LAWISHSHA 23 - Qullaawa Maxaafa

-6-

¹ Ayirradu manchi ledo itattora ofollatto woyite, albakkiinni noore wodanchite lai.

² Itate kokke fa'nituherono, atenee ittisi'ri.

³ Xagarrote shiqinshoonnita ikkitannona, coommitino sagale doggoonkehe.

-7-

⁴ Jirote yite atenee orbaassooti; hakko daafurinni gatate egennaamo ikki.

⁵ Jiro iima hige buuwanno allamurchi gede, ati la'anna hedeweelcho qoola assidhe buubbe ba'anno.

-8-

⁶ Do'nichu manchi sagale ittooti; coommitannoti sagalesi halchishshoonkehe.

⁷ Wodanisinni sagale fushshitannore calla hedanni, goowi alita iti agi yaannohe.

⁸ Itise kae tushshiishannohe; guwisittosi guwishshino mullare ikke gatanno.

-9-

⁹ Dancha coyekki mullare asse hunannona, gowwaho sirnya hasaabbooti.

-10-

¹⁰ Alba worroonni danna xiibbooti; annanna ama afidhinokki ooso baatto adhitooti.

¹¹ Kaaliiqi golonsaatina, insa daafira isi coyi'ramanno.

-11-

¹² Wodanakki seejjote widira, maccakkino egennote qaaliwa qoli.

-12-

¹³ Wodambu dishaannona, ooso seejjate huluullantooti.

¹⁴ Wodambunni gana isinni, lubbo reyotenni gatisate.

-13-

¹⁵ Beetto'ya, ate wodani egennaamo ikkiro, anera tashshi yaannoe.

¹⁶ Arrawikki dancha coyi'ranno woyite, lubbo'ya hagiidhitanno.

-14-

¹⁷ Wodanikki cubbaataamma hinaasoonke; barra baala Kaaliiqa waajjatenni hee'ri.

¹⁸ Hatto assittoro, hexxokki diba'anno.

-15-

¹⁹ Beetto'ya macciishshi; egennaamo ikki; wodanakkino halaalaancho doogo widira qoli.

²⁰ Agaasinete ledo hossooti; lowo maala ita baxxannori ledono waartooti.

²¹ Dimbaasinenna itaasine buxxanno; goxanote batinyino hoccaame uddano uddisiisanno.

-16-

²² Ilinohehu annikki yaannore macciishshi; amakkino geedhitanno yannara mishshootise.

²³ Halaale afi'ri ikkinnina hu'nitooti; egenno, afanna wodanchano hooggooti.

²⁴ Keeraancho beetto afi'rino annira, lowo geeshsha tashshi yaannosi. egennaamo beetto ilinohuno hagiidhanno.

²⁵ Annikkinna amakki hagiidhitannohe gede ikki iltinoheta tashshi assise.

-17-

²⁶ Beetto'ya ballo, yeemmore seekkite macciishshi; ani ha'reemmo doogo higge ha'ri.

²⁷ Foora mancho qile bale gedeete; saaliweelo meyatino woshshaadote.

²⁸ Mulqidhannori gede dugganno; lowo manna yawaawuloota assitanno.

-18-

²⁹ Raarannohu ayeti? Dadillannohu ayeti? Mannu ledo giwamannohu ayeti? Gaabbannohu ayeti? Beebbatenni madi'rannohu ayeti? Ille duu'mannohu ayeti?

³⁰ Agunni gale hosannoha di"ikkino? Haaro agatto hasanni ha'rannoha di"ikkino?

³¹ Woyinete xajje kokkete coommitanno daafira, birillete xabbanno woyite ise widira higge la'ooti.

³² Gedensaanni hamashshu gede qassanno; buutete gede idditanno.

³³ Illete xawute ganannohe; garunni hedanna coyi'ra didandaatto.

³⁴ Goxoottowa daallasu doyannohe; ka'anna kawa suutto ga'nitanni noottoha lawannohe.

³⁵ «Gannoonnieha ikkanno; kayinnilla diqaageemmo. Awwaaltinoeha ikkanno; kayinnilla leellinoeri dino. Kunnira kae agatto hasi'ro ikka?» yaatto.