LAYINKI DUDUWO 29 - Qullaawa Maxaafa

YIHUDU MOOTE HIZIQIYAASI

¹ Hiziqiyaasi moohi waro 25 dirosiiti. Yerusaalame teesso assi're 29 diro gashshino. Amasi Abiya Zakkaariyaasi beettooti.

² Hiziqiyaasi albi annisi Daawiti gede Kaaliiqi baxanno coye assino.

HIZIQIYAASI QULLAAWA MINE KEEREENSI

³ Hiziqiyaasi Moohi diro umi aganira Kaaliiqiha Qullaawa Mine fane waalchuwa haaro asse seekkino.

⁴ Qeesootanna Leewaawoota Qullaawu Minira soojjaatoonni noo nafara gamba asse,

⁵ «Ki'ne Leewaawootu macciishshe! Umo'ne keereensidhe; akaakka'ne Magani Kaaliiqiha Qullaawa Mineno keereense. Qullaawa Mine batteessannore baala fushshitine hunne.

⁶ Akaakkanke, Maganinke Kaaliiqira diammanantino; isi giwanno coye assite isono facci assite agurtino. Isi galannowiinni alba shawwu yite isira badhe wodhitino.

⁷ Qullaawu Mini waalcho baala cuffino; caabbiyyeno xoyissitino. Israeelete Magani Kaaliiqi Mine hixaana digiirtino; shilqote kakkalono shiqisha agurtino.

⁸ Kunninni kainohunni Kaaliiqi hanqi Yihudunna Yerusaalamete aana dirrino. Affininte gede baalanka waajjishannohunna masisanno coyi amadinonsa.

⁹ Annuwanke bagadu gudinohuno kunniraati; meentinkenna oosonke qafadantino.

¹⁰ Xaate kunni ka'a Kaaliiqi buwanno hanqosi aaninkenni hoolanno gede Israeelete Magani Kaaliiqi ledo gondooro eate murci're kaoommo.

¹¹ Ooso'ya! Albasiinni uurritine soqqantinasira, soqqamaanosi ikkitinaranna hixaana giirtinasira Kaaliiqi doodhino'nena lashshi assitinoonte» yii.

^12-14 Soqqantanno gede hendoonni Leewaawooti: Qehaati boosaallinni, Amaasayi beetti Mahaatinna Azaariyaasi beetti Iyueeli; Meraari boosaallinni, Abiidi beetti Qiishinna Yihalelieeli beetti Azaariyaasi; Gershooni boosaallinni, Ziima beetti Yoaahinna Yoaahi beetti Edeni; Elitsafaani boosaallinni, Shimirinna Yi"ieeli; Asaafi boosaallinni, Zakkaariyaasinna Maataaniya; Hemaani boosaallinni, Yihieelinna Shimi"i; Yidutuni boosaallinni, Shemaiyanna Uzieeliiti.

¹⁵ Kaaliiqi seerira kulloonni garinni, Leewaawoota roduuwansa gamba assite umonsa keereensidhuhu gedensaanni, moote hajajinonsante gede Qullaawa Mineno keereensitara e'u.

¹⁶ Qeesootuno Qullaawa Mine keereensitara giddora e'u. Keeraa'minokki coye baala Qullaawu Mini nafarira haadhe fushshitu. Leewaawootuno hakkiinni kayisse Qedirooni Lagicha massitu.

¹⁷ Umi aganira umi barrinni hanaffe settikki barra Qullaawu Minira e'nanniwi geeshsha noo darga baala keereensitu. Hakkunni gedensaanni wolu settu barri giddo Qullaawa Mine giddoyido keereensite tonaa leelki barra guddu.

QULLAAWA MINE MAGANSI'RATE GALAGALCHINE FANNI

¹⁸ Leewaawootu looso gudduhu gedensaanni moote Hiziqiyaasira, «Shilqote Kakkalo kakkallanniwa hakko noo uduunni baalu ledonna qullaawa tima worranni xarapheezza ledosi uduunne baalanna Qullaawa Mine gudinse keereensinoommo.

¹⁹ Moote Akaazi Kaaliiqira ammanama hoogatenni adhino uduunne baala qolle abbine, Kaaliiqira baxxinoha assinoommo. Kuni uduunni baalunku Kaaliiqira kakkallanni dargira albaanni no» yite kultusi.

