KIIRO 14 - Qullaawa Maxaafa

ISRAEELETE MANNI MUSERA GARA GIWI

¹ Hakko hashsha mannu baalunku yaade qoonqosi naggi asse wi'lanni gali.

² Israeele gudisante, «Gibitsete gobbara woy konniicho halalla reyine goonfoommoro woyyannonke» yitanni Museranna Aaroonira gungutu.

³ «Kaaliiqi bagadu gudankera hattenne gobba mayira haa're ha'rannonke? Meentinkeno oosonkeno qafadantaraati. Galagalle Gibitse higa diwoyyitannonke?» yitu.

⁴ Insa insanaawa, «Amme albisannonkeha doodhine Gibitse hingona» yitu.

⁵ Musenna Aarooni konne coye macciishshite, gamba yee noohu Israeelete manni baalu albaanni gombisante Kaaliiqa huuccidhu.

⁶ Baatto dooyyite higginori giddonni Iyyaasunna Kaaleebi dadillitino daafira imaanansa dartu.

⁷ Israeelete manni baalunkura, «La'ne dangoommo baatto lowo geeshsha xumate.

⁸ Kaaliiqi baxannonkeha ikkiro, hattenne adonna malawu wo'mino gobba haa're massannonke; iseno ninkera aannonke.

⁹ Kaaliiqiralla gara gibbinoonte; konne manna mittu qarri nookkiha qeelleemmona waajjitinoonte; Kaaliiqi ledonke noo daafira magannansa shawwu yitinona waajjitinoonte» yiinsa.

¹⁰ Mannu kayinni gudisame kinnatenni gane shaansara kai. Hakkunni gedensaanni Kaaliiqi ayirrinyi Qullaawu Dukkani aanaanni Israeelete manni baalaho leelli.

MUSE MANNU DAAFIRA KAALIIQA HUUCCI

¹¹ Kaaliiqino Musera, «Kuni manni ane mishannoehu mamari geeshshaati? Tenne maalale baala assanni hee'reennanni ammanannoekkihu mamari geeshshaati?

¹² Konne manna dhibbunni shee gudeemmo; ate kayinni insanni roore jawanna wolqaataame gosara anna asseemmohe» yiisi.

¹³ Muse qole Kaaliiqira, «Konne manna wolqakkinni Gibitsetenni fushshoottohu ateetina, konne coye insa affuro,

¹⁴ ikkinore baala hatte gobba mannira kultanno. Ati Kaaliiqi ninke ledo noottotanna gomichu guggushsheenna ninkera leellattota, barra gomichunni, hashsha giirate daninni albankeenni hadhanni abboottonketa affanni keeshshitino.

¹⁵ Xa kayinni konne manna shite gudittoro, atere macciishshitino daga baala,

¹⁶ ‹Eemmo'ne yiino gobba iillisha hoogino daafira halallitte gobbara shee gudinonsa› yitannohe.

¹⁷ Kunni daafira Mooticha'ya ballo, yoottore wonsha dandaattota wolqakkinni leellishi.

¹⁸ Qolteno, ‹Ani cincaaleessaho, baxilli'yanna maaro'ya bati'rate; cubbonna sao agureemmo; sao assinoha kayinni qorichishummokkinni diagureemmo; annuwate cubbira sasenna shoole ilama geeshsha oosonsa qorichisheemmo› yootto gedenna,

¹⁹ Gibitsetenni fultu warinni kayisse, xaa geeshsha saonsa agurittonsante gede xaano jawa maarokkinni kunni manni cubbo agurattora huucci'reemmohe» yii.

²⁰ Kaaliiqino, «Yoottoe garinni saonsa aguroommonsa.

²¹ Ikkollana ani heeshshote Magano ikka'yanninna ayirrinyi'yano baatto baala wo'minoha ikkino deerrinni,

²² halallitte gobbara assoommonsa maalale affanni heedhenni hajajama gibbe batinye higge fonqoltinoe.

²³ Annuwansara aammora xaaroommo gobba illetenni nafa dila'anno; mishshinoeri giddonni mittu nafa hakkiichira dieanno.

