LAYINKI DUDUWO 13 - Qullaawa Maxaafa

ABIYA IYORBIAAMI LEDO OLAMI

¹ Iyorbiaami Israeelete moohihunni tonaa settikki diro Abiya qole Yihudaho moohi.

² Abiya Yerusaalame teesso assi're Yihuda 3 diro gashshino. Mikaya yinanniti amasi Gibia Katami manchi Urieeli ilinote. Abiyanna Iyorbiaami mereerono olu kai.

³ Abiya 400,000 olanto adhe gaadita, Iyorbiaami qole 800,000 olanto adhe kai.

⁴ Abiya gaaraame Efireemi gobbara Tsemarayimi Ilaalira fule uurre, «Iyorbiaaminna Israeelete manni baalu macciishshe!

⁵ Israeelete Magani Kaaliiqi Daawitinna sirchisi Israeelete hegere geeshsha mookkanno gede soorramannokki gondooro uyinota diaffinoonni?

⁶ Selemooni soqqamaanchi Naabaaxi beetti Iyorbiaami kayinni mootichisi aana kaino.

⁷ Shiima yanna gedensaanni tidhitinokki addi-fulooti Iyorbiaamiwa gamba yitu. Selemooni beetti Roobiaami anje afi'rino daafiranna hayyo xe'e noosi daafira kuni manni wolqisinosi.

⁸ «Xa ki'neno Kaaliiqi Daawiti sirchira uyinota gashshootu roorre ittissinara heddinoonni. Hedo'ne wonshi'rate lowo olantonna magansidhinara Iyorbiaami culkunni seekkisiisinota siittu misilla adhitine dagginoonni.

⁹ Kaaliiqi qeesoota Aarooni sirchonna Leewaawoota shorritine, wole gosa gede umi'ne qeese wodhitinoonni. Mitto woraamonna 7 ge'rechu gocca haa're abbe umosi baxxinoha assi'rara daannoha baala maganna'nera qeesicha assidhinanni.

¹⁰ «Ninkera kayinni xaano Maganinke Kaaliiqaati; iso diagudhinoommo. Aarooni sircho ikkitino qeesootino Kaaliiqira soqqama diagurtino. Leewaawootuno kaa'litanni noonsa.

¹¹ Soodonna hawarro wo'manka woyite tanni yee su'naanno hixaananna shilqote kakkalo Kaaliiqira shiqishshanno. Qullaawa Tima seeru garinni keereensinoonni xarapheezzi aana wortanno. Hawarro hawarro culkunni seekkinoonnihura caabbicho worranni uduunnichi aana noo caabbiyye xawissanno. Ninke Maganinke Kaaliiqi hajajo wonshineemmo; ki'ne kayinni agurtinoonni.

¹² Ninkera albisannohu Maganoho; qeesootisino ki'ne aana ola fanneemmo gede xurumba ufuuffara qixxaabbe kune ledonke no. Israeelete manna, diqinaanno'nena, akaakka'ne Magani Kaaliiqi ledo gaarantinoonte» yii.

¹³ Hakko mereero Iyorbiaami gamisa olanto Yihudu olantora badheenni ri'e agartanno gede soye, gattinori Yihudu olantora albaanni uurritanno gede asse no.

¹⁴ Yihudu manni gaangeessitinonsata afe kaa'lannonsa gede Kaaliiqiwa hige raari; qeesootuno xurumba ufuuffu.

¹⁵ Yihudu manni qoonqo naggi asse alaakanni Abiya albisanna ola fani. Maganuno Iyorbiaaminna Israeelete olanto baala qeeli.

¹⁶ Israeelete manni Yihudu manni albinni xooqi. Maganuno Yihudu mannira sayise uyinsa.

¹⁷ Abiyanna mannisi, Israeelete olanto lowo geeshsha gawajjitu. Kunni olinni Israeelete giddonni 500,000 jawaata olanto reyitino.

¹⁸ Yihudu manni akaakkansa Magano Kaaliiqa addaxxino daafira qeelle afi'ri; Israeelete mannino sholli.

¹⁹ Abiya Iyorbiaami olanto shorre Beeteli, Yishanaaninna Efirooni katamma qooxeessinsara noo qachuwa ledo qeele angara adhi.

²⁰ Abiya gashshooti yannara Iyorbiaami layinkimeeshsho wolqa diafi'rino. Hakkunni gedensaanni iso Kaaliiqi qoome shiino.

²¹ Abiya kayinni roore jawaati; 14 meento adhe 22 labballi oosonna 16 seenne ilino.

²² Wole Abiya dhagge, coyi'rino coyinna loosino loosi baalu himanaanchu Iddo maxaafira borreessame no.