LAYINKI DUDUWO 22 - Qullaawa Maxaafa

YIHUDU MOOTE AKAAZIYAASI

¹ Arabete gosa gaadde dagge Akaaziyaasi calla agurranna Iyoraami ooso baalanta shite guddino. Kunnira, Yerusaalamete manni Akaaziyaasi Yihudaho moohisi.

² Akaaziyaasi moohi yannara dirisi lemiina lameho. Yerusaalame teesso assi're 1 diro gashshino. Amasi Ataaliya Omiiri beetti beettooti.

³ Akaaziyaasino amasi uyitinosi amaale adhe cubbo loosino. Akiaabinna Akiaabi ooso hadhino doogo ha'rino.

⁴ Annisi reyihu gedensaanni Akiaabi mini manni amaale adhe insante gede Kaaliiqi giwanno coye assino. Insano so'rote giddora eessitinosi.

⁵ Insa mala adhe Israeelete moote Akiaabi beetti Iyoraami ledo Sooriyu moote Azaheeli qasara gaadi. Olantinohu Geleaadi gobbara Raamooti Katamiraati. Iyoraami olu giddo madi'ri.

⁶ Isino mada xagisi'rara Iyiziraeeli Katama ha'ri. Yihudu moote Akaaziyaasino iso la"ara hakkiichira ha'ri.

⁷ Akaaziyaasi Iyoraami la"ara ha'rasi, Maganu hunasira hedino doogooti. Akaaziyaasi hakkiichira iillanni hee'renni, Iyoraami ledo Nimishi beettiwa Iyuwa mari. Iyuno Akiaabi maate gudanno gede Kaaliiqi buurinosi manchooti.

⁸ Iyu Akiaabi mine qorichishanni hee're, Akaaziyaasi dukkisse martinore Yihudu gashshaanonna roduuwisi ooso baala shee gudi.

⁹ Iyu soyino manni Samaariyaho mare Akaaziyaasi hase maaxame nooha afe amade haa're Iyuwa abbe shii. Wolqasi uyitu geeshsha Kaaliiqira soqqaminohu ahaahisi Iyosaafiixi daafira yite madaartusi. Akaaziyaasi mininni Yihudaho moohannohu mittuno digatino.

ATAALIYA YIHUDAHO MOOKKU

¹⁰ Akaaziyaasi ama Ataaliya beettise reyinota affe, Yihudunniha mootete mini manna baala shine gundanni gede assitu.

¹¹ Akaaziyaasira Yihoyaadai yinanni qeesichi adhinoti Yihosheeba yinanni rodoo noosi. Ise shinanna gattinori Akaaziyaasi ooso giddonni mitticho Iyoaasi yinanni beetto awuutosi ledo massite Qullaawu Mini mule noohura gallanni minira maaxxino. Kunni garinni maaxxe Ataaliya shitannosikki gede gatissinosi.

¹² Ataaliya mookke noo yannara Iyoaasi 6 diro wo'ma Qullaawa Mine maaxame hee'rino.