²⁰ Layinki soodo guto, moote Hiziqiyaasi katamu roorroota gamba asse hoodete adhe Qullaawu Minira ha'ri.

²¹ Insano mootete miniranna Yihudu mannira cubbo agursiisate, Qullaawa Mine keereensate kakkalora Kaaliiqira shiqinshannita, 7 woraamma, 7 ge'reewu gocca, 7 ge'reewu wilii'li goccanna 7 meu gocca abbitu. Mooteno hattenne saada Kaaliiqira kakkalote darga kakkaltanno gede Aarooni sircho ikkitinore qeesoota hajaji.

²² Qeesootuno balaxxe woraamma, aanchite ge'reewu gocca, gedensaanni qolte ge'reewu wilii'le gorrite, mitte mittente kakkalo mundee kakkalote darga wixxu.

²³ Hakkunni gedensaanni meu gocca haadhe mootenniwanna gamba yee noo manniwa massitu. Mootenna hakkiicho noo manni angansa goccate aana wori.

²⁴ Moote hajajino garinni, shilqote kakkaloranna mittu mittunkuha Israeelete cubbo baala agursiisate qeesootu meu gocca gorrite mundee kakkalote darga duntu.

²⁵ Alba Kaaliiqi Daawitira mootete masaalaanchi Gaadinna himanaanchu Naataani widoonni qole hajajinosi garinni, kunnira woroonni noo coye wonshino: Moote Hiziqiyaasino Daawiti assino garinni bagana, tsenaatsilenna maasinqo gana egentino Leewaawoota Qullaawa Mine wori.

²⁶ Leewaawootu Daawitiha muuziiqu uduunne haadhe, qeesootuno xurumba anga haadhe Qullaawa Mine uurritu.

²⁷ Hiziqiyaasi shilqote kakkalo kakkaltanno gede hajaji. Insa kakkaltanna mannu galatu faarso faarsi. Faarsaanono xurumba ufuuffanninna Daawitiha muuziiqu uduunne gantanni dukkissunsa.

²⁸ Hakkiicho noo manni baalu mitteenni Kaaliiqira kumbuuli. Kakkalo shilqite gooffa geeshsha faarsaano faarsa, xurumba ufuuffannorino ufuufa diagurtino.

²⁹ Kakkalo kakkalle gundihu gedensaanni, moote Hiziqiyaasinna mannu baalu guluphe Magano magansi'ri.

³⁰ Hiziqiyaasinna roorrootu Daawitinna himanaanchu Asaafi fushshitinota galatu faarso Leewaawootu faarsitanno gede assitu. Insano umo heeshshi yite lowo hagiirrinni faarsitu.

³¹ Hiziqiyaasi manna, «Xa ki'nenee Kaaliiqira qullaawoota assitinoonni daafira, Kaaliiqira galatu kakkalo'ne haadhine Qullaawu Minira abbe!» yiinsa. Insano yiinonsa gede assitu. Insa giddonni mittu mittu shilqote kakkalora ikkitanno saada hagiidhinohu baalu haa're abbi.

³² Mannu shilqote kakkalora Kaaliiqira 70 woraamma, 100 ge'reewu goccanna 200 ge'reewu wilii'li gocca abbino.

³³ Wole kakkalote shiqinshoonni saada, 600 woraammaatinna 3,000 ge'reewunna meu goccaati.

³⁴ Tenne baalanta saada gorre dulate qeesootu kiiro ajjino daafira, loosu goofa geeshshanna wolootu qeesooti keeraa'mite lexxita geeshsha Leewaawootu kaa'litunsa. Qeesootunkunni roore duucha yanna Leewaawootu lagaabbannokki gede qorophitanno.

³⁵ Gudinse giirrannita lowota mittimmate kakkalora shiqinshannita coomu kakkalo, shilqote kakkalonna agattote fushshaate shiqishshanno. Kunni garinni Qullaawa Mine magansi'rate seeri haaro ikke hanafami.

³⁶ Hiziqiyaasinna mannu baalunku, konne coye rakke assitanno gede Maganu kaa'linonsa daafira lowo geeshsha hagiidhitu.