LAWISHSHA 1 - Qullaawa Maxaafa

EGENNO NAADA ( 1:1—9:18 ) LAWISHSHU MAAHO KAA'LANNO?

¹ Tini lawishshuwa Israeelete moote Daawiti beetti Selemooni coyi'rinoreeti.

² Lawishshuwano egennonna dancha amaale buuxate maammaashshunnita giddoyidi hedo xawisanno coye afate kaa'litanno.

³ Ammanamatenni, sumbetenni, taashshatenninna hayyotenni hee'nanni gara mannaho rosiissanno.

⁴ Egenno ajjinonsa manni wodancha, aju mannino egennonna hayyo afi'ranno gede assitanno.

⁵ Tini lawishshuwa egennaamu egenno lexxanno gede, busuluno lede huwanyoote afi'ranno gede assitanno.

⁶ Qolteno, lawishshanna maammaashshu tiro hayyoolete hibbono afate kaa'litanno.

BUSHA JAALA QOROPHINANNI GEDE UYINOONNI SEEJJO

⁷ Kaaliiqa waajja egennote umoho. Hawanyootu egennonna seejjo mishshanno.

⁸ Beetto'ya ballo, annikki amaalannohere macciishshi; amakki rosiissannohereno mishshooti.

⁹ Seesallitte ba'latto umoho, culku irrino goowaho biinfille ledannonte gede, annikkinna amakki amaaleno akata seekkitannohe.

¹⁰ Beetto'ya ballo, bunshe loossannori ledonsa hosate aduultuhero, sumuu yitooti.

¹¹ «Amo doogote gaa'line agarre keeraano shinona.

¹² Reyitinore waamma egemmitannonte gede, ninkeno insa lubbotenni heedheennanni egemmineemmo; bale eanno manni gede assineemmonsa.

¹³ Lowoha dancha uduunne adhineemmo; mulqine adhineemmo uduunne mine wonshi'neemmo.

¹⁴ Ninke yinummota ikkittoro, adhineemmo jajja ledonke beeqqatto» yitannohena,

¹⁵ beetto'ya ballo, hattoo manni ledo hadhooti; insawa gamba yitooti.

¹⁶ Lekkansa bunshete rakkanno; wo'manka woyite manna shaate qixxaabbanno.

¹⁷ Amandanni ceicho affanna woshshaado diworranni.

¹⁸ Hatto assitannori kayinni, shitannonsa woshshaado uminsara wodhitanno.

¹⁹ Mulqi'ra mulqi'rannohura baote doogooti; gawalonsano hakkiichooti.

EGENNO COYIDHANNO

²⁰ Egenno dooggatenna gudumaaleho qoonqose naggi assite woshshitanno.

²¹ Katamu waalchuwaranna mannu gamba yaanno darga baalaho qoonqose naggi assite woshshitanno.

²² Iseno, «Ki'ne egenno xe'ino'neri, hambe'nenni heedhinannihu mamooti geeshshaati? Egennote aana haariintinannihu mamooti geeshshaati? Egenno gibbinannihuno mamooti geeshshaati?

²³ Seejjo'ya macciishshe; dancha amaale'ya fane agureemma'ne; egenno'yano beeheemma'nena.

²⁴ Anewa dagginanni gede anga'ya fane woshshoomma'ne. Ki'ne kayinni macciishsha dihasidhinoonni; ani yeemmareno dunqulli assitinoonni.

²⁵ Amaale'ya baala mishshinoonni; seejjo'yano diadhitinoonni.

²⁶ Kunnira, qarru iillanno'ne yannara oso'leemma'ne; masillu amadanno'ne woyite,

²⁷ rakku hombobolattete gede, qarru bubbete gede, shettonna dadilluno lolahimma daanno'ne woyite qacifateemma'ne.

²⁸ Hatte yannara, woshshidhinannie. Ani kayinni yee diyeemma'ne; diinaggaabbine hasidhinannie; ikkeennano diafidhinannie.

²⁹ Egenno lexxate dihasidhinoonni. Kaaliiqano waajja gibbinoonni.

³⁰ Amaale'ya dihasidhinoonni; seejjo'yano mishshinoonni.

³¹ Kunnira, ki'nera malino qoricha adhitinanni; xagarro'ne gumano ittinanni.

³² Egenno xe'ino manna afa hoogansa shitannonsa. Hawanyootano lashshi assansa huntannonsa.

³³ Ani yeemmare macciishshannohu kayinni, keere afi'ranno. Yaaddo nookkiha harshammi yee hee'ranno» yitanno.