KIIRO 11 - Qullaawa Maxaafa

KAALIIQIWIINNI DIRRITINO GIIRA

¹ Israeelete manni iillinonsa qarri daafira Kaaliiqira gungumi. Kaaliiqino gungumansara lowo geeshsha hanqe ittanno giira dirrisi. Tini giirano Qullaawu Dukkanira gobbaanni noo qacha ittu.

² Mannuno Musewa hige raari; Museno Kaaliiqa huucceenna giira xo'u.

³ Kaaliiqi giira aanansa bubbino daafira hattenne base Tabieera yitu.

MUSE KAA'LITANNOSIRE 70 ROORROOTA DOORI

⁴ Israeelete ledo noohu wole gobba manni maala itate lowo geeshsha halchi. Israeelete mannino, «Maala maminni afi'no ikka?

⁵ Gibitsete hee'noommo waro qulxu'me hidhinummokkinni hasi'nummo geeshsha intoommo; baaqula, waa afi'rinoha coommanno baaqula, daraamo shunkurta, duumo shunkurtanna tuma duumboommo.

⁶ Xa kayinni kune mannimmanke moolteenna wolqa hoongoommo; barru baala konne menna agurranna illenke wolere hooggino» yaanni gungumi.

⁷ (Tini mennaho yinanni sagale, dimbilaalete yinanni qimame guma labbanno; danisino waajjo haphaayyo gedeeho.

^8-9 Tini sagale hashsha loju ledo dirritanno. Mannuno soodo gute fule xinqi're daahe woy udule bullee assihu gedensaanni gafe fushshe tima ga'ne itanno. Intanni woyiteno zayitetenni liinsoonni timi gede coommitanno.)

¹⁰ Muse mannu baalunku dukkani dukkanisi xullichira uurre wi'lannanna gungumanna macciishshi. Kaaliiqino lowo geeshsha hanqino daafira Muse yaadi.

¹¹ Qoleno Kaaliiqa, «Ani borojjichikki ma"asseennaheeti kunni baalunku manni duha duhisiisse qarrisattoehu?

¹² Ani kalaqoommore woy gamaa'me iloommore ikkitinoni? Annuwansara eemmo'ne yite coyi'rootto gobba iillita geeshsha qaaqquullu gede awuutanni duhe haa're ha'rammonsara mayira worittoe?

¹³ ‹Inteemmo maala uyinke› yaanni wi'lannonna gungumannohura, kageeshshi mannira ikkanno maala ani maminni abbeemmo?

¹⁴ Wolqa'yara aleenni higino daafira, konne manna calli'ya massaga didandeemmo.

¹⁵ Togo qarramanna worte la"attoentenni, mararittoero konne qarra afeemmokki gede rakke shiie» yii.

¹⁶ Kaaliiqi Musera, «Israeelete manni giddonni manna gashsha egentinore 70 roorroota doori; insano haadhe Qullaawu Dukkaniwa abbite mulekki uurritanno gede assi.

¹⁷ Anino dirre ate ledo hasaaweemmo; atera oommo Ayyaana insarano eemmo. Mannu qarra callikki duqqattokki gede kaa'litannohe.

¹⁸ Xa mannaho, ‹Inteemmo maala maminni afi'no? Gibitsete hee'nummo yanna woyyitannonke yitinanni gunguntinoonnita Kaaliiqi macciishshino. Isino ga'ara maala qixxeessanno'nena, ki'nenee keereensidhe; maalano ittinanni!

¹⁹ Ittinannihuno 1 woy 2 woy 5 woy 10 woy 20 barra di"ikkanno.

²⁰ Gibitsetenni fula'ne gaabbitine gunguntinanni ane mishshinoonniena, giwise sanoonni fula'ne geeshsha agana wo'ma ittinanni yiino'ne› yite kulinsa» yii.

²¹ Museno qole, «Kune ani 600,000 manni ledo noommo. Ati kayinni, ‹Agana wo'ma ittanno maala eemmonsa!› yitanni nootto.

²² Mageeshshi ge'reewonna mageeshshi lalo gorrineenna ikkanno? Baaru qulxu'me baala gamba assinoommero nafa ikkannoni?» yii.

²³ Kaaliiqino, «Halaalinta ane Kaaliiqi wolqa hanqatateni? Yoommo coyi ikkannotanna hoogannota afattona agari» yiisi.

²⁴ Museno fule Kaaliiqi yiinota mannaho kuli. Mannu giddonni lamalaanka roorroota gamba asse Qullaawu Dukkani gaangaawira uurrisi.

²⁵ Hakkunni gedensaanni Kaaliiqi gomichunni dirre Muse ledo hasaawi. Isira uyino Ayyaanano lamalawunku roorrootira uyi. Insano Ayyaanu aanansa dirranni hee'reennanni himana coyidhu. Hakkunni gedensaanni kayinni ledde dicoyidhino.

²⁶ Doorroonni roorrooti giddonni 2 manchi Eldaadinna Modaadi yinanniri kayinni Dukkanunniwa martukkinni qachaho gattino. Ikkollana hakkiicho noowa heedheennanni Ayyaanu dirreennansa insano himana coyidhu.

²⁷ Mittichu wedellichi dodanni daye Musera, «Eldaadinna Modaadi qachaho heedhe himana coyidhanni no» yee kuli.

²⁸ Wedellichimmasinni kayise Muse kaa'laanchi Newe beetti Iyyaasu, «Mooticha'ya hoolissinsa!» yee Musera coyi'ri.

²⁹ Museno daware, «Anera qarranteeti? Kaaliiqi mannu baalunkura Ayyaana ee himana coyi'ranno gede assoommero hagiidheemmo gara afootto?» yiisi.

³⁰ Hakkunni gedensaanni Musenna lamalawunku Israeelete roorrooti qacha higgu.

KAALIIQI HANSHAQQE SOYI

³¹ Kaaliiqi hedeweelcho soyino bubbe dagge hanshaqqe baaru giddonni haadhe abbitu. Baattote aaninni iimallitte 2 cigile fafe buuwanni faro faronte mitto barra ha'risanno geeshshiwa xeerti're duunami.

³² Mannuno fule hashshanna barra wo'ma layinki barri geeshsha hanshaqqe gamba assi'ri; harrichu hogowo xeisi'rinohu mittuno dino. Baalunku abbi're qachisira haqqi.

³³ Maala hinkotenni qassanni heedheennanni Kaaliiqi hanqi aanansa buwi. Kaaliiqino lowo qoomaminni ganinsa.

³⁴ Maala wolsatenni reyino manna waammoonniwa ikkino daafira hakkonne darga, «Wolsate Waamma» yini.

³⁵ Mannuno hakkiinni kae Hatserooti yinanniwa mare baxxisi'ri.