KIIRO 24 - Qullaawa Maxaafa

¹ Beleaami Kaaliiqi Israeele maassi'rara hasi'rinota afe, wolu barri gede kiiloho ha'ra agure alba halallira hige uurre,

² Israeele ga're ga'rentenni baxxisidhe noota afi. Maganu Ayyaani aanasi dirreenna,

³ himana coyi'ranni, «Himana coyi'reemmohu, ani Bioori beetti Beleaamiiti. Ani laeemmo coyi halaalehona, coyi'reemmore macciishshe!

⁴ Ani Maganu yaannore macciishsheemmo; albasiinni gombisame hee'reenna, Wo'manka Dandaanno Magani ajuuja uyinoe.

⁵ Israeelete manna, qachi'ne hiitto biifinoho!

⁶ Diramino saatte, wayi gami jajja, Kaaliiqi kaasino argiiyyenna wayi gama noo daguwa lawanno.

⁷ Lowo xeena ganannonsa daafira, jajjinsa ikkanno geeshshi waa afi'ranno. Mootensa Amaaleqichu Agaaginni rooranno; gashshootinsano bati'ranno.

⁸ Maganu Gibitsetenni fushshinonsa; gaarraanchu gede ikke gaaraminonsa. Diinnansa bibbidanno; miqqansano cancananno; maxxansano hiiqqaqqanno.

⁹ Tini gosa wolqaataamu doobbiichi gede ri'e agartanno; kisannonsahu ayeti? Maassi'rannonsahu maassamanno; rumannonsahu rumamanno!» yii.

¹⁰ Hakkunni gedensaanni Baalaaqi Beleaamira lowo geeshsha hanqe anga gane, «Ani diina'ya rumattora woshshi'roommohe; ati kayinni insa 3 higge maassi'rootto.

¹¹ Xa rakke qaekki ha'ri; wonara galatakki seekke qolammohera noommo. Xa kayinni Kaaliiqi afi'rattokki gede assinohe» yiisi.

¹² Beleaami Baalaaqira, «Anewa sootto mannira,

¹³ ‹Wole agurranna birrunna culku wo'minoha mootete mine uyiero nafa, Kaaliiqi yiinore agure ani umi'yanni mittoreno dicoyi'reemmo; ani Kaaliiqi yiinoere calla coyi'reemmo› diyoommo?

¹⁴ Xaate ani gobba'ya higeemmo. Hara'yara albaanni kayinni, kuni manni kunni ka'a mannakki assannota kuleemmohe» yiisi.

BELEAAMIHA SHOOLKI HIMANA

¹⁵ Hakkunni gedensaanni Beleaami, «Himana coyi'reemmohu, ani Bioori beetti Beleaamiiti. Ani laeemmo coyi halaalehona, coyi'reemmore macciishshe.

¹⁶ Ani Maganu coyi'rannore macciishsheemmo; Wo'munkura Aliidi Maganiwiinni dagganno sokka adha dandeemmo. Albasiinni gombisame hee'reenna, Wo'manka Dandaanno Magani ajuuja uyinoe.

¹⁷ «Xaare ikkikkinni albillittennire laeemmo; mulire ikkikkinni xeertonnire illachisheemmo. Israeelete gosa laeemmo; hattenne gosa giddonni, moote bakkalchu gede ikke fulanno. Moaabi roorroota gananno; Seeti sircho baala cancananno.

¹⁸ Edoomi qeelamanno; Diinisi Seiirino isi angara higanno. Israeele kayinni qeeltino gedeenni heedhanno.

¹⁹ Mootensa gashshe, gatte katamu giddo noore baala shakki asse gudanno» yee himani.

²⁰ Hakkunni gedensaanni Beleaami Amaaleqi gosa afe, «Amaaleqi gosa mannaho aliidite; gedensaanni kayinni co'o yite gooffanno» yee himani.

²¹ Qenaawoota afe, «Heedhinanniwi be'e yinannikki dargaati; mini'neno kinchu giddo no.

²² Ikkirono ki'ne Qenaawootu, Asoori gosa qafaddanno'ne waro gooffinanni» yee himani.

²³ Himanasi gumulanni, «Eeggate, Maganu togo assanna ayi gatanno!

²⁴ Horritannori markaawete ofolte, Qophiroosi giddichonni dagganno. Asoorinna Eeboori amaddanno; ikkollana insano co'o yite gooffanno» yii.

²⁵ Hakkunni gedensaanni Beleaami qaesi ha'ri. Baalaaqino dargasi higi.