²⁴ Soqqamaanchi'ya Kaaleebira kayinni baxxitino hedo noosi daafiranna co'o yiino wodaninni ha'runsinoe daafira, hattenne lae dayino gobba iillisheemmosi; sirchisino mare ragi'ranno.

²⁵ Amaaleqootunna Kana"aanootu laggate giddo heedhanno daafira, ga'a galagaltine Duumu Baari widoonni higgine halallira hadhe» yee dawarisi.

KAALIIQI GUNGUMINO MANNA QORICHISHI

²⁶ Kaaliiqi Museranna Aaroonira,

²⁷ «Kuni bushu manni mamari geeshsha anera gungumanni hee'ranno? Tenne busha gurura"ansano macciishshoommona,

²⁸ ‹Halaali'ya afanna, huuccidhinoonnire wonsheemmo'ne.

²⁹ Kiirroonni'ne garinni lemuu dirinna hakkuyi aliri baalu anera gunguntinoonni daafira reeshshi'ne konne halalla uwanno.

³⁰ Utuwa'ne ikkitanno gede xaare coyi'roommo gobba Yoofooni beetto Kaaleebinna Newe beetto Iyyaasu agurranna ki'ne giddonni mittuno dieanno.

³¹ Qafadante ba'anno yitinoonnita ooso'ne kayinni iillisheemmonsa; ki'ne mishshinoonni baattora ooso'ne hagiirrunni heedhanno.

³² Ki'ne reeshshi kayinni konniicho uwe gatanno.

³³ Ammana hooga'nenni kainohunni ki'ne reyitine gooffina geeshsha ooso'ne 40 diro raataabbanni heedhanno.

³⁴ Baatto dooyyitinanni keeshshitinihu shoyilluunku barri deerrinni, mittu mittunku diri mittu mittu barri gede ikke kiirameenna cubbi'ne daafira 40 diro qarrantinanni. Ane hanqisa maricho abbitannoro hakkawoyite buuxxinanni.

³⁵ Mimmito amaddine aana'ya ka'inoonni haxawarrooti baalu aana konne coye abbeemmo; tini halallitte gobba gawalo ikkitanno'ne. Konniicho reyitinanni› yiino'ne yitine kullensa. Konne coyi'roommohu ani Kaaliiqaati» yii.

³⁶ Gobba dooyyitara Muse soyenna hadhe higge bushu duduwinni manna baala gungumanno gede assitinori tonnunku manni,

³⁷ Kaaliiqi albaanni qoomante reyitu.

³⁸ Baatto dooyyitara sonkoonniri tonaa lamunku giddonni Iyyaasunna Kaaleebi callu gattino.

BAATTO AMADATE ASSINOONNIHA UMI WO'NAALSHA

³⁹ Museno konne duuchanka coye Israeelete kulinsahu gedensaanni lowo geeshsha hururante wi'litu.

⁴⁰ Layinki soodo gutte Kana"aanita gaaraame gobba hadhara ka'e, «Cubbo loonsoommota anfoommo. Xa kayinni Kaaliiqi eemmo'ne yee coyi'rino gobba ha'nammora ka'noommo» yitu.

⁴¹ Muse kayinni daware, «Yitinoonniri di"ikkanno'nena, beebba mayira Kaaliiqi hajajo sa'inanni?

⁴² Kaaliiqi ki'ne ledo dinona fultinoonte; diini'ne gawajjanno'ne.

⁴³ Amaaleqootunna Kana"aanootu guddanno'ne. Kaaliiqa agurtinoonni daafira, isino ledo'ne dinona bagadunni xaaddinanni» yiinsa.

⁴⁴ Insa kayinni Musenna Kaaliiqi Taabooti noo qachinni kaikkinni uminsa hedonni ilaalaame gobba fulte hadhu.

⁴⁵ Hakkunni gedensaanni ilaalaame gobbara heedhannori Amaaleqootunna Kana"aanootu dirrite qassunsa. Herma Katama iillita geeshsha shorritunsa.