KIIRO 15 - Qullaawa Maxaafa

KAKKALO SHIQINSHANNI GARA KULANNO SEERA

¹ Kaaliiqi Musera,

² «Israeelete, ‹Heedhinara eemmo'ne gobba martinihu gedensaanni,

³ xano tidhate woy afansha uyi'rate woy amma'note ayyaanna ayirrisate woy shilqote kakkalora lalo woy ge'reewo woy me"e shiqishshinanni. Tini kakkalo ane Kaaliiqira su'niitannota ikkitanno.

⁴ Kakkalo haa're shiqishannohu mitte litire ikkitannotenni ejersu zayitenni liinsoonnita mitte kiilo bullee haa're abbona.

⁵ Shilqote kakkalora shiqinshannihu mittu mittunku aju ge'rechu goci ledo mitte litire ikkitannota woyinete xajje anganniri fushshaatira shiqishona.

^6-7 Jawu ge'rechu goci ledo mitte litirenna daratu ejersu zayitenni liinsoonnita lame kiilo bullee ledo, angannita mitte litirenna darate woyinete xajje fushshaate asse abbona. Tini kakkalono ane Kaaliiqira su'niitannota ikkitanno.

⁸ Shilqote kakkalora woy xano tidhate woy mittimmate kakkalora 1 booto shiqinshanni yannara,

⁹ 2 litire ikkitanno zayite ejersunnitenni liinsoonnita 3 kiilo bulleenna,

¹⁰ 2 litire woyinete xajje ikkona. Tini kakkalono ane Kaaliiqira su'niitannota shilqote kakkalo ikkitanno.

¹¹ «‹Booto woy ge'rechu goco, ge'rechunniha woy meichu wilii'licho kunni garinni shiqinshona.

¹² Gidunnihunna anganniri fushshaati shiqishshinanni saada deerrinni ikkona.

¹³ Ayino gobbate beetti ane Kaaliiqira su'niitanno kakkalo shiqishanno yannara kunni garinni shiqishona.

¹⁴ Xaanni kayise dagganno ilama geeshsha manni gobba manni woy ayino giddo'ne hee'rannohu su'niitannota shilqote kakkalo anera shiqishanno yannara, ki'ne assitinanni gede asse shiqishona.

¹⁵ Ki'nerano giddo'ne hee'ranno mannirano mittu gari wodho heedho'ne. Tini wogano dagganno ilama geeshsha soorrantoonke. Ki'neno manni gobba mannino ane Kaaliiqira taaloho.

¹⁶ Ki'neranna insara kuni seerinna tini woga taaloho› yiino'ne» yiinsa.

¹⁷ Kaaliiqi Musera,

¹⁸ «Israeelete, ‹Ani masseemmo'ne gobba e'ine,

¹⁹ baattote aani laalcho ittinanni woyite, aaninni kayissine ane Kaaliiqira fushshaate assitine uuyye.

²⁰ Isono umi gidi bullee aaninni kayissine tima gantine abbe. Konne ga'nitinoonni gidi aaninni haadhine abbitinannihu garinni shiqishshe.

²¹ Dagganno ilama baalantera umi gidi bullee aaninni kayissine konne fushshaate ane Kaaliiqira uuyye› yiino yite kulinsa» yii.

AFA HOONGETENNI LOONSOONNI CUBBI DAAFIRA SHIQINSHANNI KAKKALO

²² Kaaliiqi Musera, «Mannu afa hoongetenni ani Kaaliiqi atera oommo hajajo xeisiro,

²³ woy dagganno ilama ani oommo hajajo baala wonsha hoogguro,

²⁴ tini so'rono de'netenni kalaqantinota ikkituro, mannu anera mitto middicha su'niitannota shilqote kakkalo asse shiqishona. Kunni ledo seeru garinni gidunnihanna anganniri fushshaate, qoleno cubbo agursiisate kakkalora meichu goco shiqishona.

²⁵ Qeesichuno Israeelete manni baalunku cubbo agursiisanno. Konne assinannihuno afa hoongetenni assitino saora shilqote kakkalonna cubbo agursiisate kakkalo shiqishshuro cubbinsa aguramannonsa.

²⁶ Tini sao afa hoongetenni assitinota ikkitinohura, Israeele baalanteranna giddonsa hee'ranno manni baalunkura cubbinsa aguramannonsa.

²⁷ «Mittu manchi callisi afa hoongetenni cubbo loosiro kayinni, cubbo agursiisate kakkalora mittu dirita meichote goodane abbona.

²⁸ Qeesichuno afa hoongetenni sao assino mancho ane Kaaliiqi albaanni keereensosina. Keereensinannisi woyiteno cubbisi aguramannosi.

²⁹ Gobbate beettino ikko manni gobba manchi afa hoongetenni cubbo loosiro wonshinanni woga mittete.

³⁰ «Gobbate beettono ikko manni gobba manchi afanni hee're cubbo loosiro kayinni, ane shollishino daafira mannu mereerinni tae ho'lona.

³¹ Ani Kaaliiqi yoommore mishinohuranna hajajo'ya diiginohura hakku manchi horonta tae ho'lo. Cubbisino aanisinni diho'lanno» yiisi.

FOOLIISHSHOTE BARRA AYIRRISA GIWINOHURA UYINOONNI QORICHA

³² Israeele halallitte gobbara heedheenna Fooliishshote Barra mittu manchi haqqe hiiqqi'ranna anfi.

³³ Konne mancho haadhe Musewa, Aarooniwanna Israeelete manni baalu albira abbitu.

³⁴ Isono assinannita anfoonnikki daafira agarreenna keeshshi.

³⁵ Hakkunni gedensaanni Kaaliiqi Musera, «Manchu reyona; Israeelete manni baalunku qachu gobbaanni fushshe kinnatenni gane shoona» yii.

³⁶ Kaaliiqi Muse hajajino garinni, mannu mancho qachu gobbaanni fushshe kinnatenni gane shii.

UDDANOTE HANDAARI DAAFIRA UYINOONNI SEERA

³⁷ Kaaliiqi Musera,

³⁸ «Israeelete mannira, ‹Dagganno ilama baalantera uddano'ne qaccera handaara wodhe; mittu mittunku handaarira bulu xilati hee'rosina.

³⁹ Wodani'ne yorihunna ille'ne la'uhu baalu hoode hadhinanni foortinannikki gede konne handaara la'inanni, Kaaliiqi hajajo qaagginanni gede assanno'ne.

⁴⁰ Konne qaagginanni woyite hajajo'ya baalanta wonshate heddinanni; hakkawoyite ane Magani'nera baxxitinoonnire ikkitinanni.

⁴¹ Ani Kaaliiqi Magano'neeti. Magano'ne ikkammora Gibitsete gobbanni haa're fushshoommo'ne. Ani Kaaliiqi Magano'neeti› yiino yite kulinsa» yii.