KALAQAMA 8 - Qullaawa Maxaafa

BAOTE WAYI GOOFIMARCHO

¹ Maganu Nohi, markaawete ledosi noo moyichirenna saada baalannire hedi; baattote aanira bubbe soyenna wayi xei.

² Burqanni noo baari tuami; gordu masikootta cufantu; xeenuno uurri;

³ wayi baattote aaninni galanni hosanni xei; 150 barri gedensaanni wayi ajanni dayi.

⁴ Markaawe lamalki aganira tonaa lamalki barra Araaraati yinanni ilaalla giddo mittichu aana ofoltu.

⁵ Wayino tonnikki agani geeshsha xeanni xeanni dayi; tonnikki aganira umi barra ilaallate birxe leeltu.

⁶ Shoyilluu barri gedensaanni, Nohi seekkinota markaawete masikoote fane,

⁷ haraqeessa fushshe soyi; haraqeessuno wayi baattote aaninni goofa geeshsha ka'anna kawa doyanni keeshshi.

⁸ Hakkunni gedensaanni, wayi baattote aaninni xeino gedeenni afara, lemboolcho fushshe soyi.

⁹ Ikkollana, lemboolcho lekkasenni kaxxitanno darga hoogge, galagalte markaawete giddora Nohiwa higgu; wayi baattote baalankawa noo daafira, angasi diriirse haa're isiwa markaawete giddora eessise.

¹⁰ Hakkunni gedensaanni, 7 barri geeshsha keeshshe, lemboolcho galagalche fushshe soyi.

¹¹ Lemboolcho hawarrisse afiisera shaqqado ejersu darcho ga'mite galagalte isiwa higgu; Nohino baattote aaninni wayi xeinota afi.

¹² Galagale 7 barra keeshshihu gedensaanni, xaano lemboolcho fushshe soyi; galagalte kayinni isiwa dihiggino.

¹³ Nohira 601 diro ikkisihunni umi aganira umi barra wayi baattote aaninni goofi; Nohi markaawete tuana fane baatto mooltanni noo gede afi.

¹⁴ Layinki aganira lemiina lamalki barra baatto co'o yite mooltu.

¹⁵ Maganu Nohira;

¹⁶ «Atinna galtekki, oosokkinna, oosokki seenni markaawete giddonni fulle.

¹⁷ Ate ledo noore lubbo afidhinore moyicho, cea, saadanna baattote aana milli yaannore baala, baattote aana ha'rantanno gede, qalantannonna batidhanno gede, haadhe ledokki fushshinsa» yiisi.

¹⁸ Nohi galtesi, oososinna oososi seenni mitteenni markaawete giddonni fultu.

¹⁹ Moyichu, cea, saadanna baattote aana milli yaannori baalu, sirchu sirchunkunni markaawete giddonni fuli.

NOHI KAKKALO SHIQISHI

²⁰ Nohi Kaaliiqira kakkallanni darga seekki; maala intanni saadanna maala intanni cea baalante giddonni danu danunkunni mitto mitto haa're, shilqote kakkalo asse shiqishi.

²¹ Kaaliiqi shilqonniha dancha foole su'niissi'ri; wodanisinnino, «Manchu wodani hedo anjesinni kayisse bushate; ikkirono isinni kainohunni baatto dirumeemmo; xa assummo gede lubbo nooha baala layinkimeeshsho dihuneemmo.

²² Baatto noo geeshsha wixanna mixxa, qiidunna iibbillu, arrunna hawadu, barrunna hashshu duuchanka woyite hee'ranno» yii.