LAYINKI DUDUWO 2 - Qullaawa Maxaafa

QULLAAWA MINE MINATE ASSINOONNI QIXXAAWO

¹ Selemooni Kaaliiqa magansi'nanniha Qullaawa Minenna umisira mootete mine mi'nate kai.

² Kunnira minnanni uduunne dukke shiqishshannore 70,000 mannanna kinna boccannore 80,000 manna wori. Loonsanni looso towattannore 3,600 mannano wori.

³ Hakkunni gedensaanni Selemooni Xiroosi mootera Kiraamira, «Anni'ya Daawiti mootimmasi mine mi'ni waro daguwu haqqe soottosi. Xa ballo anerano soyie.

⁴ Kune ani Magani'ya Kaaliiqira Mine minate kaoommo. Kuni minino aninna manni'ya Kaaliiqira su'naanno hixaana giirreemmowa, qullaawa timano wo'manka woyite shiqinsheemmowa, barru baala soodonna hawarro shilqote kakkalo shiqinsheemmowa, Fooliishshote Barra, Aganu Leellannoteranna wole ayyaanna ayirrinseemmowa ikkanno. Konne coye Israeelete manni hegere geeshsha assanno gede Kaaliiqi hajajino.

⁵ «Maganinke wole maganna baalantenni roore jawa ikkinohura, ani mineemmohu Qullaawu Minino jawaho.

⁶ Gordunna gordoho aleenni noo gordi nafa di"ikkannosi. Kunni Maganira ikkanno mine minne anfannini? Hixaana giirrannisi geeshshi mine mina agurranna, iso haa'ranno mine mina didandeemmo.

⁷ «Kunnira ati culkanna birra, camonna siwiila daashshanna bule, xiillittenna duume uddano ganate ogimma afi'rino mancho soyie. Isino Yihudahonna Yerusaalamete anni'ya Daawiti qixxeesse worino ogeeyye ledo mitteenni loosanno.

⁸ «Atera haqqa karannohu lowo geeshsha ogeessu manni nooheta macciishshoommona, Libaanoosinni daguwa, hoommenna su'niitanno haqqeno soyie. Ane mannino haqqe ledonsa karanno gede asseemmo.

⁹ Mineemmo mini lowohanna xuma ikkanno daafira, lowo haqqe qixxeessa hasiissanno.

¹⁰ Haqqe karanno mannira 20,000 kuntaala qamadenna 20,000 kuntaala hayixe, 400,000 litire woyinete xajjenna 400,000 litire ejersu zayite soyemmohe» yii.

¹¹ Xiroosi moote Kiraamino Selemoonira, «Kaaliiqi mannasi baxanno daafira ate insara moote assinohe» yee borrote sokka soyisi.

¹² Kiraami lede, «Kaaliiqi Mine minannohanna umisira mootimmate mine mi'nannoha Moote Daawitira hayyicha, egennaamonna ogeessa beetto uyinosihu, Gordonna baatto kalaqinohu Israeelete Magani Kaaliiqi galatamo!

¹³ «Kuneeti hayyichanna ogeessa ikkinoha Huraamiaabi yinanni mancho soommohe.

¹⁴ Isi ama Daani ga'reeti; annisi Xiroosi gobbara ilamino. Culkanna birra, camonna siwiila daashsha, hattono kinchonna haqqe boca, qoleno haqqetenni addi addi uduunne boce seekka dandaanno. Bule, xiillittenna duume shalonni addi addi imaana gananno. Babbaxxino suude kalaqanna akeenke agurroonnire siwiilunna wolu uduunni baalu aana seekka dandaanno. Konne mancho ogimma afidhinori ate manni ledonna annikki Daawiti qixxeessino manni ledo loosanno gede assi.

¹⁵ «Atino yootto garinni qamade, hayixe, woyinete xajjenna ejersu zayite soyinke.

¹⁶ Ninkeno hasi'ratto geeshshi haqqe baala Libaanoosinni karre usurre wayi aananni higge Iyophe geeshsha dirritanno gede assineemmo. Atino hakkiinni Yerusaalame adhite ha'ra dandaatto» yiisi.

QULLAAWA MINE MINA HANANFI

¹⁷ Selemooni alba annisi Daawiti assinte gede Israeelete gobbara hee'rannoha wole gobba manna baala kiirsiisi. Kiirranni woyite 153,600 manna ikkino.

¹⁸ Insa giddonni 70,000 uduunne gurtanno gede, 80,000 gaaru aaninni kinna boccanno gede assino. 3,600 manna looso towatannoha asse worino.