KIIRO 13 - Qullaawa Maxaafa

KANA"AANI DOOYYARA SONKOONNI MANNA

¹ Kaaliiqi Musera,

² «Israeelete eemmo yoommo gobba Kana"aanita dooyye higanno gede shiima manna soyi. Ga're ga'rentenni mitto mitto roorricha soyi» yii.

³ Museno Kaaliiqi hajajino garinni Faaraani Halallinni dooyyitannore 12 roorroota soyi.

⁴ Sonkoonnirino: Roobeeli ga'renni Zakuuri beetti Shamua,

⁵ Simiooni ga'renni Hoori beetti Saafaaxi,

⁶ Yihudu ga'renni Yoofooni beetti Kaaleebi,

⁷ Yisaakoori ga'renni Yooseefi beetti Yigiaali,

⁸ Efireemi ga'renni Newe beetti Hoosei,

⁹ Biiniyaami ga'renni Raafu beetti Felixi,

¹⁰ Zaabilooni ga'renni Soodi beetti Gaadieeli,

¹¹ Yooseefi beetti Minaase ga'renni Suusi beetti Gaadi,

¹² Daani ga'renni Gemaali beetti Amieeli,

¹³ Aseeri ga'renni Mikaaeeli beetti Setuuri,

¹⁴ Niftaalemi ga'renni Wafisi beetti Nahiibi,

¹⁵ Gaadi ga'renni Maaka beetti Geueeliiti.

¹⁶ Gobba dooyyate Muse soyino manni konneeti. Muse Newe beettira Hooseira su'ma Iyyaasu yee fushshisi.

¹⁷ Muse konne manna gobba dooyyara Kana"aani soyi yannara, «Wodiidi widoonni higgine sa'ine gaaraame aliyye gobba marre.

¹⁸ Gobba hiittootero, gobbate aana noo mannino mageeshshihoro, qoleno mannu laafahoronna jawaatahorono buuxxe.

¹⁹ Heedhanno gobba danchateronna bushatero, mannu fano darga hee'rannohoronna qiinshoonni katammara noohoro la'e.

²⁰ Baatto shaqqadoteronna moolatero, haqqu nooronna mullichotero la'ine laalchono tayissine haadhine abbe» yiinsa. (Hatti wogga woyinete haqqe laaltanno yannaati.)

²¹ Insano aliyyenni Tsiini Halallinni ka'e, Hamaati faro widoonni higge Rehoobi geeshsha iillite gabba dooyyitu.

²² Negebi widoonni higge sa'e Akimaani, Sesiininna Talmayi yinanniti jajjabba Enaaqi ilama heedhannoha Kebirooni Katama iillitu. (Kebirooni Tsoaani Katami Gibitsennihu minamara lamalu dirira albaanni xintaminoho.)

²³ Hakkiinni sa'e Eshikooli Laga iillite woyinete laalota mitte hunduruurro tayisse adhitu. Mittu manchi callu haa're dandaannokki daafira, lamu roomaanetenna balasete laalo ledo mitteenni dawaayyichoho worte dukku.

²⁴ Israeele woyinete laalo tayisse adhitino daafira hakkonne darga Eshikooli yite su'ma fushshitu.

²⁵ Baatto dooyyite gudde shoyilluu barri gedensaanni higgu.

DOOYYAANO HAADHE ABBITINO DUDUWO

²⁶ Dooyyaano Muse, Aarooninna Israeelete manni baalunku noowa Faaraani Halalla Qaadesi yinanniwa higgu. La'e dagginore baala insaranna Israeelete manni baalunkura kultu; haadhe abbitino laalchono leellishshunsa.

²⁷ Muserano, «Soottonke gobba marre la'noommo; baattono adonna malawu wo'minote; hala'ladotenna shaqqadote; gobbate laalchino konneeti.

²⁸ Hakko hee'rannohu mannu kayinni wolqaataamoho; katammano jajjabbatenna qiishonnite; Enaaqi gosano hakkiicho noota anfoommo.

²⁹ Amaaleqootu wodiidi ragaanni, Hitootu, Iyaabuusootunna Amooraawootu gaaraame gobbara heedhanno. Kana"aanootu qolte Mediteraaniyu Baari mulenna Yordaanoosi Wayi qooxeessira heedhanno» yite kultu.

³⁰ Hakkunni gedensaanni Kaaleebi Musera gungumanni noo manna sammi yaanno gede asse, «Qeelleemmo wolqa noonkena fulle baattonsa amando» yii.

³¹ Wolootu kayinni, «Ninkenni roore wolqaataamma ikkitino daafira qeelle dianfeemmo» yitu.

³² Togo yite kaphu duduwo mannu mereero fincitanni, «Hatti la'ne dangoommo gobba manna diwortannote; hakko hee'ranno manni baalunku jajjabbaho.

³³ Nefiliimi yinannire Enaaqi gosa hakko anfoommo. Insa mule ninke koro'miisu geeshshire ikkinoommo; insano hakko garinni la'inonke» yitu.