LAYINKI DUDUWO 14 - Qullaawa Maxaafa

YIHUDU MOOTE AASA

¹ Abiya annuwasinte gede reenna, Daawiti Katamira madaarroonnisi. Beettisi Aasa isi darga amade moohi. Aasa yannara baatto 10 diro keere heedhu.

² Aasa Maganisi Kaaliiqi albaanni danchanna suwashsho coye assino.

³ Wole magannaha kakkalote darga, gaarrate aana magansi'nanni darganna sooddiyye diigino. Asheerara uurrinsoonni mokkollo murmurino.

⁴ Yihudu manni akaakkansa Maganita Kaaliiqi hedo wonshanno gedenna seerasinna hajajosi agadhanno gede hajajino.

⁵ Yihudu katammara kaphu maganna magansi'nanniha gaarrate aana noohanna hixaana giirranni uduunnicho baala gudeenna, isi yannara gobba keere ikkitu.

⁶ Isi Yihudu katammara qiisho qiishino. Kaaliiqi keere uyinosi daafira, lowo yanna geeshsha isi ledo gaaraminohu dino.

⁷ Aasa Yihudu mannira, «Amme kinchu huxxa, shaenna waawanna afidhino waalchuwa seekkine katammanke qiinshona. Maganinke Kaaliiqi hedo wonshinoommohura kuneeti baatto anganke no. Agare, raga baalaho keere assinonke» yii. Insano katama qiishidhe qiniitaabbe heedhu.

⁸ Aasara Yihudu ga'rera 300,000 lowiddaanna wonqonna amaxxo amaxxitino olanto, Biiniyaami ga're giddo qolte shiimmaadda wonqonna digaana suxxitinori 280,000 olanto noosi. Kuri baalu bareedda olamaasineeti.

⁹ Zaara yinanni Itiyophiyichi 1,000,000 olantonna 300 faradi gaare adhe Yihuda qasara Maaresha yinanni katami geeshsha dayi.

¹⁰ Aasano gaaramara fuli. Lamunku Maaresha mule Tsefata Lagichira darga dargansa amadde olaho qixxaabbu.

¹¹ Hatte yannara Aasa Maganosi Kaaliiqa, «Kaaliiqa'ya! Wolqa hoogginore wolqaataammuwiinni gatisannohu ate gedeehu dino. Maganonke Kaaliiqa! Ninke kune ate hexxine su'makki addaxxine tenne wolqaataame olanto ledo gaarammammora dangoommona kaa'linke. Kaaliiqa! Ati Maganonkeeti. Qeelannohehu mittuno dino» yaanni huucci'ri.

¹² Kaaliiqino Itiyophiyoota qeeltanno gede Aasanna Yihudu olanto kaa'linsa. Itiyophiyootuno xooqqu.

¹³ Aasanna olantosi Geraara Katami geeshsha shorritunsa. Itiyophiyunniti lowo olanto gooffino daafira galagalte higge qasa didandiitino. Kunni garinni Itiyophiyu olanto Kaaliiqinna olantosi albaanni qeelantu. Yihudu mannino lowo qafado gudhi.

¹⁴ Geraari qooxeessira noori baalu Kaaliiqi assino coye la'e waajjitino daafira, Aasa olanto katamma mucuqqi assite guddu. Katamma baalanta soqqe lowo jajja gudhitu.

¹⁵ Qolteno mitte basera baxxisi're saadate ledo noo manni aana ola fante ge'reewo, me"enna gaalla horritu. Hakkunni gedensaanni galagalte Yerusaalame higgu.