LAYINKI DUDUWO 16 - Qullaawa Maxaafa

ISRAEELETE MOOTE BAASHA YIHUDA QASI

¹ Aasa moohihunni sajjiina leelki diro, Israeelete moote Baasha Yihuda gaade, mannu Yihudu gobba eannokki gedenna hakkiinnino fulannokki gede hoolara Raama qiisho qiishi'ri.

² Kunnira Aasa Qullaawa Minenna mootete mine nooha birranna culka fushshe Sooriyu Mootera Benihadaadira afansha asse Demaasiqo soyi. Afanshu ledono,

³ «Alba anni'yanna annikki assitunte gede, aninna atino mimmitoho gondooro e'no. Kuni birrunna culkuno atera soommoheho. Israeelete mooteta Baasha olanto gobba'yanni qase fushshate kaa'lattoe gede isi ledo namooma agurattora huucci'reemmohe» yitanno sokka soyi.

⁴ Benihadaadino Aasa yiino coyira sumuu yee, olantosi Israeelete katammara bala tugganno gede soyi. Insano marte Iyooni, Daani, Abeeli-Beeti-Maakanna sinqe duunnannita Nifitaalemi katamma baala qeelte amaddu.

⁵ Baasha konne coye macciishshe Raama qiishi'ranni noo qiisho aguri.

⁶ Hakkunni gedensaanni moote Aasano Yihudu manna baala adhe mare Baasha Raama qiishi'rara gamba assi'rino kinnanna haqqe baala hakkiinni haa're masse Geebanna Mitsipha katammara qiishi'ri.

HIMANAANCHU HANAANI AASA BOROORI

⁷ Hatte yannara himanaanchu Hanaani Yihudu mootewa Aasawa daye, «Maganokki Kaaliiqa addaxxa agurte Sooriyu moote hexxootto daafira, Israeelete olanto angakkinni fulte hadhino.

⁸ Itiyophiyootunna Liibiyootu lowo olanto, faradi gaarenna faradu noonsare di"ikkitino? Ikkollana hatte yannara Kaaliiqa addaxxootto daafira isi qeelle uyinohe.

⁹ Isira gudisante aamantinore jawaachishate, Kaaliiqi baatto baala illaallisanno. Xa ati gowwimmate looso loosoottohura kunni ka'a olu atewiinni dibaxxanno» yiisi.

¹⁰ Kuni coyi hanqisinosi daafira Aasa himanaancho usurinosi. Hatte yannanni kayise Aasa mito mito manna shetisa hanafi.

AASA GASHSHOOTI GOOFIMARCHO

¹¹ Moote Aasa yannara ikkino coyi hanafotenni kayise goofimarchu geeshsha noohu baalu Yihudunna Israeelete mootoolla dhagge ledo borreessame no.

¹² Aasa moohihunni sajjiina honsikki diro, lekka jaddo dhiwamino. Ikkeennano xagissannore ikkinnina Kaaliiqi kaa'lo dihasi'rino.

¹³ Dhiwamihunni lamu diri gedensaanni annuwasinte gede reenna,

¹⁴ Daawiti Katamira umisira kincho kurkure seekki'rino waammara madaarroonnisi. Reeshshasino su'niitanno shiilonninna shittotenni cuukkite, ayirrinyisira yite lowo haqqe duunte giirtanni wi'litinosi.