LAYINKI DUDUWO 21 - Qullaawa Maxaafa

¹ Iyosaafiixino annuwasinte gede reenna Daawiti Katamira annuwasi mooggawa madaarroonnisi. Beettisi Iyoraami isi darga amade moohino.

YIHUDU MOOTE IYORAAMI

² Iyoraami roduuwi Iyosaafiixi ooso leeho. Insano: Azaariyaasi, Yihieeli, Zakkaariyaasi, Azaariya, Mikaaeelinna Shefaaxiyaati.

³ Anninsa lowo birra culkanna lowo geeshsha ayirrado uduunne uyinonsa. Mitto mittonka qiinshoonnitera Yihudu katammara worinonsa; gashshoote kayinni bayira ikkino daafira Iyoraamira uyino.

⁴ Iyoraami gashshoote jawaachishi'rihu gedensaanni, roduuwasi baalankanna Israeelete gashshaano giddonni shiima manna shiino.

⁵ Iyoraami moohinohu 32 dirisinniiti; Yerusaalame teesso assi're 8 diro gashshino.

⁶ Akiaabi beetto adhino daafira, isino Akiaabinna wolootu Israeelete mootoolla hadhinota busha doogo ha'rino; Kaaliiqi giwanno coye assino.

⁷ Ikkollana Kaaliiqi Daawiti ledo eino gondoori daafira yee, minisinni moohannohu hoogannokki gede hexxo uyino daafira Daawiti sircho digudino.

⁸ Iyoraami yannara, Edoomi Yihudaho hajajama giwe umisi gashshoote uurrisi'rino.

⁹ Kunnira, Iyoraami olu hajajaanonna faradi gaarruwa baala adhe Edoomira gaadi. Edoomootu gaangeessite heedheennansa, hashsha luuxxe fulte ba'u.

¹⁰ Edoomi gosa hatte yannanni kayisse Yihudu gashshootira gara gibbu. Iyoraami akaakkansa Magano Kaaliiqa agurino daafira, Libina Katami mannino hajajama giwi.

¹¹ Iyoraami Yihudu gaarra aana dagate maganna magansi'nanniwa nafa seekke, Yihudunna Yerusaalamete manna fooranno gede assatenni so'risiisino.

¹² Himanaanchu Eeliyaasi Iyoraamira, «Annikki Daawiti Magani Kaaliiqi, ‹Annikki Iyosaafiixi woy ahaahikki Aasa ha'rino doogo agurte,

¹³ Israeelete mootoolla hadhino doogo amadde, Akiaabinna oososi Israeelete manna Kaaliiqiwiinni huntuhu gede, atino Yihudunna Yerusaalamete manna Kaaliiqi albaanni fooranno gede assootto. Atewiinni woyyitannore annikki ooso roduuwakkino shootto.

¹⁴ Kunnira, kune Kaaliiqi mannakki oosokkinna meentokki qorichishanno; jajjakki baalano gudanno.

¹⁵ Ateno barru barrunkunni lexxanni ha'rannohu godowu fuugi amade shetisannohe› yiino» yee borrote sokka soyisi.

¹⁶ Kaaliiqi Itiyophiyootu mule heedhanno Filisxeemootanna Araboota Iyoraamira diina ikkitanno gede assi.

¹⁷ Insano Yihudaho gaadde, mootete mine noo uduunne gudhitu. Iyoraamiha maa'niidi beetto Akaaziyaasi agurranna oososinna meentosi baala qafadde haadhe hadhu.

¹⁸ Kunni duuchunku coyi gedensaanni, Kaaliiqi Iyoraamira hurannokkiha godowu dhibba soyino.

¹⁹ Dhibbuno bati'reenna 2 diro shetihu gedensaanni reyi. Annuwasi ayirrinyira assini gede, wi'lasira haqqe duunne digiirroonni.

²⁰ Iyoraami moohi yannara dirisi sajjiina lameho. Yerusaalame teesso assi're 8 diro gashshino. Isi gori yannara mararinosihu dino. Daawiti Katamira madaartinosita ikkinnina iso mootoollate waammawa dimassitino.