LAWISHSHA 15 - Qullaawa Maxaafa

¹ Shaqqadu arrawi hanqo qiissanno; kaajjadu qaali kayinni hanqo kakkayisanno.

² Egennaamu arrawinni egenno fultanno; gowwu afiinni kayinni giwwimma burqitanno.

³ Kaaliiqi ille darga baala la'anno; danchano bushano affanno.

⁴ Shaqqadu arrawi hursanno; xagaraamu arrawi kayinni wodana hiiqqanno.

⁵ Gowwu beetti annu seejjo mishanno; seejjo adhannohu kayinni busuleho.

⁶ Keeraanchu manchi mine jiro wo'mitanno; bushu manchi jiro kayinni qarra abbitanno.

⁷ Egennaamu arrawi egenno halashshanno; gowwootu hedo kayinni hattoota di"ikkitino.

⁸ Kaaliiqi bushuullu kakkalo giwanno; keeraanote huuccatto kayinni tashshi assitannosi.

⁹ Kaaliiqi cubbaataammu doogo giwanno; danchummate hoode ha'rannoha kayinni baxanno.

¹⁰ Halaalu doogonni wirri yaannoha qorichu agarannosi; seejjo giwannohuno reyanno.

¹¹ Jeennaatu giddo noore afanno Kaaliiqi, mannu wodani giddo noore hiitto afa hooganno?

¹² Haariimaanchu seejjinannita dibaxanno; egennaamu manninnino dima'lanno.

¹³ Wodanu hagiidhiro albu xawanno; dadillu kayinni wodana hiiqqanno.

¹⁴ Egennaamu egenno hasi'ranno; gowwu kayinni gowwimmasi corqanno.

¹⁵ Qarraataammaho barru baalu yaaddote; hagiirraammaho kayinni wo'manka woyite jilaho.

¹⁶ Duroo'mine qarru giddo hee'rantenni, bunxe hee'ne Kaaliiqa waajja roortanno.

¹⁷ Gimbanna intanni maalinna malawinni, banxanna intanni raafo woyyate.

¹⁸ Rahe hanqanno manchi gibbo kalaqanno; cincaaleessu kayinni hanqo qiissanno.

¹⁹ Cee'maleessu doogo utunni huxxinoonnite; qinaadu doogo kayinni xalalate.

²⁰ Egennaamu beetti annasi hagiirsiisanno; gowwu kayinni amasi mishanno.

²¹ Gowwaho hambe hagiirreho; afino manchi kayinni taalo doogo amade ha'ranno.

²² Malu hoogiro hendoonniri ikkikkinni gatanno; malu seyiro kayinni halchinoonniri wo'manno.

²³ Labbino dawaro qola hagiirsiissanno; yannasira coyi'noonni coyi hiittoo danchaati!

²⁴ Egennaamu manchi jeennaate eessitannokkita, iimira heeshshonniwa massitanno doogo hige ha'ranno.

²⁵ Kaaliiqi boonaleessu mine diiganno; galte shiidhino mancho jajja kayinni agaranno.

²⁶ Kaaliiqi bushu manchi hedo giwanno; fayyaaleessu coyi'ranno coyi kayinni hagiirisiisannosi.

²⁷ Hanaaqe jiro gamba assi'rannohu, minisira qarra abbi'ranno; gubbo itannokkihu kayinni seeda diro hee'ranno.

²⁸ Keeraanchu manchi hede coyi'ranno; bushu manchi arrawo gobbaanni afi'rino.

²⁹ Kaaliiqi bushuulluwiinni fafe no; keeraanote huuccatto kayinni macciishshanno.

³⁰ Hisataamo alba la"a wodana hagiirsiissanno; dancha duduwo macciishsha jawaachishshanno.

³¹ Heeshsho uyitanno seejjo macciishshannohu, egennaammu ledo kiiramanno.

³² Seejjo mishannohu umosi mishanno; seejjo adhannohu kayinni wodancha afi'ranno.

³³ Kaaliiqa waajja egenno rosate; umo heeshshi assano ayirrinye abbitanno.