KIIRO 7 - Qullaawa Maxaafa

QULLAAWU DUKKANI MAASSORA ROORROOTU SHIQISHSHINO AFANSHA

¹ Muse Qullaawa Dukkana uurrisihu gedensaanni, Dukkananna giddosi noo uduunne baalanka buuri. Kakkalote darganna ledo noo uduunne wo'manka buure qullaawoota assi.

² Hakkunni gedensaanni, Israeelete ga're baalate giddo roorroota ikkitinori, manna kiirri waro annimma uyinoonninsari Qullaawu Dukkaniwa ka'e dagge,

³ afanshansa Kaaliiqira shiqishidhu. Uyidhino afanshino lamu lamu roorrooti su'minni mitte gaareeti, mittu mittu roorrichi su'minni 1 bootooti, 6 gaareetinna 12 boottaati. Kore baalanka haadhe Qullaawu Dukkaniwa shiqishshu.

⁴ Kaaliiqino Musera,

⁵ «Qullaawu Dukkani hajara ikkanno gede konne baalankare haadhe, mittu mittunku Leewaawichi soqqamanno soqqanshora hasiisanno deerrinni uyi» yiisi.

⁶ Museno gaarenna bootta haa're Leewaawootaho uyi.

⁷ Gershooni ilama soqqanshonsara hasiissannota 2 gaarenna 4 bootta uyi.

⁸ Meraari ilama soqqanshora hasiissannota 4 gaarenna 8 bootta uyino. Insa soqqansho Aarooni beetti Itaamaari annimmatenni towatino.

⁹ Uyinoonninsa annimma garinni qullaawa uduunne qotinsara duha hasiissannonsa daafira, Muse Qehaati ilamara uyinonsari dino.

¹⁰ Kakkalote uduunnicho maassi'ni barra, roorrootu kakkalote uduunnichi maassora afansha abbitu.

¹¹ Kaaliiqino Musera, «Kakkalote uduunnichi maassora tonaa lamunku maassote barrinni mittu mittu roorrichira afansha shiqishate annimma uyi» yii.

^12-83 Afanshansano kunninni aane noo garinni shiqishshino: Umi barra, Yihudu ga'renni Aminaadaabi beetti Neasooni, layinki barra Yisaakoori ga'renni Tsoaari beetti Naatinaeeli, sayikki barra, Zaabilooni ga'renni Helooni beetti Eeliaabi, shoolki barra Roobeeli ga'renni Shedeuuri beetti Elitsuuri, ontikki barra Simiooni ga'renni Tsurishaadayi beetti Shelumieeli, leelki barra Gaadi ga'renni Deueeli beetti Eeliyaasaafi, lamalki barra Efireemi ga'renni Amihuudi beetti Elishamai, settikki barra Minaase ga'renni Phedaatsuuri beetti Gemaalieeli, honsikki barra Biiniyaami ga'renni Gidiooni beetti Abidaani, tonnikki barra Daani ga'renni Amishaadayi beetti Ahiezeeri, tonaa mitikki barra Aseeri ga'renni Okiraani beetti Faagieeli, tonaa layinki barra Niftaalemi ga'renni Enaani beetti Ahirai shiqishino. Kunni garinni baalunku uyitino afanshi mittu gariho. Hakkuno Qullaawu Dukkani keenaasinchi garinni keenneenna mitte kiilonna darate ikkanno birrinni seekkinoonniti xiltaame saane, 800 giraame keentannoti birrunni seekkinoonniti hayishshi'nanni saaneeti. Lamentera gidu kakkalora ikkitannota zayitetenni liinsoonni bullee wonshinoonni; 110 giraame keentannoti culkunni seekkinoonni dissite hixaana giddo wonshinoonnite; shilqote kakkalora 1 middicha, 1 ge'rechu goco, mittu diriha 1 ge'rechu goco, cubbo agursiisate shiqinshanniha 1 meichu goco, mittimmate kakkalora tonaa lamunku albisooti bado badotenni 2 woraamma, 5 ge'reewu gocca, 5 meu goccanna mittu dirire 5 ge'reewu gocca shiqishshu.

^84-88 Tonaa lamunku albisooti kakkalote uduunnichi maassora abbitino afanshi mitteenni: 27 kiilonna 600 giraame keentannoti 12 xiltaame saannanna 12 hayishshi'nanni saannaati; 1 kiilonna 320 giraame keenanno hixaana wonshinoonnita 12 culkunni seekkinoonni disituwa, 12 woraamma, 12 ge'reewu gocca, 12 mittu dirire ge'reewu wilii'le, insa ledono shilqote kakkalora gidu fushshaate shiqishshu. Cubbo agursiisate kakkalora, 12 meu goccaati; mittimmate kakkalora: 26 woraamma, 60 ge'reewu gocca, 60 meu gocca, mittu dirire 60 ge'reewu wilii'le shiqishshu. Israeelete albisooti konne baala afansha kakkalote uduunnicho maassi'ni barra uyitino.

⁸⁹ Muse Kaaliiqi ledo hasaawara Dukkanu giddora ei yannara, Kaaliiqi kirubeeli mereero noohura Gondooru Taabooti tuani aana hee're coyi'ranna macciishshi.