KIIRO 33 - Qullaawa Maxaafa

ISRAEELE GIBITSETENNI KA'E MOAABI HADHU GEESHSHA BAXXISIDHINO GOBBA

¹ Israeele ga're ga'rensanni gaamante Musenna Aarooni albissannansa Gibitsetenni fulte hadhanni heedhe baxxisidhino gobba,

² Kaaliiqi hajajino garinni Muse borreessino.

³ Umi agani eihunni tonaa ontikki barra umiha Mararrote Ayyaana ayirrissuhunni layinki barra Israeele Gibitsootu uurrite la'anni heedheennanni, be'e yitukkinni Raamise Kataminni fulte hadhino.

⁴ Hatte yannara Gibitsootu Kaaliiqi shiinota bayira oosonsa madaadhitanni no. Kaaliiqi Gibitsete magannano qorichishino.

⁵ Israeele Raamisenni ka'e Sukooti marte baxxisidhu.

⁶ Sukootinni ka'e halalli qaccera Etaami yinanniwa marte baxxisidhu.

⁷ Hakkiinni ka'e galagalte Pihahirootira higge Beaalizafoonira soojjaatoonni Migidooli mule baxxisidhu.

⁸ Pihahirootinnino ka'e Duumo Baara tayisse fulte Suuri yinanni halalla hadhu. Suuri Halalla 3 barra hadhuhu gedensaanni marte Maara yinanniwa baxxisidhu.

⁹ Maaranni ka'e, 12 wayi bu'anna 70 saattu haqqe noowa Eleemi yinanniwa marte baxxisidhu.

¹⁰ Eleeminnino ka'e Duumu Baari mule baxxisidhu.

¹¹ Duumu Baari mulinni ka'e, Siini Halalla dagge baxxisidhu.

¹² Siini Halallinni ka'e Daafiqa baxxisidhu.

¹³ Daafiqanni ka'e Eluusi dagge baxxisidhu.

¹⁴ Eluusinni ka'e Rafidiimi baxxisidhu. Hakkiicho wayi nookki daafira aggannore diafidhino.

^15-37 Rafidiiminni ka'e Hoori Ilaala iillitu geeshsha baxxisidhino gobba: Siina Halalla, Qibirooti-Hataawa, Hatserooti, Riitima, Remooni-Faareesi, Libina, Riisa, Qehelaata, Shaafiri Ilaalira, Haraada, Meqihelooti, Tahaati, Taara, Mitiqa, Hashimoona, Miserooti, Bineyaiqaani, Hori-hagiidigaadi, Yoxibaata, Abiroona, Etsiyoonigabiiri, Tsiini Halalla (Qaadesi), Edoomi qaccera noohu Hoori Ilaalaati.

³⁸ Kaaliiqi hajajino garinni qeesichu Aarooni Hoori Ilaala fule, Israeele Gibitsetenni fultuhunni shoyilliikki diro ontikki agani eihunni umi barra reyi.

³⁹ Aarooni reyanno waro dirisi 123.

⁴⁰ Kana"aani gobbara wodiidoonni hee'rannohu Kana"aanichu Araadi moote, Israeele dagganni noota macciishshi.

^41-47 Hoori Ilaalinni ka'e Abariimi Ilaala iillita geeshsha baxxisidhino gobba: Selmooni, Punooni, Abooti, Moaabi gobbara Abariimi hoxxe, Dibongaadi, Almooni-Dibilatayimi, Nebo Ilaali mule Abariimi ilaallaati.

⁴⁸ Abariimi Ilaallanni ka'e Yordaanoosi Wayi mule Iyyaarkora albaanni Moaabi Xawira marte baxxisidhu.

⁴⁹ Yordaanoosi Wayi mule Moaabi Xawira Beetiyeshimootinni kayisse Abeeli-Shixiimi geeshsha baxxisidhu.

⁵⁰ Iyyaarkora widoonni Yordaanoosi mule Moaabi Xawira heedheenna Kaaliiqi Musera,

⁵¹ «Israeelete, ‹Kana"aani eate Yordaanoosi fultinanni yannara,

⁵² hakkiicho noo manna baala shorritine hunne. Boncenna daashshine seekkinoonnita kaphu maganna baalanta gudde; magansi'nanni tulluwa baala diigge.

⁵³ Baatto iqqa'ne asse oommo'nena ragidhine teessine heedhe.

⁵⁴ Baatto ga're ga'rentenni hixunni beeqqitine adhe. Kiiro haammattinorira hala'lishshine, kiiro ajjannorira kayinni ajishshine uuyye.

⁵⁵ « ‹Hatte baattora noo manna shorritine fushsha hoogginiro kayinni, ille'nera buuyyicho, midashshi'nera uta ikkitanno'ne. Wo'manka woyite qarra kalaqqanno'nere ikkitanno.

⁵⁶ Anino insa aana assammora hedoommore ki'ne aana abbeemmo› yiino yite kulinsa» yii.