KIIRO 20 - Qullaawa Maxaafa

KINCHU GIDDONNI FULINO WAA

¹ Israeele baalanti diroho umi aganira Tsiini Halalla Qaadesi yinanniwa marte baxxisidhu. Maariyaamino hakko reyiteenna madaarrise.

² Hakkiicho wayi nookki daafira, mannu Musenna Aarooniwa shiqqi yee dayi.

³ Muse ledono, «Roduuwinke Kaaliiqi Dukkani albaanni reyitu waro mayi ninkeno reyino!

⁴ Ninke konne halalla mayira abbitininke? Saadanke ledo mitteenni goonfammora haadhine daggininke?

⁵ Gibitsetenni fushshitine tenne busha gobba mayira abbitininke? Gidu, balase, woyine woy roomaane dino. Wole agurranna anganni wayi nafa nookkiwa!» yaanni giwami.

⁶ Musenna Aarooni mannuwiinni ka'e hadhu. Marte huuccidhara Qullaawu Dukkani waalchira alba higge gombisante heedhe, Kaaliiqi hakkiicho noota leellishannoha ayirrinyu xawaabba affu.

⁷ Kaaliiqino Musera,

⁸ «Qullaawu Dukkani giddonni siqqicho haadhe, rodiikki Aarooni ledo manna mittowa gamba asse. Insa la'anna kinchoho coyi'ri; giddosinni wayi fulannona. Kunni garinni kinchu giddonni waa fushshiteenna insanna saadansa agganno» yiisi.

⁹ Museno Kaaliiqi hajajinosi garinni mare Dukkanu giddonni siqqo haa'ri.

¹⁰ Aarooni ledo manna mittowa kinchu albaanni gamba assiteenna Muse, «Ki'ne haxawarrootu! Halaalinta kunni kinchi giddonni ki'nera waa uyino'ne?» yiinsa.

¹¹ Hakkunni gedensaanni Muse siqqo haa're kincho lame hige gani. Wayi fule lolaheenna insanna saadansano aggu.

¹² Kaaliiqi kayinni Musenna Aarooni, «Israeelete albaanni Qullaawa ikka'ya egensiisate ane addaxxitinoonnikki daafira, konne manna haadhine eemmonsa gobba dimassitinanni» yee rufinsa.

¹³ Israeele Kaaliiqi ledo giwantinohunna isino Qullaawa ikkasi leellishinonsahu hakkiichooti. Kunnira hakkonne darga Meriiba yitu. Hatto yaano giwanshote yaate.

EDOOMI MOOTE ISRAEELE GOBBASI GIDDOONNI HIGGE SA'ANNOKKI GEDE HOOLI

¹⁴ Muse Qaadesinni Edoomi mootera manna soye, «Roduuwikki ninke Israeelete gosara iillinonke qarra ati afootto.

¹⁵ Akaakkanke Gibitse hadhino. Ninkeno hakkiicho lowo diro hee'noommo. Gibitsootu ninkeno annuwankeno qarrissino.

¹⁶ Kaaliiqi widira hinge raarreenna isino macciishshe sokkaancho soye Gibitsetenni fushshinonke. «Xa kune gashshootikki dannira Qaadesi Katamira hee'noommo.

¹⁷ Kunnira ballo eeggatena, gobbakki giddoonni hinge sa'neemmo gede fajjinke. Ninkeno saadankeno loosikki woy jajjikki giddora e'nummokkinni jawa doogo calla amande ha'neemmo; gobbakki waano dikinseemmo. Tayinse sa'nammo geeshsha ka'anna kawa dihingeemmo» yiisi.

¹⁸ Edoomi moote, «Konne higgine disa'inanni; sa'neemmo yitiniha ikkiro fulle bisetenni doddolleemmo'ne» yii.

¹⁹ Israeeleno qolte, «Jawa doogo calla amande ha'neemmo. Ninkeno saadankeno waa angeemmoha ikkiro baaxxineemmo; ninke giddoonni hinge sa"a calla hasi'noommo» yitu.

²⁰ Edoomi moote qole, «Konne higgine sa"a didandiitinanni» yee dawarinsa. Hakkunni gedensaanni Edoomootu lowota wolqaataame olanto qodhisiisse qassansara fultu.

²¹ Edoomootu gobbansa giddoonni higge sa'annokki gede hooltinonsa daafira Israeele agurte wole doogo higge hadhu.

AAROONI REYO

²² Israeele baalanti Qaadesinni ka'e Hoori Ilaala iillitu.

²³ Kuni ilaalino Edoomi dannira nooho. Hakkiicho Kaaliiqi Museranna Aaroonira,

²⁴ «Aarooni reyanno. Lamunku Meriiba Wayiwa hajajo'ya huntinoonni daafira, isi Israeelete eemmo gobba mare di"iillanno.

²⁵ Aarooninna beettosi Aliaazaari haadhe Hoori Ilaala fushshi.

²⁶ Aarooni reyanno daafira qeesimmanniha imaanasi mulqite beettisi Aliaazaarira uddisiisi. Aaroonino hakkiicho reyanno» yiisi.

²⁷ Museno Kaaliiqi hajajinosi gede assi. Insano gamba yee noo manni baalunku la"anna ilaalu iimira fultu.

²⁸ Museno Aarooni imaana fushshe Beettisira Aliaazaarira uddisiisi. Aaroonino hakko ilaalu birxe aana reyi. Musenna Aliaazaarino ilaalu aaninni dirritu.

²⁹ Mannu baalunku Aarooni reyinota macciishshe, 30 barra wo'ma wi'lisi.