LAYINKI DUDUWO 17 - Qullaawa Maxaafa

IYOSAAFIIXI YIHUDAHO MOOHI

¹ Iyosaafiixi annisi Aasa darga moohe, Israeele qase hoo'late jawaati.

² Qiinshoonnitera Yihudu katamma baalanteranna annisi Aasa qeele amadino katamma Efireemitera bagadaano wori.

³ Iyosaafiixi, annisi Aasa umi yannara ha'rino doogo ha'runsinohuranna Ba"aali maganna mala xa'mi'rinokki daafira Kaaliiqi maassi'rinosi.

⁴ Annisi Maganono magansi'rino; isira hajajamino; Israeelete mootoolla gede busha looso diloosino.

⁵ Kaaliiqino gashshootu angasi geedanno gede assino. Yihudu mannino afansha abbinosi daafira, lowo jironna ayirrinye afi'rino.

⁶ Kaaliiqira wo'mu wodaninni soqqamino. Gaarrate aana noota dagate maganna magansi'nanniwanna Asheera mokkollo baala Yihudu gobbanni gudino.

⁷ Qoleno moohihunni sayikki diro Beeni-Hayili, Abidiyu, Zakkaariyaasi, Naatinaeelinna Mikaya yinanni gashshaano Yihudu katammara rosiissanno gede soyino.

⁸ Insa ledo 9 Leewaawootinna 2 qeesooti no. Leewaawootu su'mi: Shemaiya, Netaaniya, Zebaadiya, Asaheeli, Shemiramooti, Yehonaataani, Adooniyaasi, Xobbiyanna Xobaadooniyaati. Qeesootu su'mino Elishamainna Yihoraamiiti.

⁹ Insano Kaaliiqiha Seeru Maxaafa haadhe hadhe Yihudu katamma baalate noo mannira rosiissu.

IYOSAAFIIXI JAWAANTE

¹⁰ Yihudu gaangaawira noo gosa baala Iyosaafiixi aana ola fantannokki gede Kaaliiqi waajjille naqinonsa.

¹¹ Filisxeemete manni mitu mitu lowo birranna addi addi afansha abbisi. Arabete manni qole 7,700 ge'reewu goccanna 7,700 meu gocca abbisi.

¹² Kunni garinni Iyosaafiixi wolqate aana wolqa lexxi. Yihudaho qiishonna katamma seekki'ri.

¹³ Tenne katammara lowo geeshsha bati'ra uduunne wodhino. Olaho fullahino manna qole Yerusaalamete wodhino.

¹⁴ Yihudunni fille fushshinoonni olantora roorrichu Adinaati. Isi 300,000 olanto hajajanno; insano boosaalli boosaallinsa garinni gaamantino.

¹⁵ Layinki roorrichi Yihohanaani 280,000 olanto hajajanno.

¹⁶ Sayikki roorrichi Ziikiri beetti Amaasaya 200,000 olanto hajajanno; isi Kaaliiqira soqqamate umisinni baxe einoho.

¹⁷ Biiniyaami ga'renni filloonni olantora qaru roorrichi Eeliyadai bareeda bagadaanchooti. Isi wonqonna urde amaxxitinore 200,000 olanto hajajanno.

¹⁸ Isira layinki roorrichi Yehozabaadi bagadoho feeffattinore 180,000 olanto hajajanno.

¹⁹ Kuri Yihudaho qiinshoonni katammara worino olanto agurranna addinni moote Iyosaafiixira soqqantannoreeti.