KIIRO 32 - Qullaawa Maxaafa

YORDAANOOSI WIDOONNI HEEDHANNO GA'RE

¹ Lowo lalo, ge'reewonna me"e afidhinori Roobeelinna Gaadi ga're Yaizeerinna Geleaadi baatto saadate toltinota ikkitinota affe,

² Musewa, Aliaazaariwanna Israeelete manni baalunkuwa dagge,

^3-4 «Kaaliiqi manninke Israeele qeeltanno gede asse uyinonketi Axaarooti, Dibooni, Yaizeeri, Nimira, Hesibooni, Eliaale, Sibima, Nebonna Beooni katammanna qooxeessinsara noo gobba baala saadate toltinote. Ninke soqqamaanokkirano lowo saada noonke.

⁵ Elittonkeha ikkiro tenne baatto ninke soqqamaanokkira iqqinke. Yordaanoosira widoonni fushshitootinke» yitu.

⁶ Museno daware, «Roduuwi'ne olaho hadheenna ki'ne konniicho gattinara hasidhini?

⁷ Israeele widoonni fulte Kaaliiqi uyinonsa baatto ragidhannokki gede hexxo mayira mursiissinanninsa?

⁸ Annuwa'neno gobba dooyyitara Qaadesi Bernenni soyummonsa waro togonni assitino.

⁹ Eshikooli Laga marte baatto la'uhu gedensaanni Kaaliiqi uyinonsa gobba e'annokki gede Israeelete hexxo mursiissino.

¹⁰ Hakko barra Kaaliiqi lowo geeshsha hanqe,

¹¹ ‹Wo'mu wodani'nenni ane hoode hadhinoonnikki daafira Gibitsetenni fultinori 20 diro ikkinonsarinna hakkuyi aliri mittuno Abirihaamira, Yisihaaqiranna Yaiqoobira eemmo yoommo gobba e'annokki gede xaaroommo.

¹² Wo'mu wodaninsanni ha'runsitinoere Qeneezicha Yoofooni beetto Kaaleebinna Newe beetto Iyyaasu agurranna mittuno illetenni dila'inanni› yiino.

¹³ Kaaliiqi Israeelete lowo geeshsha hanqino daafira, albasiinni bunshe assitinoti hatti ilama baala gooffa geeshsha 40 diro halalla raataabbanno gede assinonsa.

¹⁴ «Ki'ne cubbaataammu ooso, annuwa'ne lekka ikkitine ki'neno Kaaliiqi Israeelete roore hanqanno gede assitinanni heedhinoonni.

¹⁵ Isi hoode ha'ra agurtiniro, xaano konne manna baala halalla facci asse aguranno; iillitannonsa baorano ki'ne xa'mantinanni» yiinsa.

¹⁶ Insano isiwa shiqqi yite, «Konniicho saadankera goo'raana gooraa'na, meentinkeranna oosonkera katamma mi'na hasi'noommo.

¹⁷ Ikkollana dargansa iillinshammonsa geeshsha Israeelete albansaanni ha'nanni, ha'line gaaramate qixxaambe hee'noommo. Hatte yannara meentonkenna oosonke gawajjitannoriwiinni gatisi'rate qiinshoonni katammara wodhineemmo.

¹⁸ Mittu mittunku Israeelichi baattonsa amadda geeshsha mininkera dihingeemmo.

¹⁹ Qeechanke Yordaanoosi Wayira soojjaatoonni afi'noommo daafira, widoonni fulle insa ledo baatto dibeeqqineemmo» yitu.

²⁰ Hakkunni gedensaanni Muse, «Kaaliiqi albaanni qodhitine olaho qixxaabbiniro,

²¹ baarigaarrasino albi'nenni shorre huna geeshsha Kaaliiqi albaanni qixxaabbine Yordaanoosi fultiniro,

²² baattono Kaaliiqi angara higguhu gedensaanni higginara dandiitinanni. Kaaliiqinna Israeele amaddanno'ne coyiwiinni gattinanni; tini baattono Kaaliiqi albaanni iqqa'ne ikkitanno.

²³ «Hakkunni ka'a kayinni Kaaliiqi aana sao assitinanni; assitinoonni cubbino amadanno'neta egenne.

²⁴ Meenti'neranna ooso'nera katamma, saada'nerano goo'raana seekkidhe. Yitinoonni coye kayinni wonshe» yiinsa.

²⁵ Gaadinna Roobeeli ga're Musera, «Ninke soqqamaanokki hajajoottonkere assineemmo.

²⁶ Meentinkenna oosonke, ge'reewinke, meinkenna lalinkeno konniicho Geleaadi katammara gatanno.

²⁷ Ninke soqqamaanokki kayinni yiittonte gede baalunku qixxaambe Kaaliiqi albaanni olaho fulleemmo» yitu.

²⁸ Hakkunni gedensaanni Muse insa ikkito daafira Aliaazaarira, Iyyaasuranna Israeelete roorrootira hajajo aanni,

²⁹ «Gaadinna Roobeeli manni labballu baalu, Kaaliiqi albisanna olaho qixxaabbe ki'ne ledo Yordaanoosi fultannoha ikkiro, baattono anga'nera qo'litinanni yannara, insara Geleaadi baatto iqqa assitine uuyyensa.

³⁰ Olaho qixxaabbe ledo'ne fula hoogguro kayinni, ki'ne ledo Kana"aani baatto beeqqitona» yiinsa.

³¹ Gaadinna Roobeeli mannino, «Ninke soqqamaanokki Kaaliiqi yiinore assineemmo.

³² Kaaliiqi albisanna olaho qixxaambe Kana"aani fulleemmo. Iqqinke kayinni Yordaanoosira kawaanniiti» yitu.

³³ Hakkunni gedensaanni Muse, Amooraawootu moote Sewoonihanna Baasaani moote Aagi gashshoote, katammasinna qooxeessaho noo gashshoote baala Gaadinna Roobeeli ga'rera qoleno Yooseefi beetti Minaase ga're daratira uyinsa.

³⁴ Gaadi ga're Dibooni, Axaarooti, Aroeeri,

³⁵ Axirotishofaani, Yaizeeri, Yogibiha,

³⁶ Beetinemiranna Beetihaaraani qiishote katamma assidhe mi'nitu. Ge'reewinsaranna meinsara goo'raana seekkidhu.

³⁷ Roobeeli ga'reno Hasebooni, Eliaalenna Qiriyatayimi,

³⁸ qolteno Nebo, Ba"aalimeooninna, Sibima katamma gatamartu. Gatamartino katammarano wole su'ma fushshitunsa.

³⁹ Minaase beetti Makiiri boosaallo ikkitinori Geleaadi gobba marte baatto amadde, hakko heedhannore Amooraawoota shorrite huntu.

⁴⁰ Museno Geleaadi Makiiri boosaallira uyinsa. Insano hakkiicho teesso assidhe heedhu.

⁴¹ Minaase ga're ilama ikkinohu Yaiirino gobbansa adhe, Yaiiri qachuwa yee su'ma fushshi.

⁴² Noobahi, Qenaatinna qooxeessaho noo qachuwa baala amade, umisi su'minni Noobahi yee su'ma fushshi.