LAWISHSHA 25 - Qullaawa Maxaafa

LENDE GAMBA ASSINOONNITA SELEMOONI MASALO

¹ Tini Selemooni masaluwa Yihudu moote Hiziqiyaasi gashshooti giddo noo manni borreessinote.

² Magano coye maaxasira ayirrinsannisi; mootoolla kayinni coye xawo fushshansara ayirrinsanninsa.

³ Mootoollate hedo gordu gede xeerto, baaru gede diime ikkitinohura, iillinara didandiinanni.

⁴ Birra ko'rishshe ximbiiwittoro, daashshannohuno isinni danchare seekkanno.

⁵ Hattonni mootete albinni busha mala hooli; gashshootisino halaalu aana xintaminoha ikkanno.

⁶ Mootete albaanni leellama hasidhooti; jajjabbu ledo qote taalate halchitooti.

⁷ Ofolloottowiinni kayinseenna ayirradu manni albaanni shollattontenni, «Kawa amo» yineenna mare ofolla woyyitannohe.

⁸ Halaalu wolunniha ikkeenna garante saalfatattokki gede, mitto coye affanni heedhenni muddante gashshaanonniwa massitooti.

⁹ Coye coyi'ramattohu ledo coyi'rami ikkinnina, wolu fojo fantooti.

¹⁰ Hakkunni ka'a kayinni, macciishshannohu mishannohe; mitte hige bainoha su'makki qolte seekkidhe diafatto.

¹¹ Garunni coyi'noonni coyi, birru mereero worroonni culki gedee xu'maati.

¹² Egennaammu seejjo macciishsha, culku qalawate woy culku irri gedeete.

¹³ Qiidino wayi fooggalo gabbi assannonte gede, ammanamino sokkaanchi soqqinohu wodana tashshi assanno.

¹⁴ Aannokkire eemmo yaanni duduwanno manchi, xeenu nookki gomichinna bubbe gedeeho.

¹⁵ Wodaninni coyi'ra gashshaancho ammansiissanno; ga'labbichu hasaawi miqicho eanno.

¹⁶ Malawo ikkannohe geeshsha calla iti; quwa sayisse itittoro tushshiishannohe.

¹⁷ Bagannohehanna giwannoheha ikkannona, jaalikki minira batinyeegge martooti.

¹⁸ Jaalisi aana afinokkire coyi'rannohu, bisete, dullunna qunxoonni maxxi gedeeho.

¹⁹ Qarru yannara yawaawula mancho hexxa, lellenqitino hinkonni corqatenna, naafitte lekkanni ha'rate ledo rodoote.

²⁰ Dadilline hee'neenna faarso faarsa, qiidi'ne hee'neenna uddano mulqatenna, madate aana caarsannoricho dunate gedeeti.

²¹ Baarigaarikki hudi'riro itisisi; goo'rirono hayikkisisi.

²² Hatto assittoro, saalfate umo heeshshi yaanno; Kaaliiqino assoottorira danchumma qolannohe.

²³ Aliyye bubbe abbitanno bubbe gede, hemeno mannu alba tunsiissanno.

²⁴ Afoo busha galte ledo mitto mine galantenni, gobba hee'ra woyyate.

²⁵ Xeerto gobbanni daannoha dancha duduwo macciishsha, goo'ne hee'ne qiidino waa agate gedeeti.

²⁶ Cubbaataamu ikkito rosanno keeraanchi, sabbaawino xashshinna boo'raabbino buicho gedeeho.

²⁷ Malawo batisi're ita dancha di"ikkitino; lowo geeshsha janjanni gede hasi'ra ayirrinye diuyitanno.

²⁸ Umosi qeelinokki manchi, huxxu diigameenna fano noo katami gedeeho.