garinni gamba yee ayyaana ayirrise diegennino.

⁶ Mootenna ledosi gashshaano sokkino sokka haa'rino manni Israeelenna Yihudu gobba baala ha'ri. Sokkano, «Israeelete manna! Asoori moote qafadowiinni gattinoonniri, Abirihaami, Yisihaaqinna Yaiqoobi Magani Kaaliiqiwa higginiro, isino ki'newa higanno.

⁷ Affininte gede Maganinsara Kaaliiqira ammanama gibbeenna bararraanqanni coye assinonsari annuwa'nenna roduuwi'ne gede ikkitinoonte.

⁸ Annuwa'ne gede haxo mokkookkitinoonte. Kaaliiqira hajajamme; hegerera qullaawa assinohuwa Qullaawu Minisiwa Yerusaalame amme. Buwanni nooha hanqosi aani'nenni hoolanno gede Magano'ne Kaaliiqa magansidhe.

⁹ Kaaliiqiwa higginiro, ooso'nenna roduuwa'ne qafaddinori mararte qae higganno gede assitannonsa. Magani'ne Kaaliiqi shaqqadonna mararannoha ikkino daafira, ki'ne isiwa higginiro, isino alba higanno'ne» yitannote.

¹⁰ Sonkoonni mannino Efireeminna Minaase baattora noo katamma baala ha're, Zaabiloonita aliyye ga're geeshsha iilli. Mannu kayinni arrassanni oso'linsa.

¹¹ Aseeri, Minaasenna Zaabilooni ga'rehu shiimu manni kayinni umonsa shollishe Yerusaalame dayi.

¹² Maganuno hedosi garinni mootenna ledosi roorrooti yitino coye wonshanno gede, Yihudu manni wodana mitto asse kakkayisino.

MARARROTE AYYAANA AYIRRINSI

¹³ Layinki aganira Timu Ayyaana ayirrisate lowo manni Yerusaalamete gamba yii.

¹⁴ Yerusaalamete nooha wole magannara kakkallannihanna hixaana giirranni uduunne baala hoolte Qedirooni Lagichira massite huntu.

¹⁵ Layinki agani eihunni tonaa shoolki barra, Mararrote Ayyaanira ge'rechu wilii'licho gorritu. Lagaabbe noo qeesootinna Leewaawootu saalfattu. Kunnira, insanaa keereensidhu. Hakkunni gedensaanni Qullaawu Minira e'e shilqote kakkalo shiqisha dandiitu.

¹⁶ Maganu manchi Muse kulino Seeri garinni, Qullaawa Mine uyinoonninsa darga amaddu. Leewaawootu uyitinota kakkalote mundee qeesootu haadhe kakkalote darga wixxu.

¹⁷ Mannu giddo lowo manni keeraa'minokkihu noo daafira, Mararrote Ayyaanira ge'reewu wilii'le gorra difajjinoonninsa. Kunnira Leewaawootu insa su'minni ge'reewu wilii'le gorrite Kaaliiqira shiqishshu.

^18-19 Qoleno Efireemi, Minaase, Yisaakoorinna Zaabilooni ga'renni dayinohu keeraa'minokkihu lowo manni noo daafira, Mararrote Ayyaani jila itino. Hiziqiyaasi kayinni insa daafira, «Kaaliiqa, ati danchu Magani, ate akaakkanke Magano hasidhannori baalunku sao aguri. Qullaawu Mini seeri garinni keeraa'ma hoogguro nafa, ate wo'mu wodaninni magansidhanni noohere maarinsa» yaanni huucci.

²⁰ Kaaliiqino Hiziqiyaasi huuccatto macciishshe manna gawajja aguri.

²¹ Yerusaalamete gamba yiino manni, Timu Ayyaana lowo hagiirrinni 7 barra wo'ma ayirrisi. Leewaawootunna qeesootu muuziiqu uduunninni dukkinseenna barru barrunkunni faarsitanni Kaaliiqa galattu.

²² Hiziqiyaasino Kaaliiqa magansi'rate coye baala danchu garinni qineessitino daafira Leewaawoota galatinsa. Akaakkansa Magano Kaaliiqa ayirrisatenni 7 barra mittimmate kakkalo shiqishshe uyinoonninsa beehachi aaninni ji'lituhu gedensaanni,

²³ baalunku wole 7 barra ledde ayirrisate sumuu yitu. Hakkunni gedensaanni mitteenni hagiidhitanni ji'litu.

²⁴ Moote Hiziqiyaasi 1,000 woraamma, 7,000 ge'reewonna me"e, ledosi gashshaano qolte 1,000 woraamma, 10,000 ge'reewonna me"e gorre ji'lanno gede mannaho uyitu. Lowo qeesootino insanaa keereensidhu.

²⁵ Yihudu gosa, qeesootu, Leewaawootu, aliyyenni dagginori, Israeeletenna Yihudaho hee'rannohu manni gobba manni baalu lowo geeshsha hagiidhi.

²⁶ Daawiti beetti Selemooni yannanni kayise hattoo coyi ikke egenninokki daafira, Yerusaalamete manni lowo geeshsha hagiidhino.

²⁷ Qeesootunna Leewaawootu uurrite mannaho maasso dirritanno gede Magano huuccitu. Maganuno huuccattonsa iilliteenna gordoho qullaawu dargisira hee're macciishshinsa.